Yezu uvua muenze malu a bungi dituku divuaye mupitshishe ne bayidi bende banayi mu Kapênuma. Dilolo, bena mu Kapênuma bakamutuadila babedi babu bua abondope. Yezu kavua ne dîba dia bungi dia kusomba nkayende to.

Mpindieu, mu dinda dia dituku diakalonda, patshivua panshi pafiike, Yezu wakajuka, kupatukaye pambelu nkayende. Ke kumonaye muaba uvua kawuyi bantu uvuaye mua kusambila Tatu wende pa nkayende. Kadi Yezu kavua mushale nkayende mutantshi mule to. Pavua “Simona ne bavua nende” bajingulule ne: kavuaku, bakatuadija kumukeba. Petelo ke uvua pamuapa ubalombola bualu Yezu uvua mutudile kuende.​—Mâko 1:36; Luka 4:38.

Pakapetabu Yezu, Petelo wakamba ne: “Bantu bonso badi bakukeba.” (Mâko 1:37) Bulelela, bena mu Kapênuma bavua basue bua Yezu ashale nabu. Bavua bushuwa banyishe malu avuaye muenze, ke bualu kayi bakakeba “kumupangisha mua kumbuka kudibu.” (Luka 4:42) Kadi, Yezu uvuaku mulue pa buloba anu bua kuondopa bantu mu tshishima anyi? Uvua ne bua kuenzela mudimu wende anu mu tshimenga etshi anyi? Yeye wakamba tshinyi bua bualu ebu?

Yezu wakandamuna bayidi bende ne: “Tuyayi muaba mukuabu, mu bimenga bidi pabuipi apa, bua mmone mua kuyishamu kabidi, bualu ke tshindi muluile.” Yezu wakambila too ne bantu bavua basue bua ashale nabu ne: “Ndi kabidi ne bua kumanyisha lumu luimpe lua Bukalenge bua Nzambi kudi bimenga bikuabu, bualu mvua mutumibue bua bualu ebu.”​—Mâko 1:38; Luka 4:43.

Bushuwa, Yezu uvua mulue pa buloba nangananga bua kuyisha bua Bukalenge bua Nzambi. Bukalenge abu nebuvuije dîna dia Tatu wende dia tshijila, ne nebujikije masama onso bua kashidi. Pavua Yezu muondope bantu mu tshishima, uvua muleje ne: Nzambi ke uvua mumutume. Bia muomumue, bidimu nkama ya bungi kumpala, Mose wakenza malu a kukema bua kufila bijadiki bivua bileja ne: uvua mutumibue kudi Nzambi.​—Ekesode 4:1-9, 30, 31.

Nunku Yezu wakumbuka mu Kapênuma bua kuya kuyisha mu bimenga bikuabu, ne bayidi bende banayi bakaya nende. Bayidi banayi aba ke Petelo ne muanabu Andele, Yone ne muanabu Yakobo. Lumingu lumue kumpala, Yezu uvua mubabikile bua kuenzabu nende luendu luende lua kumpala.

Dinyunguluka dia Yezu ne bayidi banayi abu mu Galela wenda uyisha divua dipatule bipeta bimpe be! Bushuwa, lumu lua bualu bua Yezu luakatangalaka eku ne kuaka. “Lumu luende luakatangalaka mu Sulia mujima,” mu tshitupa tshia bimenga 10 tshivuabu babikila ne: Dekapoli, too ne dia muamua dia musulu wa Yadene. (Matayi 4:24, 25) Misumba minene ya bantu ba miaba eyi, too ne ba mu Yudaya, bavua balonda Yezu ne bayidi bende. Bantu ba bungi bakamutuadila bantu bavua dijinga ne luondapu. Yezu kavua ubela mâyi ku makasa to, uvua wondopa babedi ne wipata nyuma mibi kudi bavuabu bakuate kudi bademon.