Bantu bonso bakabutuka!

Tangila bantu miliyare ne miliyare badi pa buloba, ne bimenga biabu, ne bibidilu biabu, ne bintu bidibu benze. Mbipepele bua kumona bintu ebi bionso ne kubiangata bu bidi mua kushalaku kashidi. Udiku wela meji ne: bia panu ebi bidi mua kubutuka bionso butubutu dimue dituku anyi? Bidi mua kuikala bikole bua kuela meji nanku. Kadi udiku mumanye ne: mukanda kampanda wa kueyemena udi uleja ne: kale bantu ne bintu biakabutuka bionso anyi?

KATUENA tuakula bua bantu batshivua tshikondo atshi anu tu-biota tua bantu bakese patupu to. Bantu bakabutuka aba bakavua bashidimuke, bavua ne bimenga, bavua bafumbe ne basonge bintu kabukabu, ne bavua ne dimanya dia malu a bungi. Kadi Bible udi utulondela ne: diakamue mu dituku dia 17 dia ngondo muibidi, bidimu 352 kumpala kua nkambua Abalahama kuledibua, mvula wa kabutu wakabanga kuloka, kubutulaye bantu bonso. *

 Muyuki eu mmulelela anyi? Muanda eu wakenzeka menemene anyi? Mbia bulelela bua se: kumpala kua tuetu kuledibua bantu bakavua bavulangane pa buloba apa bikole ne pashishe kuluabu kubabutula anyi? Bikalabu bavuaku, bua tshinyi bakabutuka? Ntshinyi tshivuabu benze? Ne dibutudibua diabu didiku mua kutupesha dilongesha kampanda anyi?

Mbia bulelela bua se: bakabutula bantu kampanda ba kale anyi?

Bikala kabutu ka dikema ka buena aka kavua ne bua kuikala kenzeke, bantu kabavua mua kukapua muoyo kashidi to. Ke bualu kayi mu matunga a bungi mudi malu adi avuluija kabutu aku. Tshilejilu, tangila mudi Mukanda wa Nzambi uleja dituku dijalame diakenzekabi. Ngondo muibidi wa mu kalandriye ka kale uvua ubangila munkatshi mua ngondo wa dikumi too ne munkatshi mua ngondo wa dikumi ne umue mu kalandriye katudi naku lelu. Nunku dituku dia 17 didi disua kupetangana ne dituku dia kumpala dia ngondo wa dikumi ne umue. Ke bualu kayi kabiena mua kuikala bualu bua mu mpukapuka padi bantu ba mu matunga a bungi benza mafesto bua kuvuluka bantu bakafua mu dituku edi tshidimu tshionso nansha.

Bijadiki bikuabu bia se: Mvula wa kabutu wakaloka bitshidi mu malu a kale adi bantu balondelangana. Pabuipi ne bisamba bionso bia bantu ba kale bitu ne muanu udibu balonda ne: bankambua babu bakapanda ku mvula wa kabutu wakaloka pa buloba bujima. Tuyeke tua mu Afrike, ba-Celtes ba ku Mputu, ba-Incas ba mu Amerike wa ku Sud, buonso buabu badi ne mianu mifuanangane, nansha kabidi bena mu ditunga dia Alaska, Australie, Chine, Inde, Lituanie, Mexique, Micronésie, Nouvelle-Zélande ne mu bitupa bia mu Amerike wa ku Nord.

Mu bungi bua bidimu, bantu batu basakidile malu makuabu bua kulengeja mianu eyi, kadi yonso idi ne mumvuija a bungi adi aleja muaba umue udi muyuki eu mufumine: Bubi bua bantu buvua bufikishe Nzambi munda. Wakalokesha mvula wa bungi. Bantu bonso bakabutuka. Anu bantu bakese bakane ke bakapanda. Bantu bakane aba bakenza buatu buvuabu buobu ne nyama bapandukile. Kunyima, bakatuma nyunyi bua kukeba muaba uvua buloba bume. Ndekelu wa bionso, buatu buakalua kusomba pa mukuna. Pakapatuka bantu bavua bapande mu buatu aba, bakalambula Nzambi mulambu.

