1, 2. Tae-i ǃaroma da dîna ra dî?

ǀGÔAN ge ǂgui dîna ra dî. ǁÎna du ge xū-e mîǃgāǃgāba ǁkhā xawen ge hoaǁae ra dî ‘tae-i ǃaroma?’ Dītsâ tsî du ga ǃereamsa mā nî o, on ge ǀnîsi ra dî ‘mati i io?’

² ǂKham tamas ka io kaira da ga xawe da ge hoa da dîna ra dî. Nē dîn hîna da ūhâ ǁkhān ge tae-e da nî ǂûs, anas tamas ka io tae-e da nî ǁamasa. Tamas ka io da ge ǂhâǂhâsa dîde ûib tsî hānîǁaeb xa ūhâ ǁkhā. Xawe da ga ǂkhîǂkhî da ra ǃereamde sada dîdi ai hō tama io o da ge ra ǀûsen.

3. Tae-i ǃaroman ǂgui khoena ra ǂâi ǁîn ǂhâǂhâsa dîdi ai ǃereamde hōǁoasa?

³ Elobmîsa sada ra dî ǂhâǂhâsa dîdi ǃereamde ū i hâ? ǀNî khoen ge di ra ǂâi, ǁîn ge ra tsâ Elobmîs kaise ǃgom ǁnâuǃāsa di. ǁÎn ge ra ǂâi ǁkhāǁkhā-aon tsî pristergu ǀguin ǃereamde ūhâ di. Tsî ǀnîn ge ra tao ǃereamden a ǀū ǃkhais ǃaroma. Sadu tsîna di ra ǂâi?

4, 5. Mâ ǂhâǂhâsa dîde du ūhâ? Tae-i ǃaroma du ǃereamde nî ôa ǀgara?

⁴ Sadu ge ǀnîsi ǃereamde ǂhâba hâ, nēti i dîn ai: Tae-i ǃaroma ta nēpa hâ? ǁŌ ta ga o tae-e tita ǀkha ra ī? Eloba tae ǃnôa ǀgauga ūhâ? ǂAnǂansa ǁgauǃnâ-aob Jesub ge ge mî: “ǂGan, o du ge nîra māhe; ôa, o du ge nîra hō; ǃgubu-am, o du ge nîra ǁkhowa-ambahe.” (Mateub 7:7) Tā ǀûsen re sado ra ǂkhîǂkhî ǃereamde du nî hōs kōse, ǂgomǃgâ du nî de.

 ⁵ Î, “ôa” ǀgara du ga ra o, o du ge ǃereamde Elobmîs ǃnâ nî hō. (ǂKhoamîdi 2:1-5) Nē ǃereamdi ge kaise ǃgom tama hâ ǁnâuǃāsa. Nē du ra ǁkhāǁkhāsen xūn ge nēsi ǂkhîǂkhîsa ûiba a mā du ǁkhā tsî ǃgâi ǃâubasens tsîna hānîǁaeb ǃnâ. Hā re î da ǀgui dîs xa ǃhoa ǂgui khoen ǁnâuǃā tamasa.

6. Tae-i ǃaroman ǀnî khoena ra ǂâi Elob ǁîn di ǃgomsigu ǀkha ǁae tama ti?

⁶ ǂGui khoen ge ra ǂâi Elob sada tsâba tama hâ ti. ǁÎn ge ra mî Elob ga amabes ǃnâ tsâba da hâ o, ob kom ǃhūbaiba ga ǀkhara hâ o. Torob, ǃhuigub tsî ǂkhîoǃnâsiba da ge hoaba ra mû. Khoen ge ra ǀaesen, ǃgoma tsâ tsî ra ǁō. ǀNî khoen ge ra dî, ‘amaseb ga Eloba sida tsâba o, tae-i ǃaromab sida di ǃgomsiga ūbē tama hâ?’

7. (a) ǂGomdi ǁkhāǁkhā-aoga mati khoena ra ǂgom kai Elob a karoǂgaoxasa? (b) Mati da a ǂan Elob tātsē tsū xūna ī kai tama hâsa?

