TSHINKABI ne: udi mu buatu budi buenda budina. Neujinge bua muntu alue kukupandishaku anyi?​— Kadi nebikale bishi bikala muntu kampanda mufile muoyo wende bua kukupandisha?​— Bulelela, ke tshivua Yezu Kristo muenze. Anu mutuvua bamone mu nshapita wa 37, wakafila muoyo wende bu tshintu tshiakupikulangana natshi bua kutupandisha.

Yezu kêna utupandisha ku lufu lua mu mâyi to. Udi muvuluke ne: udi utupandisha ku malu kayi?​— Ku mpekatu ne ku lufu bituvua tuetu bonso bapiane kudi Adama. Nansha mudi bantu bakuabu benze malu mabi menemene, Yezu mmubafuile pabu. Udi mua kuitaba bua kujimija muoyo webe bua kupandisha bantu ba mushindu au anyi?​—

Bible udi wamba ne: ‘Budi bualu bukole bua muntu kufuila anu muntu muakane, kadi bumue mukuabu neitabuje [bua] kufuila muntu muimpe wa bushuwa.’ Kadi udi wamba kabidi ne: Yezu “wakafuila bantu babi,” kufuila kabidi ne bantu badi kabayi nansha benzela Nzambi mudimu! Bible udi wamba kabidi ne: ‘Patutshivua bantu babi [tutshienza malu mabi], Kristo wakatufuila.’​—Lomo 5:6-8.

Udi mumanye mupostolo uvua muenze malu mabi menemene kumpala kua kuluaye mupostolo anyi?​— Mupostolo au wakafunda ne: ‘Kristo Yezu wakaluila pa buloba bua kusungilaye bantu babi, bandi kumpala kuabu ku bubi.’ Mupostolo Paulo ke wakamba bualu abu. Wakamba ne: kuvua tshikondo tshivuaye ‘mupote’ ne se: uvua wendela ‘mu bubi.’​—1 Timote 1:15; Tito 3:3.

Elabi meji bungi bua dinanga divua nadi Nzambi divua dimufikishe too ne bua kutumaye Muanende bua alue kufua bua bantu badi benza  malu mabi! Angataku Bible webe ubale bualu ebu mu Yone nshapita 3, mvese wa 16. Mvese eu udi wamba ne: ‘Bualu bua Nzambi wakatamba kusua ba pa buloba, yeye wakabapa Muanende umuepele mulela bua muntu yonso wamuitabuja kafu, kadi ikale ne muoyo wa tshiendelele.’

Yezu wakaleja ne: uvua mutunange ne dinanga dia muomumue divua Tatuende mutunange nadi. Imue misangu udi mua kuvuluka ne: mu nshapita wa 30 wa mukanda eu tuvua babale amue malu akafikila Yezu pakakengaye butuku buvuabu bamukuate. Bakaya nende ku nzubu kua Muakuidi Munene Kayifa, kuakamulumbuluishabu. Bakakeba bantemu ba mafi, buobu kushiminyina Yezu malu, ne bantu bakamututa mankomo. Ke dîba divua Petelo muvile ne: kavua mumanye Yezu to. Mpindieu tuanji tuenze anu bu se: tudi muaba au ne tudi mua kumona malu makuabu adi enzeka.

Budi butshia. Yezu mmutshishile kulu. Bu muvuabu bamulumbuluishe butuku kabayi balonde mikenji, bakuidi badi babueja tshipangu tshia bena Sanedren, peshi kabadi kanene ka bena Yuda, ne badi bamulumbuluisha kabidi. Badi kabidi babanda Yezu ne: mmubunde tshibawu kudi Nzambi.

Pashishe bakuidi badi basuika Yezu mionji baya nende kudi Pilato, ngovene wa bena Lomo. Badi bambila Pilato ne: ‘Yezu udi uluisha mbulamatadi. Udi ne bua kufua.’ Kadi Pilato udi umona ne: bakuidi badi bashima. Nunku udi ubambila ne: ‘Tshiena musangane bualu bubi kudi muntu eu. Ndi mmulekela aye.’ Kadi bakuidi ne bantu bakuabu badi bela mbila ne: ‘Too! Mushipe!’

