Nkonko ya babadi

Mbimpe bua Ntemu wa Yehowa abuele mu dibaka dia mulunda anyi muanabu udi kayi Ntemu anyi?

Dituku dia dibaka ditu dituku dia disanka, nunku muena Kristo udi mua kujinga mua kusanka dituku adi. Tshidibi, bana badi ne bua kulonda dîyi dia muledi anyi dia muntu udi ubakolesha bua kuyamu. (Efeso 6:1-3) Kadi netuambe bishi bikala mulume udi kayi Ntemu wa Yehowa wambila mukajende udi Ntemu bua akamufile mu tshitanda mudibu babeneshila dibaka? Kondo kende ka muoyo kadi mua kumuambila bua kuyamu, kadi kubenga kuenza malu onso adibu benzamu.

Nunku, kuya anyi kubenga kuya ntshilumbu tshia muntu ne muntu. Kadi muena Kristo yonso ikala mumanya ne: Yehowa udi utangila bualu buonso budiye wenza. Udi kabidi ne bua kuvuluka imue mvese padiye witaba bua kuyamu.

Kadi muena Kristo udi ne bua kuanji kukeba bua kusankisha Nzambi, bualu Yezu wakamba ne: ‘Nzambi udi Nyuma; budi bamutendeledi nabu mbua kumutendelela mu nyuma ne mu bulelela.’ (Yone 4:24) Ke bualu kayi, Bantemu ba Yehowa kabatu benza malu atubu benza mu bitanda bikuabu, bu mudi: masambila, misambu ne bilele bikuabu bualu kabiena mu Bible to.​—2 Kolinto 6:14-17.

Muena Kristo mmumanye ne: malu adiye wenza adi mua kulenduisha bakuabu bantu. Wewe muitabe bua kuyamu, balela bebe nebafike munda wewe kuyi muenze malu adi bantu bonso benza anyi? Udi kabidi ne bua kutangila tshikala bualu ebu mua kuenzela bena Kristo nebe. (Lomo 14:13) Nansha wewe anyi bena mu dîku dienu bamone ne: kakuena bualu, bena Kristo nenu nebumvue bishi? Kondo ka muoyo ka bamue kadi mua kuteketa anyi?

Mabaka a bana betu badi kabayi Bantemu adi mua kutukebela ntatu. Tshilejilu, newenze tshinyi bobu bakulombe bua kuimanyina bena dibaka? Kadi muena dibaka nebe udi kayi Ntemu yeye musue kuenza malu onso, newenze tshinyi? Bobu benzela dibaka kua mbulamatadi, kuyamu kakutu nangananga ne tshilumbu, bualu mmalu a mbulamatadi.

Kadi dibaka didibu benzela mu tshitanda tshia nzambi anyi dilombola kudi mpasata didi mua kujula bilumbu bikuabu. Nunku, bua kulonda kondo kebe ka muoyo kalongesha kudi Bible ne kubenga kuenza malu adi abengangana ne Bible anyi adi mua kutonda bantu banudi nabu mu tshitanda amu, mbimpe kubenga kuyamu. (Nsumuinu 22:3) Bua kubenga malu, udi mua kudianjila kuambila bena mu dîku dienu malu audi mua kuenza ne audi kuyi mua kuenza to. Udi kabidi mua kubalomba bua kushintulula amue malu.

Bamue bena Kristo badi mua kuitaba bua kuya mu dibaka, kadi kubenga kuenza malu enzekamu panyima pa bamane kuela meji bikole bua tshilumbu etshi. Kadi muena Kristo yeye mumone ne: yeye muye mu dibaka adi, udi mua kuenza malu adi Bible ukandika, ki mbimpe ayemu to. Nansha yeye mubenge kuya mu tshitanda, kadi muitabe bua kuya anu muaba udibu benzela difesto dia dibaka anu bu muntu udibu babikila, udi ne bua kukeba bua ‘kuenza malu onso bua kutumbisha Nzambi.’ (1 Kolinto 10:31) ‘Muntu ne muntu neadiambuile bujitu buende’ padiye usungula tshia kuenza. (Galatia 6:5) Nunku, nansha wewe muitabe bua kuya anyi kubenga kuya, kupu muoyo ne: kuikala ne kondo ka muoyo kimpe ku mêsu kua Yehowa kudi ne mushinga mukole.