Anu mudi foto udi ku dia balume uleja, bantu ba bungi badi bela meji ne: mu Dituku dia dilumbuluisha miliyo ya bantu neyimane kumpala kua nkuasa wa butumbi wa Nzambi bua kubalumbuluisha bilondeshile malu avuabu benze kale. Bamue nebapete difutu dia muoyo mu diulu, bakuabu nebaboshe mu iferno. Kadi Bible udi uleja ne: kipatshila ka Dituku dia dilumbuluisha edi nka kusungila bantu ku malu mabi a kansungasunga. (Musambu 96:13) Nzambi mmusungule Yezu bua kuikalaye Mulumbuluishi watuadila bantu buakane.​—Bala Yeshaya 11:1-5; Bienzedi 17:31.

Pavua Adama muntu wa kumpala mutombokele Nzambi ku budisuile, wakatuadila bana bende bonso bubi, makenga ne lufu. (Lomo 5:12) Bua kulongolola bualu bubi ebu, Yezu neajule bantu ba bungi ku lufu. Mukanda wa Buakabuluibua udi uleja ne: malu aa neenzeke mu tshikondo tshia bukokeshi bua Kristo Yezu bua bidimu tshinunu.​—Bala Buakabuluibua 20:4, 11, 12.

Kabakulumbuluisha bantu babishibua ku lufu bua malu avuabu benze kumpala kua kufuabu to, kadi nebabalumbuluishe bua malu enzabu pikalabu bamane kusokolola malu adi mu “mivungu” idibu batele mu Buakabuluibua nshapita wa 20. (Lomo 6:7) Mupostolo Paulo wakamba ne: mukantshi mua bantu babishabu ku lufu ne bapeta mushindu wa kulonga malu adi atangila Nzambi, nemuikale “bantu bakane ne badi kabayi bakane.”​—Bala Bienzedi 24:15.

Bantu bavua bafue kabayi bamanye Yehowa Nzambi ne bamuenzele mudimu nebapete mpunga wa kushintulula nsombelu wabu ne kuenza malu mimpe. Bobu benze nunku, dibika diabu dia ku lufu nedikale “dibika dia muoyo.” Kadi bamue ba ku bantu bajulabu ku lufu nebabenge kulonga malu adi atangila Yehowa. Dibika diabu nedikale “dibika dia dilumbuluishibua.”​—Bala Yone 5:28, 29; Yeshaya 26:10; 65:20.

Ku ndekelu kua bidimu tshinunu bia Dituku dia dilumbuluisha, Yehowa neikale mumane kupingaja bantu ku bupuangane buvuabu nabu ku tshibangidilu. (1 Kolinto 15:24-28) Nditekemena dimpe ditambe bua aba bonso badi batumikila mikenji ya Yehowa! Mu diteta dia ndekelu, Nzambi neapatule Satana Diabolo mu tshina tshidi katshiyi ne ndekelu muvuabu bamuele bua bidimu tshinunu. Satana neatete kabidi mua kupambuisha bantu mu njila ya Yehowa, kadi bantu babenga kutumikila Satana nebapete muoyo wa tshiendelele pa buloba.​—Bala Yeshaya 25:8; Buakabuluibua 20:7-9.

Bible udi kabidi wakula bua “dituku dia dilumbuluisha” bua kuleja malu ikala ne bua kuenzeka bua kufikisha ndongoluelu wa malu eu ku ndekelu kuende. Dituku dia dilumbuluisha edi nedilue mu tshimpitshimpi anu muvua Mvula wa kabutu wa mu matuku a Nowa mulue, ne mubutule bantu babi ba tshikondo atshi. Diakalenga, dibutuka dia “bantu babi” nedilongolole njila bua bulongolodi bupiabupia bua pa buloba “muikala buakane.”​—Bala 2 Petelo 3:6, 7, 13.