Kunyima, Pilato udi kabidi ukeba bua kuambila bantu ne: udi ulekela Yezu. Kadi bakuidi badi basaka musumba wa bantu bua kuela mbila ne: ‘Wewe mumulekele, udi pebe uluisha mbulamatadi! Mushipe!’ Bantu badi babangisha kuenza mutoyi wa bungi. Udi mumanye tshidi Pilato wenza anyi?​—

Udi uteketa. Tshia kumpala udi ututshisha Yezu bikole. Pashishe udi umufila mu bianza bia basalayi bua buobu kumushipa. Badi bavuadika  Yezu tshifulu tshia meba ne batuadija kumuseka benda binama kumpala kuende. Pashishe badi bapesha Yezu mutshi munene bua kuambulaye ne badi baya nende pambelu pa tshimenga mu muaba udibu babikila ne: Muaba wa Kabalubalu ka Mutu. Kuine aku badi bapopela bianza ne makasa a Yezu ku mutshi. Pashishe badi bajula bimanyika mutshi eu. Mashi adi apueka. Udi umvua bimusama bikole.

Yezu kêna ufua diakamue to. Udi anu ku mutshi aku. Bamfumu ba bakuidi badi bamuseka. Ne bapitshi ba mu njila badi bamba ne: “Biwikala muana wa Nzambi, utuluke ku mutshi.” Kadi Yezu mmumanye tshivua Tatuende mumutumine bua kuenza. Mmumanye ne: udi ne bua kufila muoyo wende mupuangane bua tumone mua kuikala ne muoyo wa kashidi. Ndekelu  wa bionso, bu pa dîba isatu janjanja dilolo adi, Yezu udi wela lubila kudi Tatuende ne ufua.​—Matayo 26:36–27:50; Mâko 15:1; Luka 22:39–23:46; Yone 18:1–19:30.

Yezu uvua mushilangane bikole ne Adama! Adama kavua munange Nzambi to. Wakabenga kutumikila Nzambi. Adama kavua mutunange nansha tuetu to. Bu muakenzaye mpekatu, tuetu bonso tudi baledibue mu mpekatu. Kadi Yezu uvua munange Nzambi mutunange ne tuetu kabidi. Uvua anu utumikila Nzambi. Nenku wakafila muoyo wende bua kumusha bubi buvua Adama mutuenzele.

Udiku wanyisha bualu bua mushinga mukole ebu buvua Yezu muenze anyi?​— Pautu usambila Nzambi, utuku umuela tuasakidila bua muvuaye mutupeshe Muanende anyi?​— Mupostolo Paulo wakanyisha tshivua Yezu mumuenzele. Paulo wakafunda ne: Muana wa Nzambi ‘Wakannanga ne wakadifila bua bualu buanyi.’ (Galatia 2:20) Yezu uvua mufue buebe wewe ne buanyi kabidi. Wakafila muoyo wende mupuangane bua tupete muoyo wa kashidi! Bushuwa ebu ke bualu bunene budi ne bua kutusaka bua kunanga Yezu.

Mupostolo Paulo wakafundila bena Kristo ba mu tshimenga tshia Kolinto ne: ‘Dinanga dia Kristo didi dituenzeja.’ Dinanga dia Kristo didi ne bua kutusaka bua kuikala ne bienzedi bia mushindu kayi? Udi wela meji kayi?​— Tangila diandamuna dia Paulo: ‘[Kristo] uvua mufuile bantu bonso bua bantu batshidi ne muoyo kabakebi kabidi bidi bibalengelela bobu, kadi bakebe bidi bilengelela udi mabafuile.’​—2 Kolinto 5:14, 15, MMM.

 Udiku mua kuela meji ku mishindu iudi mua kuleja ne: udi ne muoyo bua kusankisha Kristo anyi?​— Mushindu umue ng’wa kuambila bakuabu biukadi mulonge pa bidi bitangila Yezu. Anyi ela meji pa bualu ebu: Udi nkayebe kuenu, mama webe ne papa webe kabena mua kumona tshiudi wenza to, nansha muntu mukuabu kêna mua kukumona to. Neutangile malu adibu baleja ku televizion anyi bintu bikuabu biudi mumanye ne: kabiakusankisha Yezu anyi?​— Vuluka ne: Yezu udi mpindieu ne muoyo ne udi mua kumona malu onso atudi tuenza!

Bualu bukuabu budi mua kutusaka bua kunanga Yezu mbua ne: tudi basue kuidikija Yehowa. Yezu wakamba ne: ‘Tatu mmunnange.’ Udi mumanye bua tshinyi Tatu mmunange Yezu ne kabidi bua tshinyi tudi ne bua kumunanga petu anyi?​— Bualu Yezu uvua muanyishe bua kufua bua disua dia Nzambi dienzeke. (Yone 10:17) Nenku tuenzayi tshidi Bible utuambila ne: ‘Nuidikije kuenza mudi Nzambi wenza, bu bana bende bananga. Nuende penu mu [dinanga bu muakanunanga] Kristo, wakadifila bua bualu buetu.’​—Efeso 5:1, 2.