Udi muvuluke anyi?

Udi muanyishe dibala dia nimero ya ndekelu ya Tshibumba tshia Nsentedi anyi? Nanku anji tangilabi ni udi mua kuandamuna nkondo idi ilonda eyi:

• Nndongamu kayi uudi mua kulonda udi utangila Muyuki wa pa Mukuna bua wewe kukepesha tunyinganyinga?

Dituku dionso, udi mua kubala dimue dia ku malongesha manene a Yezu adi mu muyuki au anyi muaba mukuabu mu Evanjeliyo. Wewe welangana meji bua dilongesha adi ne ukeba mua kuditumikila, pamu’apa neupete disanka dia bungi ne tunyinganyinga netukepele.​—15/12, dibeji dia 12-14.

• Mmalu manene kayi asatu adi asaka bakulu bua kulongesha basadidi ba mudimu bua kuambula majitu makuabu?

Bua divula dia bungi bua Bantemu ba Yehowa, tudi dijinga ne balume ba kueyemena bua kuambuluishabu bantu badi bafuminaku ku ditambula. Bukulakaje anyi masama bidi mpindieu mua kukepesha malu adi bakulu bakadi benze bidimu bia bungi mua kuenza. Bamue bakulu bapiluke badi ne majitu adi kaayi anu a mu tshisumbu tshiabu to, ke bualu kayi badi mua kupangila bua kuenza malu a bungi mu tshisumbu tshiabu bu muvuabu benza kumpala.​—1/1, dibeji dia 29.

• Mmunyi mudi bantu beyemena nzambi idi kayiyi milelela?

Bantu ba bungi badi batendelela nzambi ya tshitendelelu tshiabu, pabi idi mua kuikala nzambi kayiyi muoyo idi kayiyi mua kupandisha anu muvua Bâla wa mu matuku a Eliya. (1 Bakelenge 18:26, 29; Musambu 135:15-17) Bakuabu badi batendelela benji ba manaya badi kabayi mua kubapesha ditekemena dilelela bua matuku atshilualua. Kadi Yehowa udiku tshia bushuwa ne udi ukumbaja majinga ende.​—15/1, dibeji 3-5.

• Ntshinyi tshitudi mua kulongela ku muanda wakenza Kana pakamudimuija Nzambi?

Nzambi mmutupeshe tshipedi tshia budisunguidi, ne tudi mua kusungula bua kuenza malu adi makane pamutu pa malu adi mabi muakenza Kana. Muyuki wa mu Bible udi uleja kabidi ne: Yehowa utu unyoka bantu badi kabayi badilengeja.​—15/1, dibeji dia 22-23.

• Bua tshinyi mankenda adi ne mushinga wa bungi lelu?

Bua dishintuluka dia malu a mu nsombelu, bantu ba bungi kabatshiena ne dîba dia bungi dia kusukula mu nzubu bu muvuabu benza pa tshibidilu to. Kulengulula mankenda pa bidi bitangila biakudia ne mâyi kudi mua kukebela bantu masama. Pa kumbusha mankenda a mubidi, Bible udi utulomba bua kuikala kabidi ne mankenda ta bukezuke bua mu nyuma, bua ngikadilu ne bua lungenyi.​—1/2, dibeji 3-6.

• Paulo wakamba bua bantemu ba kumpala kua Buena-Kristo ne: kabavua mua “kuvuijibua bapuangane tuetu katuyi nabu.” Mmushindu kayi udibi nanku? (Ebelu 11:40)

Mu Bukokeshi bua Bidimu Tshinunu budi kumpala, Kristo ne bana babu bela manyi mu diulu, bikale bakalenge ne bakuidi, nebafile masanka a mulambu wa tshia-bupikudi kudi bantu babishibua ku lufu. Mushindu’eu ke wikala bena lulamatu aba ba buena badibu batele mu Ebelu nshapita wa 11 mua “kuvuijibua bapuangane.”​—1/2, dibeji dia 23.

• Ntshinyi tshivua Paulo musue kumvuija pakambilaye bena Ebelu ne: “Kanuena banji kuluangana too ne padi mashi apueka”? (Ebelu 12:4, MMM)

Uvua musue kuakula bua ditua nkanana too ne ku lufu. Kuvua bilejilu bia bantu ba pa kale bavua bashale ne lulamatu too ne ku lufu. Nansha muvua bena Ebelu bavua Paulo mufundile kabayi banji kutetshibua mushindu’au, bivua bibakengela kukola mu nyuma, kukolesha ditabuja diabu bua kutantamena bualu buonso buvua mua kubafikila.​—15/2, dibeji dia 29.

• Bua tshinyi mbimpe kuepuka diamba ne: Yehowa udi utekesha buakane buende ne luse?

Mu imue miakulu, “kutekesha” kudi mua kumvuija kupolesha anyi kukanda. Yehowa udi Nzambi wa buakane ne wa luse, ne ngikadilu eyi yonso ibidi idiye uleja idi ikumbanangana bimpe menemene. (Ekesode 34:6, 7; Dutelonome 32:4; Musambu 116:5; 145:9) Buakane bua Yehowa kabuena bulomba bua kubutekesha anyi kubupolesha ne luse luende nansha.​—1/3, dibeji dia 30.

• Mbimpe bua muena Kristo kumishishaye tshitalu tshia mulela wende kampanda anyi?

Diumisha tshitalu mmushindu wa kutshilama. Bamue bantu ba kale bavua balonda tshilele etshi bua malu a ntendelelu wabu. Kabiena ne bua kuikala nanku to bua batendeledi balelela. (Muambi 9:5; Bienzedi 24:15) Diumisha tshitalu ndikeba patupu bua kuendesha bitekete tshintu tshidi katshiyi kuepuka: dipingana dia tshitalu ku lupuishi. (Genese 3:19) Kadi kabiena ne bua kutonda muena Kristo bikala mikenji ilomba bua kumisha tshitalu, bikala bamue balela bajinga bua bienzeke nanku, peshi bikala bamue bantu bafumina kule balua mu madilu au.​—15/3, dibeji dia 29-31.

• Mbilejilu kayi bia mu Bible bidi bitulongesha ne: Nzambi udi witaba bantu ba bisamba bionso?

Yehowa wakatuma muprofete Yona bua kudimuija bena mu Ninewe, ne Nzambi wakabela Yona bua kuitabaye dinyingalala diabu. Ku mêyi ende ne ku tshilejilu tshiende, Yezu wakakankamija bantu bua kunangabu bena Samalea. Mupostolo Petelo ne mupostolo Paulo buonso buabu bakambuluisha bua kufikisha lumu luimpe kudi bantu bavua kabayi bena Yuda. Bilejilu ebi bidi bituleja ne: tudi ne bua kudienzeja bua kuambuluisha bantu ba miaba yonso.​—1/4, dibeji dia 21-24.