Hanaihanai oi ese Dina Ta Ta Baibul Baita Herevalaia buklet ai dina ena siri bona koment o duahia, a? Bema lasi, hanaihanai unu ba kara toma na namo. Momo ese dina sirina na daba matanai e duahiamu, unu amo dina ibounai lalonai una bae lalohadailaia diba. (Ios 1:8; Sa 119:97) Baibul sirina ese oi be ede ma baine durumu toma? Una siri e abia karoa ibounai na Baibul ai ba duahia diba. Bona una Baibul sivaraina ena hahekau herevana ba lalohadailaia toho. Bena una hahekau herevana na emu mauri ai ba badinaia. Dirava ena Hereva ese be durumumu neganai, oi na abi hidi maorodia bo karamu bona emu mauri na be namomu.​—⁠Sa 119:105.

Tanobada heḡeḡemadai, Bethel family iboudiai na daba ai dina sirina e herevalaiamu. Vanegai laḡanidia lalodiai, idia haida na JW Broadcasting^® ai e ato (vidio bavabia gabuna: PROGRAMS & EVENTS). Una vidio ta vada o itaia, a? Reana idia haida ese e durumu. Heḡereḡere, o laloamu Lot sivaraina ese oi be ede baine durumu toma, unu amo abia hidi maorodia ba kara?

VIDIO LADANA, TANOBADA NA BASIO URA HENIA (1IO 2:15) BA ITAIA, UNA MURINAI INI HENANADAI BA HAERELAIDIA:

• Ina Daba Ena Tomadiho program lalonai eme herevalaia Baibul ena hahekau hereva badana be dahaka?

• Tanobada na basio ura henia bona tanobada ḡaudia danu basio ura heni​—⁠una be Lot sivaraina ese ede eme hahedinaraia toma?​—⁠Ge 13:12; 14:12; 19:3, 12, 13, 24-26

• Edena dala ai baita hahedinaraia ita na Iehova sibona mo ta lalokau heniamu, a dia tanobada bona ia lalona ḡaudia?