Nkonko ya babadi

Ndîba kayi didi Nzambi ulekela kusungula bena Kristo bua kuya mu diulu?

Bible kêna wandamuna ne dishindika lukonko elu to. Tshitudi bamanye ntshia se: bayidi ba Yezu bakatuadija kupeta nyuma muimpe bua kuya mu diulu mu tshidimu tshia 33. (Bienzedi 2:1-4) Tudi bamanye kabidi ne: panyima pa lufu lua bapostolo, bena Kristo balelela bela manyi anyi “mponda” ‘bakakola popamue’ ne ‘lupela’ anyi bena Kristo ba dishima. (Matayo 13:24-30) Pashishe, kubangila mu bidimu bia ku ndekelu kua 1800, bena Kristo bela manyi bakatuadija kabidi mudimu. Mu 1919 bakatuadija kunowa ‘bintu bia pa buloba bia kunowa,’ pamue ne kusangisha bela manyi ba ndekelu.​—Buakabuluibua 14:15, 16.

Kubangila mu bidimu bia ku ndekelu kua 1800 too ne mu 1931, bena Kristo bavua bayisha nangananga bua kusangisha bela manyi batshivua bashale. Mu 1931, Balongi ba Bible bakangata dîna dia mu Bible dia Bantemu ba Yehowa. Tshibumba tshia Nsentedi tshia mu dia 15 Kasuabanga 1933 (Angl.) tshiakaleja muvua dîna dia pa buadi adi dikale “ndenalio” uvuabu batele mu mufuanu wa Yezu udi mu Matayo 20:1-16. Bavua bela meji ne: mêba 12 adibu bakule mu mufuanu adi apetangana ne bidimu 12, kumbukila ku 1919 too ne ku 1931. Panyima pa 1933, Bantemu bavua bela meji ne: disungula dia bantu badi ne bua kuya mu diulu bua kukokesha ne Kristo divua dijike mu 1931, ne bantu bavuabu basungule mu 1930 ne 1931 ke ‘ba ku nshikidilu’ bavuabu babikile. (Matayo 20:6-8) Kadi mu 1966, bakakaja diumvuija dia mufuanu au, ne biakamueneka patoke ne: kauvua utangila ndekelu wa disungula dia bela manyi to.

Mu 1935 bakumvua ne: “Tshisumbu tshinene” tshia mu Buakabuluibua 7:9-15 tshivua tshienza ne “mikoko mikuabo,” anyi bena Kristo bavua ne bua kusomba pa buloba. Bavua ne bua kusangisha bena Kristo aba mu ‘matuku a ku nshikidilu’ ne bobu ke bavua mua kupanduka ku Armagedone. (Yone 10:16; 2 Timote 3:1; Buakabuluibua 21:3, 4) Panyima pa tshidimu atshi, mudimu wa kuvuija bantu bayidi uvua utamba kuimanyina pa disangisha dia bena mu musumba munene. Nunku, nangananga kunyima kua 1966, Bantemu bavua bela meji ne: disungula dia bantu baya mu diulu divua dijike mu 1935. Bualu ebu buakamueneka bu  bulelela, bualu bantu bonso bavua batambula panyima pa 1935 bavua bumvua ne: bavua ne bua kusomba pa buloba. Pashishe, bavua bela meji ne: bantu bonso bavuabu basungula kunyima kua 1935 bua kuya mu diulu bavua bapingana pa muaba wa bena Kristo bavua kabayi bashale ne lulamatu.

Kakuyi mpata, muela manyi umue yeye mulekele bulelela, Yehowa udi usungula mukuabu muntu bua kuangata muaba wende. (Lomo 11:17-22) Kadi bungi bua bela manyi balelela badi batombokele Yehowa budi mua kuikala bukese. Pashishe kabidi, mu bungi bua matuku, nyuma muimpe uvua mumanyishe bamue bena Kristo bavua batambule panyima pa 1935 ne: nebaye mu diulu. (Lomo 8:16, 17) Nunku, bidi bimueneka ne: katuena mua kuamba dîba menemene didi Nzambi ulekela kusungula bena Kristo bua kuya mu diulu.

Mmunyi mutudi mua kumona muntu udi mutuishibue mu muoyo wende ne: udi mpindieu muela manyi, ne utuadija kudia diampa ne kunua mvinyo mu Tshivulukilu? Muntu kêna ne bua kumulumbuluisha to. Abu mbualu buende ne Yehowa. (Lomo 14:12) Kadi bena Kristo bela manyi balelela kabatu balomba bua bikale babenzela malu a pa buawu nansha. Kabatu bela meji ne: bu mudibu bela manyi, badi ne dijingulula dia malu dipite dia bamue bena Kristo ba matuku a bungi badi mu musumba munene. Kabena bela meji ne: badi ne nyuma muimpe kupita mikoko mikuabu to. Kabatu nansha bajinga bua bakuabu babakuatshile mudimu anyi kabatu bela meji ne: bu mudibu badia diampa ne banua mvinyo, badi balua ku mutu kua bakulu mu tshisumbu to. Badi badipuekesha ne bavuluka ne: bamue bela manyi balume ba mu bidimu lukama bia kumpala kabavua bakumbane bua kuikala bakulu anyi basadidi ba mudimu to. (1 Timote 3:1-10, 12, 13; Tito 1:5-9; Yakobo 3:1) Kuvua mene bela manyi bakuabu bavua kabayi ne ditabuja dikole to. (1 Tesalonike 5:14) Bana betu ba bakaji pabu, nansha muvuabu bela manyi kabavua balongesha mu tshisumbu to.​—1 Timote 2:11, 12.

Nunku, bela manyi ne mikoko mikuabu badi badienzeja bonso bua kuikala ne ditabuja dikole, kupeta mamuma a nyuma muimpe ne kuenza bua tshisumbu tshikale mu ditalala. Bena Kristo bonso, nansha bobu bikale bela manyi anyi mikoko mikuabu, badi benza mudimu mukole wa kuyisha lumu luimpe ne kuvuija bantu bayidi ku bulombodi bua Kasumbu Kaludiki. Bena Kristo bela manyi mbanyishe bua kuenza nunku matuku onso adi Nzambi musue bua bamuenzele mudimu pa buloba.