Balongi ba mu Gilada badi baya mu mudimu wa dinowa ne lukunukunu!

‘BINTU bia kunowa bidi bia bungi, kadi bena mudimu badi banya-banya. Nunku, nulombe Mukalenge wa bintu bia kunowa, atume bena mudimu mu kunowa kuende.’ (Matayo 9:37, 38) Mêyi aa avua ne diumvuija dia pa buadi kudi balongi ba mu kalasa ka 116 ka Gilada (Tshilongelu tshia Bible tshia Watchtower) pavuabu badilongolola bua kuya miaba yabu ya kuenzela mudimu wa bu-misionere.

Mu Disambombo dia 13 Luabanya 2004, bantu 6 684 bakadisangisha mu Nzubu wa Bilongelu bia Watchtower mu Patterson, mu New York, ne mu bitupa bikuabu bia Betele muvuabu balonda ku TV tshisangilu etshi tshia dipesha balongi ba mu Gilada mapolome muvuabu bakankamije balongi aba ne babapeshe mibelu mimpe ya dibalaya nayi. Mibelu ivuabu babapeshe eyi idi mua kutuambuluisha tuetu bonso, bualu tutu tuenza mudimu wa dinowa dia mu nyuma ne lukunukunu.

Mêyi a mbangilu a Theodore Jaracz wa mu Kasumbu Kaludiki uvua mujikije pende mu kalasa ka Gilada ka muanda mutekete akaleja mushinga wa mêyi a Yezu a se: ‘Yayi nuvuije ba bisamba bionso bayidi.’ (Matayo 28:19, 20) Mêyi au avua makanyine balongi aba menemene, bualu bavua babatuma bua kuenza mudimu mu matunga 20! Muanetu Theodore Jaracz wakavuluija balongi ne: malu adibu babalongeshe mu Dîyi dia Nzambi mmabalongolole tshishiki bua kulua bena mudimu ba lukunukunu mu dinowa dia mu nyuma dia mushinga mukole.​—Matayo 5:16.

Mushindu wa kuikala banowi badi bapatula bipeta bilenga

Ngamba-malu wa kumpala uvua Robert Wallen udi muenze mudimu wa malu adi atangila Tshilongelu tshia Gilada munkatshi mua bidimu bia bungi. Pakenzaye muyuki uvua ne tshiena-bualu tshia se: “Ngikadilu mulenga wa luse,” wakambila balongi ne: “Luse mmuakulu udi nansha mpudi matshi mua kumvua ne udi mpofo mua kumona.” Yezu uvua mumanye bimpe makenga avua nawu bakuabu ne uvua ukeba mushindu wa kubapetesha disulakana. (Matayo 9:36) Balongi aba nebapete mishindu ya bungi ya kuenza bia muomumue mu mudimu wa buambi, mu tshisumbu, mu nzubu wa ba-misionere ne mu mabaka abu. Ngamba-malu wakababela ne: “Nuenze bua ngikadilu mulenga wa luse ikale umueneka mu nsombelu wenu panudi nukuatshila bakuabu mudimu. Nenusombe matuku onso mu nzubu wa ba-misionere mu ditalala anu nuenu bikale ne tshikadilu tshimpe. Nunku, kanupu muoyo bua kuvuala mutshima wa luse.”​—Kolosai 3:12.

Pashishe, Gerrit Lösch wa mu Kasumbu Kaludiki uvua pende mujikije mu kalasa ka Gilada ka 41 wakasulakaja tshiena-bualu tshia se: “Bamuangalaji ba lumu lua lupandu.” (Yeshaya 52:7) Bua bantu kupandabu pabutula Yehowa bulongolodi ebu, badi ne bua kupeta dimanya dilelela dia mu Dîyi dia Nzambi, kumanyisha bakuabu malu adibu bitabuje ne pashishe kutambula. (Lomo 10:10; 2 Timote 3:15; 1 Petelo 3:21) Kadi, bualu bunene bua kumpala butudi tumanyishila  lupandu ki mbua kupandisha bantu to, kadi mbua kutumbisha Nzambi. Nunku, muanetu Lösch wakabela balongi aba bavua balua ba-misionere ne: “Nufikishe mukenji wa Bukalenge too ne ku mfudilu kua buloba, ne nuikale bamuangalaji ba lukunukunu ba lumu lua lupandu, bionso ebi anu bua butumbi bua Yehowa.”​—Lomo 10:18.