⁷ ǂGomdi ǁkhāǁkhā-aogu ge khoena Elob a karoǂgaoxa ti ra ǂgom kai. Tsū xūn ga ī o, on ge Eloba xū ra hā ti ra mî. ǁÎn ge Elob ǂgao hâ amaga go ī ti ra mî. Nēs ǀkhan ge ǁîna Eloba ra ǀhapi-mā. Elobmîs ge ra mî Elob ge tātsē tsū xūna ī kai tama hâ ti. Jakobub 1:13 ge ra mî Elob ge khoe-e tsū xū-i ǀkha ǃâitsâ tama hâ. Nēti ra mî: “Khoe-i xare-i, ǃâitsâhe i karao, a-i tā mî: Elob xa ta ra ǃâitsâhe. Elob ge ǂkhabab ǀkha a ǃâitsâhe ǁoa xuige, tsîb ge ǁîb ǂûba khoe-i xare-e ǃâitsâ tama hâ.” Nēs ge ra ǂâibasen Elob ge tsū xū-e ǁkhae tama xaweb ge ǁÎba tsū xū-e tātsē ī kai tama  hâ. (Khomai re Job 34:10-12.) ǀKhī î da nē aiǁgausa kē re.

8, 9. Mati i io i ǂhanu tide Eloba sada di ǃgomsigu ǃaroma ǀhapi-māsa? Aiǁgau-e mā re.

⁸ Mûnanai re ǂkhamkhoeb hîna ǁîb ti ǁgûra ǀkha ra hâba. ǁÎb ti dadasab ge kaise a ǀnam bi tsî ge ǁkhāǁkhā bi matib ǃgâi mîǁguiga a dī ǁkhā ǀgausa. ǁÎb ge dadasaba ge mâǃoa tsî omsa xu ge doebē. ǁÎb ge tsū xūna dī tsî ǃgomsigu ǃnâ ge ǂgâ. Dadasaba da nî ǂgāri-am ǁîb ge ǀgôaba omsa xu doesa ǂkhā tama hâ io? Tātsē! (Lukab 15:11-13) ǁNā dadasab khamib ge Eloba khoena ǁÎban ge mâǃoa tsî tsū xūna dī tsoatsoa o ge ǂkhā tama hâ i. Tsū xūn ga ra ī o, o da ge ǂâis ǃnâ nî ūhâ Eloba xun hā tamasa. ǂHanu i ge tide Eloba ǀhapi-māsa.

⁹ Elob ge ǃgâi ǂâibasensa ūhâ tsū xūn hîna ra īnab ǁkhae tama hâsa. Nē ǂkhanis di 11ǁî danaǃâs ǃnâ du ge nî ǁkhāǁkhāsen Elobmîs tae-e ra mîsa nēs xa. ǂGomǃgâ ǁkhā da ge a Elob sada ama ǀnamsa tsî sada ǃgomsiga ǃaroma tama hâsa. ǁÎb ǀguib ge sida di ǃgomsiga ǀam kai ǁkhā.—Jesajab 33:2.

10. Mati da a ǂan Elob ǁgai xūn hînan tsū khoena ra dīna nî ǂhanuǂhanusa?

¹⁰ Elob ge a ǃanu. (Jesajab 6:3) Dīb ta xūn hoan ge ǃanu tsî a ǃgâi. ǁÎba da ge a ǂgomǃgâ ǁkhā. Khoen ge ǁnāti ī tama hâ. ǁÎn ge ǀnî ǁaeba ǂhanu tama xūna ra dī. ǂHauǃnâ ǂgaeǂgui-aogu tsîn ge ǀgaiba ūhâ tama khoen da ǃaroma ǁgai xūna dī-unusa. Khoe-i ge a ǀkhai Elob ūhâ kō ǀgaiba ūhâ-e. ǁÎb ge ǁkhāsiba ūhâ tsî ǁgai xūn hînan tsū khoena ra dīna nî ǂhanuǂhanu. ǁÎb ge eloxoresasiba nî ūbē ǀamosib kōse.—Khomai re Psalmdi 37:9-11.

