Yezu uvua wakula bua inferno wa kapia anyi?
Yezu uvua wakula bua inferno wa kapia anyi?
BAMUE bantu batu bitaba dilongesha dia inferno wa kapia batu bamba mudidi diangatshila mu mêyi a Yezu adi mu Mâko 9:48 (anyi mvese wa 44, 46). Yezu wakakula bua bikusu (anyi misanda) itu kayiyi ifua ne kapia katu kakayi kajima. Muntu yeye mukuele lukonko pa mêyi aa, neumuandamune bishi?
Bilondeshile Bible udi muntu nende, udi mua kubala mvese wa 44, 46 anyi wa 48 bualu mvese eyi idi ne mêyi a muomumue mu imue Bible. * Mu Bible wa Traduction du monde nouveau badi bamba ne: ‘Pikala dîsu diebe dikulenduisha, udimanshe; mbimpe ubuele mu Bukalenge bua Nzambi ne dîsu dimue pamutu pa kuedibua ne mêsu onso abidi mu Ngena mudi tshikusu tshiabu katshiyi tshifua ne kapia kakayi kajima.’—Mâko 9:47, 48, NW.
Nansha nanku, bamue badi bamba mudi mêyi a Yezu aleja ne: anyima ya bantu babi itu ikenga bua kashidi panyima pa lufu. Tshilejilu, badi bamba mu Bible wa mu tshiena Espagne wa Sagrada Biblia wa Iniversite wa Navarre ne: “Mukalenge udi wakula muaba eu bua makenga a mu inferno. Misangu ya bungi batu bumvuija ne: ‘tshikusu tshidi katshiyi tshifua’ tshidi tshileja kanyinganyinga ka tshiendelele kadi bantu badi baya mu inferno bumvua; ne ‘kapia kadi kakayi kajima’ kadi kaleja mudi mubidi wabu ukenga.”
Kadi fuanyikija mêyi a Yezu aa ne adi mu mvese wa ndekelu mu mukanda wa Yeshaya. * Kabienaku bimueneka ne: Yezu uvua utela mêyi adi mu Yeshaya nshapita wa 66 anyi? Bidi bimueneka ne: mu nshapita eu muprofete udi wakula bua kuya pambelu “pa Yelushalema mu tshibandabanda tshia Hinoma (Ngena) tshivua pabuipi apu, muaba uvuabu bafila milambu ya bantu (Yel. 7:31) ne tshiakalua diala dia bena mu tshimenga.” (The Jerome Biblical Commentary) Nunku difuanyikija didi mu Yeshaya 66:24 kadiena diakula bua dikengesha dia bantu; didi diakula bua bitalu. Tshidibu bumvuija mu mvese eu tshidi katshiyi tshifua mbikusu, ki bantu badi ne muoyo anyi anyima idi kayiyi ifua to. Kadi ntshinyi tshivua Yezu musue kuamba?
Tangila tshidibu bamba mu mukanda wa bena Katolike wa El evangelio de Marcos bua Mâko 9:48. Mukanda muibidi wa Análisis lingüístico y comentario exegético udi wamba ne: “Tshiambilu etshi ntshiangatshila mu Yeshaya (66,24). Muaba eu muprofete udi uleja mishindu ibidi ivuabu babutula bitalu: dibola ne dibiosha . . . Padibu bakula bua bikusu ne kapia, badi bashindika lungenyi lua kabutu. . . . Badi baleja mudi bintu bibidi ebi bitu bibutula kabiyi bijika (padibu bamba ne: ‘kakena kajima ne katshiena tshifua’), mbuena kuamba ne: kakuena mushindu wa kubinyema to. Mu tshilejilu etshi, anu kapia ne bikusu ke bidi bishala ne muoyo, ki mmuntu nansha ne bionso bibidi bidi bibutula bintu bionso bidibi bipeta. Nunku kabena bumvuija makenga a kashidi kadi badi bakula bua dibutuka dia butubutu didi dipangisha muntu bua kubishibua ku lufu ne bidi biumvuija lufu lua kashidi. Nunku kapia kadi kumvuija dibutuka dia kashidi.”
Muntu yonso udi mumanye mudi Nzambi muikale ne dinanga ne buakane udi ne bua kumona mudibi bimpe bua kumvua mêyi a Yezu mu mushindu eu. Kavua wamba ne: bantu babi nebakenge bua kashidi to. Kadi badi mua kubutuka bua kashidi, kabayi batekemena dibishibua to.
[Mêyi adi kuinshi]
^ tshik. 3 Mu Bible ya kale ivuabu bakudimune bimpe, kamuena mvese wa 44 ne wa 46 to. bamanyi ba malu a Bible badi bamba ne: mbalue kusakidila mvese eyi pashishe. Mulongeshi Archibald Robertson wakafunda ne: “Mikanda ya kale ivuabu bakudimune bimpe menemene, kayena ne mvese ibidi eyi to. Bena mu matunga a ku Mputu ne bena Sulia (bena Byzance) ke bakayisakidila. Idi yambulula anu mêyi adi mu mvese wa 48. Ke bualu kayi tudi bumbusha mvese wa 44 ne wa 46 bualu ki mmilelela to.”
^ tshik. 5 ‘Nebalopoke, nebatangile bitalu bia bantu bakuntombokela; bualu bua tshikusu tshiabu katshiena tshifua, kapia kabu kakena kajima, ne bobu nebikale bintu bidi bantu bonso bapetula.’—Yesh. 66:24.