Lukonko lua muyuki uvua Lawrence Bowen (mulongeshi wa mu Gilada) muenze luvua ne: “Mmunyi munudi nukenkesha butoke bua mu nyuma?” Wakatela mêyi a Yezu a mu Matayo 6:22 ne kukankamija balongi bua kuikalabu ne dîsu didi ‘dimona tshintu bimpe’ bua kumonabu mua “kukenkesha butoke bua mu nyuma budi butumbisha Yehowa ne bupetesha bantu nabu masanka.” Katshia anu ku ntuadijilu kua mudimu wa Yezu, wakashiya tshilejilu mu muanda eu mu dishala mutume lungenyi luende anu ku dienza dia disua dia Nzambi. Dielangana meji bua malu a dikema avua Tatuende mumulongeshe mu diulu diakamuambuluisha bua kutantamena mateta a Satana mu tshipela. (Matayo 3:16; 4:1-11) Yezu wakeyemena Yehowa ne muoyo mujima pakakumbajaye mudimu uvua Nzambi mumupeshe. Bia muomumue, bua ba-misionere kumonabu mua kutantamena ntatu idi mibindile, badi ne bua kutungunuka ne tshibidilu tshimpe tshia kudilongela Bible ne kueyemena Yehowa ne muoyo mujima.

Mark Noumair, mulongeshi wa mu Gilada uvua mujikije pende mu kalasa ka Gilada ka 77 wakajikija miyuki eyi ne tshiena-bualu tshia se: “Tudi mu tshianza tshiebe.” (Yoshua 9:25) Wakakankamija  balongi bua kuidikijabu lungenyi lua bena Gibeona ba kale. Nansha muvua Gibeona muikale ‘musoko munene ne balume bonso [bikale] ne bukitu,’ bena Gibeona kabakakeba bua kupeta butumbi anyi kutekemena bua kupeta bintu bivuabu bobu mua kudilombela to. (Yoshua 10:2) Bakenza mudimu wa ‘bapandi ba nkunyi ne basunyi ba mâyi’ ku budisuile, balombola kudi bena Lewi bua kufila diambuluisha ku midimu ya mu ntendelelu wa Yehowa. (Yoshua 9:27) Bushuwa, balongi ba mu Gilada aba mbambile Yoshua Munene, Yezu Kristo, ne: “Tudi mu tshianza tshiebe.” Mpindieu bu mudibu batuadija midimu yabu ku ba-bende, badi ne bua kuitaba mudimu wonso udi Yoshua Munene ubapesha bua kuenza.

Malu avuabu bamone ne diela bamue bantu nkonko

Wallace Liverance, uvua mujikije mu kalasa ka 61 ka Gilada ne uvua kabidi umue wa ku balongeshi, wakayikila ne kasumbu ka balongi mu tshiena-bualu tshia ne: “Nujinguluile bantu Mukanda wa Nzambi.” Bakalonda malu avuabu bamone mu buambi mu tshikondo tshivuabu mu kalasa ne kualejilulabu mu manaya muvuawu menzeke. Biakamueneka patoke se: malu mavule a mu Mukanda wa Nzambi avuabu balonge mu kalasa mu ngondo itanu mijima avua malenge mutshima wabu ne mabasake bua kuamanyisha bantu bakuabu kabidi. (Luka 24:32) Munkatshi mua dilonga edi diakenza ngondo itanu, mulongi mukuabu wakafika ku dimanyisha muakunyende wa balume malu avuaye ulonga. Bualu ebu buakasaka muakunyende eu bua kukeba tshisumbu tshivua pabuipi ne kutuadija kulonga Bible. Mpindieu ukadi mukumbaje malu malomba bua kubanga kuyisha lumu luimpe kumpala kua kutambula.

Kunyima kua malu avua balongi bamone aa, Richard Ashe ne John Gibbard bakela basadidi bavule ba Yehowa ba lulamatu bakadi benze bidimu bia bungi nkonko, munkatshi muabu muvua batangidi bena ngendu bavua ku Nzubu wa Bilongelu bia Watchtower kuvuabu babalongesha malu a pa buawu. Bakavua buobu bajikije mu tulasa tukuabu tua Gilada tua bidimu bishale. Umue wa kudibu wakavuluka dîyi divua muanetu Knorr mubambile pavuabu mu kalasa ne: “Mu Gilada nenulonge malu a bungi. Kadi nuenu babange kuditambisha panudi nupatukamu, apu mudimu wetu tuetu newikale mu tshijengu. Tudi basue bua nupatukamu bikale bena kalolo.” Bana betu bena ngendu bakapesha balongi aba mibelu bua kuikalabu baditatshisha bua bantu ne majinga abu, bua kuikala kuenzela bakuabu malu anu muvua Kristo ubenzelawu, ne bua kuanyisha mudimu wonso udibu babapesha ne budipuekeshi. Kakuyi mpata, ditumikila mibelu eyi nediambuluishe ba-misionere bapiabapia aba bua kupatula bipeta bimpe miaba idibu babatuma.

