“Edi ke dîna dia Nzambi ditambe bunene ne dia tshijila”
“Edi ke dîna dia Nzambi ditambe bunene ne dia tshijila”
Nicholas wa ku Cusa ke wakamba mêyi aa mu muyuki wende wakenzaye mu 1430. * Uvua muntu uvua musue kumanya malu a bungi bu mudi kumanya tshiena Greke, tshiena Ebelu, malu a nkindi, a Nzambi, a makumi ne a mabulungu. Wakalua mumanyi mupiluke wa mikenji ya bena Katolike pavuaye ne bidimu 22. Mu 1448 bakamuteka kardinale.
Kukadi bidimu 550, Nicholas wa ku Cusa wakibakisha nzubu wa kulamina bakulakaje mu tshimenga tshia Kues tshidi mutantshi wa kilometre 130 ku Sud kua tshimenga tshia Bonn mu Allemagne, tshidibu babikila lelu ne: Bernkastel-Kues. Lelu, badi balamina mu nzubu eu mikanda ya Cusa mipite pa 310. Umue wa ku mikanda eyi ngua kodekse Cusanus 220 mudi muyuki wa Cusa uvuaye muenze mu 1430. Mu muyuki au udibu babikila ne: In principio erat verbum (Ku tshibangidilu Dîyi diakadiku), Nicholas wa ku Cusa wakakula bua dîna dia mu Latin dia Iehoua bua kuakula bua Yehowa. * Wakamba mêyi adi alonda aa bua dîna dia Nzambi mu dibeji dia 56, wamba ne: “Ndîna didi Nzambi mudinyike. Mmaleta anayi adi enza dîna dia Nzambi . . . Edi ke dîna dia Nzambi ditambe bunene ne dia tshijila.” Mêyi a Nicholas wa ku Cusa aa adi aleja muvuaye witaba pende ne: dîna dia Nzambi didi mu Mifundu ya tshiena Ebelu ya ku ntuadijilu.—Ekes. 6:3.
Kodekse wa ku ntuadijilu kua bidimu bia 1400 ngumue wa ku mikanda ya kale itshidiku idibu bakudimuna maleta anayi adi enza dîna dia Nzambi ne: “Iehoua.” Mukanda eu udi ujadika kabidi ne: munkatshi mua bidimu bia bungi, bantu bavua bakudimuna dîna dia Nzambi mu mushindu udi mufuanangane ne wa “Yehowa.”
[Mêyi adi kuinshi]
^ tshik. 2 Bavua kabidi babikila Nicholas wa ku Cusa ne: Nikolaus Cryfts (Krebs), Nicolaus Cusanus ne Nikolaus von Kues. Kues divua dîna dia tshimenga tshia mu Allemagne tshivuabu bamulelele.
^ tshik. 3 Muyuki wende uvua wakula bua dilongesha dia busatu bunsantu.
[Tshimfuanyi mu dibeji 16]
Tshilaminu tshia mikanda tshia Cusa