Khawvêl pumah politics kaihhnawih tharum thawhna a hluar hle.

•   Kum 2023-2024 atâna Mexico ram inthlanpui boruakah tharum thawhna chi hrang hrang a thlen bâkah, party candidate 39 lai thah an ni a. Chu chu politics kaihhnawih tualthahna thlen tam ber ṭum a ni. Chu chuan a ram mipuite a ṭhâwng nasa hle.

•   Kum 2024, May 15-a Slovakia ram prime minister thah tumna pawh tiamin, European ramahte chuan politics kaih hnawiha tharum thawhna a thleng zing hle.

•   Kum 2024, September 15-a tûn hmaa U.S. president lo ni tawh, Donald Trump-a a vawi hnihna atâna thah tumna chuan a ram mipuite a timangang hle.

 Engvângin nge politics kaihhnawih tharum thawhna hi a thlen nasat êm êm? A tâwp ngai ang em? Bible-in eng nge a sawi?

Politics Avânga Inṭhen Darhna Thleng Tûr Hrilh Lâwk A Ni

 Bible chuan ‘ni hnuhnûngte’ tia a koh, tûn kan hunah hian mite chuan tharum thawhna leh inrem lohna awmtîrtu miziate an lantîr ang tih a sawi lâwk a ni.

•   “Ni hnuhnûngahte chuan hun khirh takte a lo awm ang. Mi, . . . lâwm nachâng hre lo te, thianghlim lo te, . . . huaikawmbâwl te, . . . mi kawlhsen te, . . . vervêk te, thuhnudâwn lo te, inngaihlu te, . . . an ni dâwn si.”—2 Timothea 3:1-4.

 Bible chuan kan hunah hian sawrkâr laka helnate leh politics thila buainate a thlen nasat tûr thu a sawi lâwk bawk. (Luka 21:9) Mahse, politics kaihhnawih tharum thawhna leh inṭhen darhna hi a awm reng lo vang.

Politics kaihhnawih tharum thawhna awm tawh loh hun

 Bible chuan Pathianin mihring sawrkârna zawng zawng hi a vân sawrkârnain a rawn thlâk dâwn tih a sawi.

•   “Vân Pathianin ram a rawn din ang a, . . . hêng ram zawng zawngte hi a tikeh sawmin a tiral zâwk ang a, kumkhuain a ding reng ang.”—Daniela 2:44.

 Pathian Ram chuan mite chu a inpumkhattîrin, khawvêl pumah remna a awmtîr ang.

•   Pathian Rama Rorêltu, Isua Krista chu “Remna Lal” tia koh a ni a, “remnain tâwpintai” a neih lohna tûrin ro a rêl ang.—Isaia 9:6, 7.

•   Tûnah ngei pawh, a ram khua leh tuite chuan inrem taka awmho dân an zir a. Chuvângin, Bible chuan: “An khandaihte chu leilehna hmâwr zumahte an chher ang a, an feite chu theikûng ahchhumna chem kawmahte an chher ang: hnam dangin hnam dang chungah khandaih an lek tawh lo vang a, indo dân pawh an zir tawh hek lo vang,” tiin a sawi a ni.—Isaia 2:3, 4.

 Hriat belh nân, “What Will God’s Kingdom Accomplish?” tih thuziak hi chhiar la, Pathian Ram Chu Eng Nge Ni? tih video hi en bawk rawh.