Bualu ebu budi bujadika tshinyi? Difuanangana edi kadiena mua kuikala dia ku mpukapuka to. Malu onso adibu baleje mu mianu eyi adi ajadika mêyi mamba kale mu Bible ne: bantu bonso mbafumine ku ndelanganyi ya bantu bakapanduka ku mvula wakabutula bantu. Bua nanku katuena ne bua kueyemena mianu anyi nsumuinu bua kumanya tshiakenzeka to. Tudi ne muyuki mulama bimpe mu Mifundu ya tshiena-Ebelu ya mu Bible.​—Genese, nshapita 6-8.

 Mu Bible mudi muyuki wa kale mufundisha ku nyuma wa Nzambi udi wakula bua ntuadijilu wa muoyo. Kudi bijadiki bidi bileja bimpe ne: muyuki eu kawena patupu malu a kale nansha. Milayi yawu itu kayiyi mua kupanga kukumbana ne meji matue adi amuenekamu bidi bileja ne: anu mudiwu wowu nkayawu wamba, udi muikale malu adi Nzambi umanyisha bantu. Bible kêna bu nsumuinu to, bualu padiye ulonda malu a kale, udi utela mêna ne matuku a ngondo ne ndelanganyi ya bantu ne miaba ivuabu. Udi utuleja nsombelu uvua nende bantu kumpala kua Mvula wa kabutu ne udi umvuija tshivuabu babutuile bantu bonso diakamue.

Ntshinyi tshivua bantu ba kumpala kua mvula wa kabutu au benze? Tshiena-bualu tshidi tshilonda tshidi tshiandamuna lukonko elu. Lukonko elu ludi ne mushinga wa bungi bua aba badi mua kuikala badikonka tshiafikila bantu badiku lelu eu.

[Mêyi adi kuinshi]

[Tablo mu dibeji 4]

(Bua kumona malu bimpe, tangila mu mukanda)

Mianu itubu bela miaba ya bungi bua Mvula wa kabutu

Matunga Malu adi mafuanangane 1 2 3 4 5 6 7 8 9 10

Grèce 7 ◆ ◆ ◆ ◆ ◆ ◆ ◆

Lomo 6 ◆ ◆ ◆ ◆ ◆ ◆

Lithuanie 6 ◆ ◆ ◆ ◆ ◆ ◆

Assyrie 9 ◆ ◆ ◆ ◆ ◆ ◆ ◆ ◆ ◆

Tanzanie 7 ◆ ◆ ◆ ◆ ◆ ◆ ◆

Indie - ba-Hindu 6 ◆ ◆ ◆ ◆ ◆ ◆

Nouvelle-Zélande – ba-Maori 5 ◆ ◆ ◆ ◆ ◆

Micronésie 7 ◆ ◆ ◆ ◆ ◆ ◆ ◆

Washington (États-Unis) - Yakima 7 ◆ ◆ ◆ ◆ ◆ ◆ ◆

Mississippi (États-Unis) - Choctaw 7 ◆ ◆ ◆ ◆ ◆ ◆ ◆

Mexique – Michoacán 5 ◆ ◆ ◆ ◆ ◆

Amerike wa ku Sud – ba-Quechua 4 ◆ ◆ ◆ ◆

Bolivie - Chiriguano 5 ◆ ◆ ◆ ◆ ◆

Guyane - ba-Arawak 6 ◆ ◆ ◆ ◆ ◆ ◆

1: Malu mabi adi afikisha Nzambi munda

2: Kabutu ka mvula

3: Mutuma kudi Nzambi

4: Badi bamanyisha bantu didimuija dia kudi Nzambi

5: Bantu bakese badi bapanda

6: Badi bapandukila mu buatu

7: Nyama idi ipanduka

8: Badi batuma nyunyi anyi tshifukibua tshikuabu pa mbelu

9: Ndekelu wa bionso buatu budi busomba pa mukuna kampanda

10: Badi balambula mulambu