11. Eloba mati ra tsâ sadu ǃgomsigu xa?

¹¹ Eloba mati ra tsâ nē ǃhūbaib ǃnâ ra ī xūn tsî sadu ǀkha ra ī xūnab ta mû o? Elobmîs ge ra mî Elob ge “ǂhanuba ǀnam.” (Psalmdi 37:28) ǁÎb ge ǃgam tsâsiba ūhâ ǂhanu-aisib tsî ǂhanuoǃnâsib tsîn xa. ǁÎb ge ǃgâibahe tama khoen ga ǃgoma tsâ o. ǃKharu gere ǁaeb ǃnâb ge ǃhūbaiba eloxoresasib xa ǀoa hâ io, ob ge Eloba “kaise ge tsûaǂgao” dis ge Elobmîsa ra mî. (Genesis 6:5, 6) Elob ge ǀkharaǀkharasen tama. (Maleaxib 3:6) Elobmîs ge ra mî Elob ge sada ra tsâba.—Khomai re 1 Petrub 5:7.

12, 13. (a) Tae-i ǃaroma da khoena ǀnam tsî ra tsâba, tsî ǃhūbaib ǃnâ hâ ǃgomsiga sada mati ra tsâ kai? (b) Mati i io da a ǂgomǃgâ ǁkhā Elob nî hoa ǃgomsigu tsî ǂhanuoǃnâsib tsîna nî ūbēsa?

¹² Elobmîs ge ra mî Elob ge sada ǁîb di īsib ǃoa ge kuru. (Genesis 1:26) Nēs ge ra ǂâibasen Elob ge ǁÎb ūhâ ǀgaugu ǀkha sida a kurusa. Tsūse du ga tsâ o ǀhapio khoe-e mûsa ǃgoma i ra tsâsa o, o ǂâis ǃnâ ūhâ re Elob sadu xa ǃnāsase ra tsâsa! Mati da a ǂan?

¹³ Elobmîs ge ra mî “Elob a ǀnam” ti. (1 Johaneb 4:8) Elob dīgu hoagu ge ǀnammi xa ǂkhâǃnâhe hâ. Sada ge ǀnamma ra ǁgau Elob a ǀnam xui-ao. ǂÂiro re: ǀGaiba du ga ūhâ hâ o, ǃhūbaib ǃnâ hâ ǃgomsigu tsî ǂhanuoǃnâsib tsîna ūbēs diba dī i du ga hâ? Amase du nî dī, khoena du a ǀnam xui-ao. O Elob? ǁÎb ge ǀgaiba ūhâ tsî ǀnam dab a o hoa ǃgomsigu tsî ǂhanuoǃnâsib tsîna nî ūbē. ǂGomǃgâ ǁkhā da ge a Elob di mîmâidi hoadi nē ǂkhanis tsoatsoas ǃnâ xoasa di nî īsa!  Nē mîmâide da ga ǂgomǃgâ ǂgao o, o da ge aibe Elob xa ǃnāsase nî ǂan.

14. Eloba mati ǀon hâ, tsî mati da a ǂan ǁÎb ǀonsa da nî sîsenūsa?

¹⁴ Khoe-i ǀkha du ga ǂangusa kuru ǂgao o, tae-e du ǁî-e ǂgurose nî mîba? Sadu ǀonsa. Eloba ǀonsa ū îb hâ? ǂGui ǂgomdi ge ǁîb ǀons a Elo tamas ka io ǃKhū ti ra mî, xawe nē ra ge ǀon tama ra. “Gaob” tamas ka io “presidenti” khami ra ge a ǂgaiǀon. Elob ge sada ge mîba ǁÎb ǀons a Jehova ti. Psalmdi 83:18 ge ra mî: “În ǂan, sats ǀguits, ǀons âts a ǃKhūts [“Jehovats,” NW] ǀguits, Hoan xa ǀGapisa, ǃhūbaib hoaragab ai.” Elobmîs xoa-aogu ge ǀoadisidi ǃnāde Elob ǀonsa gere sîsenū. Jehovab ge ǁÎb ǀonsa du nî ǂan tsî sîsenūsa ra ǂhâba. ǁÎb ge ra ǂhâba î du ǁîb di ǀhō kai, ǁnā-amagab ge ǁÎb ǀonsa ra mîba du.