Ndayi mu mudimu wa dinowa ne lukunukunu!

Bantu bavua balonda ndongamu eu bavua ne diakalenga dia kuteleja Stephen Lett, muanetu mukuabu wa mu Kasumbu Kaludiki. Wakenza muyuki munene wa mu ndongamu eu uvua ne tshiena-bualu tshia se: “Ndayi mu mudimu wenu wa dinowa ne lukunukunu!” (Matayo 9:38) Mu mudimu wetu mulelela wa dinowa dia bia pa madimi eu, tshikondo tshia kunowa tshitu tshîpi. Nunku bitu bilomba bua banowi kuenza mudimu wa bungi. Mbitambe buimpe bua kuenza nanku matuku aa a ku ndekelu kua tshikondo etshi, ki mmuomu anyi? Bua mudimu munene wa dinowa dia mu nyuma, mioyo ya bantu idi mu njiwu. (Matayo 13:39) Muanetu Lett wakakankamija balongi bua kabikadi ‘bajanguluki’ ku mudimu wabu, kadi bikale “ne lukunukunu mu mitshima” ne ‘bakuatshile Nzambi mudimu’ wa dinowa eu wikala kauyi mua kuenzeka tshiakabidi. (Lomo 12:11) Ngamba-malu eu wakatela mêyi a Yezu a se: ‘Bandulukayi, numone madimi, adi matoke katataka bua kunowabu.’ (Yone 4:35) Pashishe wakabela balongi bua kulejabu lukunukunu bua mudimu wa dinowa mu didienzeja ne muoyo mujima bua kuyisha bantu dîba ne muaba udibu mua kubapeta ne kukeba bua kuyisha dîba dionso didi mushindu umueneka. Kukeba mishindu ya kujula miyiki kudi mua kufikisha ku diyisha bimpe. Yehowa n’Nzambi wa lukunukunu, ne mmutekemene bua tuetu bonso kumuidikija ne kuenza mudimu wa bungi mu dinowa dia mu nyuma.​—2 Bakelenge 19:31; Yone 5:17.

Bua kujikija ndongamu eu, mulombodi, (muanetu Jaracz) wakela balongi mioyo mibatumina kudi biro bivule bietu bia Bantemu ne yeye kubabanyina mapolome abu. Mulongi umue wakabala mukanda uvua kalasa kajima kafunde bua kuleja dianyisha diabu dikole bua malu avuabu balonge. Bushuwa, ndongamu eu wa dipesha balongi ba kalasa ka 116 mapolome wakasaka bonso bavua bamulonde bua kuangata dipangadika dikole dia kuya mu mudimu wa dinowa ne lukunukunu luonso.

[Kazubu mu dibeji 25]

MALU ADI ATANGILA BALONGI

Bungi bua matunga adibu bafumine: 6

Bungi bua matunga adibu babatume: 20

Bungi bua balongi: 46

Muayene wa bidimu: 34,2

Muayene wa bidimu bienza mu bulelela: 17,2

Muayene wa bidimu mu mudimu wa ku dîba ne ku dîba: 13,9

[Tshimfuanyi mu dibeji 26]

Difila mapolome mu kalasa ka 116 ka Gilada, Tshilongelu tshia Bible tshia Watchtower

Mu liste udi kuinshi eku mbabale milongo batuadijile kumpala baya batangile panyima; mbafunde mêna babangile ku dia bakaji batangile ku dia balume mu mulongo wonso.

(1) R. Ceansu; T. Sparks; C. Piña; P. Turner; L. Cheney. (2) M. Suardy; Å. Sjöqvist; L. Amadori; N. Smith; A. Jordan; L. Boissonneault. (3) J. Matlock; C. Ruiz; L. Dular; M. Vigneron; K. Henry. (4) H. Sjöqvist; J. Laux; J. Ruzzo; K. Gustafsson; R. Boissonneault; M. Jordan. (5) D. Henry; D. Turner; S. Kirwin; K. Florit; S. Ceansu. (6) S. Amadori; J. Cheney; R. Ross; J. Nelson; J. Ruiz; M. Vigneron. (7) J. Florit; D. Matlock; B. Ross; C. Laux; T. Ruzzo; D. Dular; N. Kirwin. (8) A. Gustafsson; D. Nelson; W. Suardy; M. Piña; C. Smith; T. Sparks.