DILONGESHA DIA 87
Yezu udi wenza Pasaka wa ndekelu
Bena Yuda bavua benza Pasaka tshidimu tshionso mu dituku dia 14 dia ngondo wa Nisana. Bualu ebu buvua bubavuluija muvua Yehowa mubumbushe mu bupika mu Ejipitu muye nabu mu Buloba Bulaya. Mu tshidimu tshia 33 panyima pa Yezu, Yezu ne bapostolo bende bakadiila Pasaka mu nzubu kampanda wa kuulu mu Yelushalema. Pakavuabu bakeba kujikija kudia, Yezu wakamba ne: ‘Umue wa kunudi neantungile tshitungu.’ Bualu ebu buakatonda bapostolo bikole, kukonkabu Yezu ne: ‘Nnganyi au?’ Yezu wakamba ne: ‘Mmuntu undi mpesha diampa edi.’ Pashishe wakapesha Yudasa Isakaliote tshipese tshia diampa. Yudasa wakajuka diakamue, kupatukaye mu nzubu amu.
Pashishe Yezu wakenza disambila, kutshibulaye diampa divua dishale adi bitupa bitupa, kudipeshaye bapostolo bavua bashale. Kuambaye ne: ‘Diayi diampa edi. Didi dileja mubidi wanyi ungafila buenu nuenu.’ Wakalua kuenza kabidi disambila bua mvinyo, kumupeshaye bapostolo bende. Kuambaye ne: ‘Nuayi mvinyo eu. Udi uleja mashi anyi angafila bua dibuikidibua dia mpekatu. Ndi nnulaya ne: nenuikale bakalenge pamue nanyi mu diulu. Ikalayi nuenza nunku tshidimu tshionso bua kumvuluka.’ Bayidi ba Yezu batshitu anu badisangisha dilolo dia buena adi tshidimu tshionso. Bakadi babikila tshisangilu atshi lelu ne: Didia dia dilolo dia Mukalenge.
Panyima pa didia adi, bapostolo bakakokangana bua kumanya uvua munene kupita bakuabu. Kadi Yezu wakabambila ne: ‘Muntu udi munene munkatshi muenu ngudi udimona mushadile ku bonso, udi ne mushinga mukese ku bonso.
‘Nuenu nudi balunda banyi. Ndi nnuambila malu onso adi Tatu wanyi musue bua nnuambile. Nkadi pa kuya mu diulu kudi Tatu wanyi. Nuenu nenushale, ne bantu nebamanye ne: nudi bayidi banyi ku dinanga dinuikala banangangana nadi. Nudi ne bua kunangangana anu bu mundi mununange.’
Bua kujikija, Yezu wakasambila, ulomba Yehowa bua alame bayidi bonso. Wakalomba Yehowa bua abambuluishe bua benze mudimu pamue mu ditalala. Wakasambila bua dîna dia Yehowa dijidibue. Pashishe Yezu ne bapostolo bende bakatumbisha Yehowa ne misambu, bobu kupatuka. Dîba dia kukuatabu Yezu dikavua disemene.
“Kanutshinyi, kasumbu kakese ka mikoko, bualu Tatu wenu mmuanyishe bua kunupesha Bukalenge.”—Luka 12:32
Mona bikuabu:
YEZU UDI NJILA NE BULELELA NE MUOYO
Didia dia Mukalenge
Yezu ubanjija tshivulukilu tshidi bayidi bende ne bua kuenza tshidimu tshionso mu dituku dia 14 ngondo wa Nisana.
YEZU UDI NJILA NE BULELELA NE MUOYO
Yezu udi ulongesha budipuekeshi mu Pasaka wende wa ndekelu
Udi ukemesha bapostolo bende bua mudiye muenze mudimu wa mupika.
YEZU UDI NJILA NE BULELELA NE MUOYO
Disambila dia Yezu dia ndekelu mu nzubu wa kuulu
Wakaleja patoke ne: uvua mukumbaje bualu bua mushinga mukole menemene kupita kupesha bantu lupandu.
NKONKO ITU BANTU BATAMBA KUELA
Bua tshinyi Bantemu ba Yehowa batu benza Didia dia Mukalenge dishilangane ne dia bitendelelu bikuabu?
Batu badibikila kabidi ne: Didia dia dilolo dia ndekelu anyi Tshivulukilu; ntshibilu tshia tshijila tshitambe bunene kudi Bantemu ba Yehowa. Mona malu adi Bible wamba bua tshibilu etshi.
