Bua tshinyi Muteleji wa masambila mmulekele makenga?

NANSHA mudi bamue bantu mua kuikala basambila, kabena bitaba ne: Nzambi udiku. Bua tshinyi badi bela mpata? Pamuapa bualu badi bamona makenga a bungi pa buloba. Kutuku muanji kudiebeja bua tshinyi Nzambi mmulekele makenga anyi?

Nzambi uvuaku mufuke bantu mushindu udibu lelu bapange bupuangane ne bakenga anyi? Kabivua mua kuikala bipepele bua tuetu kunemeka nzambi uvua mua kuikala mulongoluele bantu makenga to. Fuanyikija ne: udi ubandila mashinyi mapiamapia ne disanka dionso, kadi umona ne: luseke ludi mmuenu ndunyanguke, newambe ne: ke muvua muenawu mueenze anyi? Tòo! Newambe ne: muenawu uvua mueenze bimpe menemene kadi mbaanyange kudi muntu anyi tshintu kampanda.

Bia muomumue, patudi tutangila bulongame budi mu bintu bidi Yehowa mufuke mu diulu ne pa buloba, ne pashishe tumona makenga ne malu mabi bitatshisha bantu, tudi mua kuamba tshinyi? Bible udi ulongesha ne: Nzambi uvua mufuke mulume ne mukaji ba kumpala bapuangane, kadi bakadinyanga nkayabu. (Dutelonome 32:4, 5) Bualu budi busankisha mbua se: Nzambi mmulaye bua kuakaja malu, mmumue ne: kuvuija bantu badi bamutumikila bapuangane. Kadi bua tshinyi mmuindile mutantshi bule nunku?

Bua tshinyi mutantshi bule nunku?

Tshilumbu ntshia kumanya nganyi udi ne bua kukokesha bukua bantu. Yehowa kavua mulongolole bua bantu badilombole nansha kakese. Yeye ke uvua ne bua kuikala Mulombodi wabu. Bible udi wamba ne: ‘Muntu kena ne bukole munda muende bua kuendesha nabu biendedi biende bimpe.’ (Yelemiya 10:23) Bia dibungama, baledi betu ba  kumpala bakasungula bua kutombokela bulombodi bua Nzambi. Dibenga kutumikila diabu dia mikenji diakabavuija bena mibi. (1 Yone 3:4) Bua bualu ebu bakajimija bupuangane buabu ne kudikebelabu buobu ne ndelanganyi yabu ntatu.

Kukadi bidimu binunu ne binunu bidi Yehowa mulekele bantu badilombola, ne malu akadi menzeke adi aleja ne: bantu kabena mua kudilombola to. Mbimueneke patoke ne: mbulamatadi yonso ya bantu idi ibatuadila anu makenga. Kakuena mbulamatadi nansha umue ukadi mujikije mvita, dishipangana, malu a kansungasunga anyi masama to.

Mmunyi mumbusha Nzambi malu mabi?

Bible udi ulaya ne: mu katupa kîpi emu Nzambi neatutuadile buloba bupiabupia bua buakane. (2 Petelo 3:13) Anu bantu bavua bakuate mudimu bimpe ne budikadidi buabu bua kudisunguila malu bua kunanga bakuabu ne kunanga Nzambi ke bapiana buloba ebu.​—Dutelonome 30:15, 16, 19, 20.

Bible udi wamba kabidi ne: mu “dituku dia dilumbuluisha” dikadi disemene pabuipi, Nzambi neumbushe makenga onso ne neabutule badi baakebesha. (2 Petelo 3:7) Pashishe, Yezu Kristo Mukokeshi udi Nzambi musungule neakokeshe bantu badi batumikila. (Danyele 7:13, 14) Mmalu kayi enza Yezu mu bukokeshi buende? Bible udi wamba ne: ‘Badi ne mitshima mipuekele nebapiane buloba, mioyo yabu neyisanke mu ditalala dikumbane.’​—Musambu 37:11.

Bu mudiye Mukalenge wa mu diulu, Yezu neumbushe malu mabi, masama, bukulakaje, ne lufu bivua bantu bakebeshe pavuabu batombokele Yehowa ‘mpokolo wa muoyo.’ (Musambu 36:9, NW) Yezu newondope aba bonso badi bitaba bukokeshi buende bua dinanga. Mu  bukokeshi buende, milayi ya mu Bible idi ilonda eyi neyikumbane:

◼ ‘Muena musoko kena wamba ne: ‘Ndi ne disama, bantu badi bashikamemu nebikale ne mibi yabu mijimijibue.’​—Yeshaya 33:24.

◼ “[Nzambi] neakupule tshinsonji tshionso ku mêsu kuabu, ne lufu kaluakuikalaku kabidi, nansha madilu, nansha miadi, nansha bisama kabiakuikalaku kabidi. Malu a kale ajiminyi.”​—Buakabuluibua 21:4.

Kabienaku bitukolesha patudi tumanya ne: mu katupa kîpi emu Nzambi neakumbaje dilaya diende dia kumbusha makenga onso anyi? Nunku, tuikale anu ne dieyemena dia ne: udi uteleja masambila etu nansha mudiye mulekele makenga.

Nzambi udiku. Udi mua kukuteleja, nansha paudi umuambila malu adi akutonda ne ntatu yebe. Udi ne dijinga dikole dia kukumona ne disanka tshikondo tshiajika mpata yebe yonso ne ntatu yebe.