BA GIMA!
World Cup ese Taunimanima be Hatamonadiamu, A?—Baibul be Dahaka E Gwaumu?
Taunimanima 5 bilion mai kahana na e ura November 20 ela December 18, 2022 ai bae heabi FIFA World Cup bae itaia. Momo e lalomu taunimanima ese unu spot gadaradia bae ita neganai, baine hatamonadia.
“Spot gadara na mai siahuna tanobada be haidauamu. Bona taunimanima lalodia e verimu spot ai bae vareai. Danu, spot gadara na mai siahuna dala idauidau ai taunimanima e hatamonadiamu.”—Nelson Mandela, South Africa edia presiden gunana.
“Football gadara ese taunimanima e hatamonadiamu badina e mamiamu edia ura ḡaudia bona bae kara ḡaudia na tamona.”—Gianni Infantino, FIFA edia presiden. a
World Cup eiava spot gadara ma haida ese unu ḡaudia baine haḡuḡuru dibamu, a? Maino bona lalotamona baine vara diba, a?
Spot gadara ese taunimanima be hatamonadiamu, a?
Ina laḡani World Cup gadarana ese ḡau ma haida e havara danu. Una gadara dainai taunimanima na bese padadiai bona politikol hepapahuahudia e herevalai, heḡereḡere taunimanima edia maoro, bese heinai hehenimu karadia, bona moni hekwakwanaidia.
Ena be unu e vara toma, to taunimanima momo e gwaumu tanobada heḡeḡemadai spot gadaradia heḡereḡere World Cup iraraina karana ese moale e havaraiamu. Herevana taunimanima na unu e lalo tomamu, to unu gadara idauidau ese idia na basie hatamonadia dibamu. Danu, idia ese haheparara karadia e hahedinaraimu bona kara unu bamodia na Baibul ese e gwauraia “dina gabedia” toana.—2 Timoteo 3:1-5.
Tanobada ai lalotamona karana na be varamu
Baibul ese tanobada heḡeḡemadai ai be varamu lalotamona karana e herevalaiamu. Bona e gwauhamata tanobada ai taunimanima iboudiai na guba gavamanina ladana “Dirava ena basileia” henunai lalotamona ai bae noho.—Luka 4:43; Mataio 6:10.
Una Basileia ena King, Iesu Keriso, ese tanobada heḡeḡemadai maino be havaraiamu. Baibul na e gwa:
“Kara maoromaoro baine tubu, maino danu baine bada.”—Salamo 72:7.
“E dabumu tauna e boiboimu negana ai ia ese e hamauriamu . . . Daḡedaḡe bona ala-ala amo ia ese edia mauri e rauadiamu.”—Salamo 72:12, 14.
Hari ina negai, Iesu ena hahediba herevadia ese tano 239 ai taunimanima milion e hatamonadiamu. Ta ta heinai heheni karana e dadaraia. Diba ma haida bavabi totona, atikol ladana “Breaking the Cycle of Hatred” ba duahia.
a Fédération Internationale de Football Association, the international governing body for association football (soccer).
You May Also Like
ABOUT US
Ta Ba Noia Oi Bae Vadivadimu
Baibul ese e haerelaimu henanadaina ta ba herevalaia, eiava Iehova ena Witnes ediai diba ma haida bavabi.