Nzambi utu ne dîna anyi?
Nzambi utu ne dîna anyi?
Mutu ba bungi bandamuna:
▪ “Diende si nNzambi anyi Mvidi Mukulu.”
▪ “Katu ne dîna dimue disunguluke to.”
Kadi Yezu pende wakamba tshinyi?
▪ ‘Nutendelele Nzambi nunku: Tatu wetu udi mu diulu, banemeke dîna diebe.’ (Matayo 6:9) Nanku Yezu uvua mumanye ne: Nzambi utu ne dîna.
▪ ‘Ngakubamanyisha dîna diebe, nembamanyishedi kabidi, bua dinanga diwakunnanga nadi meme kuikaladi munda muabu, ne meme munda muabu.’ (Yone 17:26) Yezu wakamanyisha bantu dîna dia Nzambi.
▪ ‘Kanuena nuntangila too ne panuamba ne: Udi ulua mu dîna dia Mukalenge atumbishibue.’ (Luka 13:35; Musambu 118:26) Yezu uvua ubikila Nzambi mu dîna diende.
NZAMBI nkayende ngudi utuambila dîna diende. Bible udi wamba mudi Nzambi wamba ne: “Meme ndi Yehowa, adi ndina dianyi.” * (Yeshaya 42:8) Dîna dia Yehowa edi ntshibikidilu tshia mu Tshiluba tshia dîna dia Nzambi dia mu tshiena Ebelu divuaye mudinyike tshitu tshimanyike bikole. Bidi mua kukukemesha bua kumvua ne: dîna edi dia pa buadi dia mu tshiena Ebelu didi mu mivungu ya Bible ya kale misangu binunu bivule. Mu kuamba kuimpe, dîna edi ke didi dia bungi mu Bible kupita mêna makuabu onso adimu.
Bua kuandamuna lukonko lua ne: “Dîna dia Nzambi nnganyi?” bamue bantu badi mua kuamba ne: “Si nNzambi anyi Mvidi Mukulu.” Kadi adi ki ndiandamuna to, bualu si mbienze anu bu padibu bebeja muntu ne: “Udibu basungule mfumu nnganyi?” yeye wandamuna ne: “Si mmuntu uvua mufile mpala.” Bantu abu bonso ki mbafile mandamuna matoke majalame to, bualu “Nzambi anyi Mvidi Mukulu” ne “muntu uvua mufile mpala” ki mmêna masunguluke to.
Bua tshinyi Nzambi mmutuleje dîna diende? Uvua muenze nanku bua tuetu kumumanya bimpe. Tshilejilu, badi mua kubikila muntu umuepele ne: Shefu, Tutu, Tatu anyi Kaku, bilondeshile badi bamubikila. Mianzu eyi idi ileja bualu kampanda pa bidi bimutangila. Kadi dîna dia muntu eu didi dituvuluija malu onso atudi bamumanyine. Ke mudibi kabidi bua mianzu bu mudi: Mukalenge, Wa Bukole Buonso, Tatu ne Mufuki, idi ituvuluija tshidi midimu mishilashilangane ya Nzambi. Kadi anu dîna diende dia Yehowa ke didi dituvuluija malu onso atudi bamumanyine. Mmunyi muudi mua kumanya Nzambi bimpe paudi kuyi mumanye dîna diende?
Ki mbia mushinga bua kumanya anu dîna dia Nzambi patupu to, mbimpe kuikala kabidi kuditela. Bua tshinyi? Bualu Bible udi utuambila ne: ‘Muntu yonso watela dîna dia Yehowa neasungidibue.’—Yoele 2:32; Lomo 10:13.
[Mêyi adi kuinshi]
^ tshik. 9 Wewe musue kumanya diumvuija dia dîna dia Nzambi, ne tshidibu badiumushile mu imue Bible, udi mua kubala mukanda wa Bible utu ulongesha tshinyi menemene? mu dibeji dia 195-197 mupatula kudi Bantemu ba Yehowa.
[Lungenyi lunene lua mu dibeji 6]
Badi mua kubikila muntu umuepele ne: Shefu, Tutu, Tatu anyi Kaku, bilondeshile badi bamubikila. Kadi dîna dia muntu eu didi dituvuluija malu onso atudi bamumanyine