15. Jehovab di ǀonsa tae-e ra ǂâibasen?

¹⁵ Elob ǀons Jehova di hâs ge ǃgam ǂâibasensa ūhâ. Nēs ge ra ǂâibasen Elob ge ǁÎb mîmâidi hoade a dīǀoaǀoa ǁkhā tsîb ge ǁÎb ǂâibasende  ra dīǀoaǀoa. ǀGui xū-i tsîn ge ǁÎba ǁkhae tide. Jehovab ǀguib ge nē ǀonsa anu hâ. *

16, 17. Nē ǂgaiǀonde tae-e ra ǂâibasen (a) “Hoaǀgaixab”? (b) “ǀAmosib Gao-aob”? (c) “Kuru-aob”?

¹⁶ Psalmdi 83:18 sada go khomai os ge koro mî Jehovab ǀguib: “Hoan xa ǀGapisa.” ǂHaiǂhais 15:3 tsîn ge ra mî: “Kai tsî buruburuxa gu ge sa sîsenga,  ǃKhūtse, Hoaǀgaixa Elotse; ǂhanu-ai tsî ama-ai gu ge sa daoga, ǃanun di Gao-aotse.” ǂGaiǀons “Hoaǀgaixa” di hâsa tae-e ra ǂâibasen? Nēs ge ra ǂâibasen Jehova Elob ge hoan xa ǃnā hâ ǀgaiba ūhâ. Tsî ǂgaiǀons “ǃanun di Gao-aotse” ti hâs [“ǀAmosib Gao-aob,” NW] ge ra ǂâibasen ǁÎb hoaǁae ûi hâsa. Psalmdi 90:2 ge ra mî ǁîb ǀamosiba xu ǀamosib kōse hâ ti. Buruburuxa tama i hâ!

¹⁷ Jehovab ǀguib ge a Kuru-ao. ǂHaiǂhais 4:11 ge ra mî: “Sats ǃKhūts ge a anu, ǂkhaisib tsî ǃgôasib tsî ǀgaib tsîna māhesa; sats ge hoana kuru xui-ao, tsî sa ǂâisa xun hâ tsîn ge kuruhe xui-ao.” Î, ǀhommi ǃnâ hâ ǀhomǃgāga xu tsoatsoa tsî ǀgamirodi, haidi ai ra kai ǂûn tsî hurib ǃnâ hâ ǁaun hoan—ge Jehovab xa kuruhe hâ!

18. Tae-i ǃaroman ǀnî khoena ra ǂâi ǁîn Elob ǀhō kai ǁoa ti? Elobmîsa tae-e ra mî nē i xa?

¹⁸ Jehovab di ǂoaǂamsa ǀgaugu xan ga khoena a khomai o, on ge ǁîna ra ǃao tsî ra ǂâi, ‘Elob ge kaise a ǀgaisa tsî a ǂoaǂamsa tsî kaises tsîna a ǃnū, amase tae-i xab ǁÎba tita nî tsâba?’ Xawe Eloba sada di nî tsâsa ra ǂhâba? Tātsēs tsîna. Jehovab ge sada ǀgūse ra hâ ǂgao. Elobmîs ge ra mî “mâ-i hoa-i âda xub kom ǃnūse hâ tamao.” (ǃNaeǃkhaidi 17:27) Elob ge sadu ǁÎba ǃoa nî ǀgūsa ra ǂhâba. ǁÎb ge ra mîmâi sadab nî “ǀgū” ti.—Jakobub 4:8.

19. (a) Mati du Elob ǀhō kai ǁkhā? (b) Mâ ǀgaugu Jehovab diga a ǃgâiba du?

