Badi batumbisha Yehowa mu kalasa

PA BULOBA bujima, bansonga Bantemu ba Yehowa badi bapeta mishindu ya kutumbisha Nzambi mu kalasa ku ngakuilu wabu ne ku ngikadilu wabu. Tangila amue malu avua menzeke adi aleja lukunukunu luabu.

Bakapesha muana wa bakaji mukuabu Ntemu wa mu ditunga dia Grèce mudimu wa kufunda muyuki udi wakula bua dinyanguka dia kapepe pa buloba. Kunyima kua yeye mumane kutangila mu mukanda wa Index des publications de la Société Watch Tower, wakapeta malu a mushinga mu tshibejibeji tshia Réveillez-vous!, yeye kuleja ku ndekelu kua mudimu wende au ne: uvua muangatshile ngenyi mu tshibejibeji tshia Réveillez-vous! Mulongeshi wabu wakamuambila ne: mudimu uvuaye muenze au uvua umue wa ku midimu mitambe buimpe ikavuaye mubale. Kunyima kua matuku, mulongeshi au wakatela malu a mu mudimu au mu tshisangilu kampanda tshiakabuelaye, biobi kupatula bipeta bimpe. Nunku muanetu wa bakaji eu wakapangadika bua kupesha mulongeshi au bibejibeji bikuabu bia Réveillez-vous! ne tshikuabu tshivua ne tshiena-bualu tshia se: “Les enseignants: que ferions-nous sans eux?” Mulongeshi eu wakalua kuanyisha tshibejibeji tshia Réveillez-vous! mu kalasa, ne bamue balongi kubangabu kutshilomba. Muanetu wa bakaji au wakabanga kuya ne bibejibeji mu tshilongelu tshiabu bua bikale babala nimero mikuabu.

Mu ditunga dia Bénin (mu Afrike), muana wa bakaji mukuabu muena Kristo wakapeta buluishi bua pa buabu. Anu bu pa tshibidilu, baledi ba balongi babu ba bungi bakumvuangana bua kuangatshila bana babu balongeshi bua kubumvuijabu malu avua mabakolele pambelu bua kulongololabu mateta a mu kalasa bimpe. Kadi balongeshi abu bakasungula bua kuikalabu balongesha mu Disambombo mu dinda. Kadi nsonga Ntemu eu wakamba ne: “Mu Disambombo mu dinda ke dîba ditu tshisumbu tshijima tshiyisha pamue. Buanyi meme ke dituku ditambe buimpe mu lumingu, ne tshiena mua kudishintakaja ne tshintu tshikuabu nansha!” Tatuende (udi udikoleshila bana bende aba nkayende ne udi kabidi Ntemu) wakakeba bua kumvuangana ne bamue baledi ne balongeshi bua bashintulule dîba dia kulonga. Kadi buonso buabu bakabenga. Nsongakaji au wakangata dipangadika dia kulonga kayi ne mulongeshi wa kumbelu. Wakaditua mu diyisha pamue ne tshisumbu tshiabu. Balongi babu bavua bamuseka, bamuambila bua alekele kuyisha ne bua alekele kabidi ne Nzambi wende. Bavua batuishibue ne: uvua ne bua kubula mu mateta. Kadi pakenzabu mateta, balongi bavuabu balongesha kumbelu abu bakabula, kadi muanetu wa bakaji au wakakuata. Tuseku tuonso tuvuabu bamuseka tuakajika. Mpindieu balongi babu batu bamuambila ne: “Udi ne bua kutungunuka ne kusadila Nzambi webe.”

Mu ditunga dia République tchèque, muana wa bakaji wa bidimu 12 uvua ne bua kulongolola muyuki wa mu mukanda kampanda. Mamuende wakamuambila bua kuwangatshila mu mukanda wa Muntu mutambe bunene wa katshia ne katshia. Wakatuadija muyuki wende au ne nkonko eyi: “Udi wela meji kayi? Nnganyi udi mua kuikala muntu mutambe bunene wa katshia ne katshia?” Wakakula bua Yezu, bua muoyo wende pa buloba ne bua malongesha ende. Pashishe wakumvuija malu adi mu nshapita udi ne tshiena-bualu tshia se: “Dilongesha pa dibuikidilangana.” Mulongeshi wabu wakakema wamba ne: “Eu ke muyuki mutambe buimpe undi mumvue kuudi!” ne kuitabaye bua kuangata ne dianyisha dionso mukanda wa Muntu mutambe bunene. Bamue balongi babu bakajinga pabu bua kuupeta. Dituku diakalonda, muana wa bakaji eu uvua ne disanka dia kuabanya mikanda ayi 18.

Bansonga bu nunku badi bapeta disanka divule padibu batumbisha Yehowa mu kalasa. Buonso buetu tudi ne bua kuidikija lukunukunu luabu.