¹⁹ Mati du a Elob ǀhō kai ǁkhā? Jesub ge ge mî: “Tsî nēb ge ǀamo ûiba, sats ǀguise ama-ai Elots, tsî sats ge sîb Jesub Xristub onan nî ǂan ǃkhaisa.” (Johaneb 17:3) ǁKhāǁkhāsen ǀgara re o du ge Jehovab tsî Jesub tsîna nî ǂan. O du ge ǀamo ûiba nî hō. Aiǁgause da ge ǀnai go ǁkhākhāsen “Elob ge a ǀnam” ti. (1 Johaneb 4:16) Xaweb ge ǁÎba ǀnî hâ îsa ǀgauga ūhâ. Elobmîs ge ra mî Jehovab a ‘ǀkhomxaǂgaoxa tsî ǀkhomxaǃnâ, ǃnūǃnâxa tsî ǃgâidīb tsî amab tsîkha ǃnâ a kaib.’ (Eksodus 34:6) Jehovab ge “ǃgâi tsî a” ǀûbaxa. (Psalmdi 86:5) Elob ge ǃnūǃnâxa tsî a ǂgomǂgomsa. (2 Petrub 3:9; ǂHaiǂhais 15:4) Sadu ge ǃnāsase ǁÎb di îsa ǀgaugu xa a ǁkhāǁkhāsen ǁkhā Elobmîsa du ga khomai o.

20-22. (a) Eloba du mû tama hâ xawe mati du ǁÎb ǀgūse a tsâ ǁkhā? (b) Tae-e du nî dī ǀnî khoen ga sado Elobmîs ǁkhāǁkhāsensa xu ǁkhae o?

²⁰ Eloba du mû tama hâ xawe mati du ǁÎb ǀgūse  a tsâ ǁkhā? (Johaneb 1:18; 4:24; 1 Timoteub 1:17) Elobmîs ǃnâ du ga Jehovab xa a khomai o, o du ge ǁÎba ama Khoe-i khami ra ǂan. (Psalmdi 27:4; Romeǁîn 1:20) Jehovab xa du ǃnāsase ra ǁkhāǁkhāsen khami du ge ǁÎba nî ǀnam tsî ǁîb ǀgūse nî tsâ.

²¹ Sadu ge nî ǁnâuǃā Jehovab a sada di ǁGû ǃkhaisa. (Mateub 6:9) ǁÎb ge sada ûiba ge mā tsî sada ǃgâi ûiba nî ūhâsa ra ǂhâba. Nēs ge ǀnamxaǃnâ ǁgûb ǀgôana ra ǁkhoreba xū-e. (Psalmdi 36:9) Elobmîs ge ra ǁkhāǁkhā Jehovab ǀhō kai ǁkhā du asa. (Jakobub 2:23) ǂÂi re. Jehovab ǀhommi tsî ǃhūbaib di kuru-aob ge sadu nî ǁÎb ǀhō kai sa ra ǂgao!

²² ǀNî khoen ge nî ǂhâba î du Elobmîsa ǁkhāǁkhāsen ǀû. ǁÎn ge nî ǃao sadu, sadu ǂgomsa xu nî ǂoasa. Xawe tā ǀgui khoe-i tsîna mā-am sado ǁkhaesa Jehovab ǀkha ǀhōsagusa xu. ǁÎb ge a ǃgâi ǀHōsa ǁÎb ǀguiba du a ūhâ ǁkhāba.

23, 24. (a) Tae-i ǃaroma du dîna nî dî? (b) Tae-e da sao ra danaǃâs ǃnâ nî ǃhoaǃgao?

²³ Elobmîsa du ra ǁkhāǁkhāsen xawe du ge ǀnî xūna ǁnâuǃā tide. Tā tao re dîna dîsa tamas ka io huiba ǂgansa. Jesub ge ge mî, î da ǀgôaron khami ǃgamǃgamsen. (Mateub 18:2-4) ǀGôaron ge ǂgui dîna ra dî. Elob ge ǂgao hâ î du ǃereamde hō. ǁNā-amaga Elobmîsa ǂōrisase ǁkhāǁkhāsen re î du ǂan amaba du ra ǁkhāǁkhāsensa.—Khomai re ǃNaeǃkhaidi 17:11.

²⁴ ǃGâi ǀgaub Jehovab xa ǁkhāǁkhāsens dib ge Elobmîsa ǁkhāǁkhāsensa. Sao ra danaǃâs ǃnâ da ge nî mû mati i ios Elobmîsa nau ǂkhanin xa a ǀkhara ǃkhaisa.