Bamanyishi ba Bukalenge badi balonda

Badi bapeta bantu batu bakole bua kubapeta

BANTEMU BA YEHOWA batu badienzeja bua kumanyisha muntu yonso mukenji wa Bukalenge. Imue misangu bitu bibalomba bukole bua pa buabu bua kupeta bantu batu kabayi basomba kumbelu kuabu mêba mavule. (Mâko 13:10) Bua muanda eu, mpanda-njila mukuabu wa pa buende wa mu dimue ditunga dia ku Sud kua Amerike udi utulondela bualu budi bulonda ebu.

“Dimue dituku ngakumvua ne: ngovena wa provense uvua ne bua kulua mu teritware utuvua (meme ne mukajanyi) tuenzela mudimu. Bu mumvua mumanye ne: uvua umue wa ku bantu batu basomba kumbelu anu mu mpukapuka, ngakamufundila mukanda ne kuelamu mikanda ya bungi ya malu a mu Bible, muvua broshire wa Ntshinyi tshidi Nzambi utulomba? ne mukanda wa L’humanité à la recherche de Dieu ne wa Dimanya didi difikisha ku muoyo wa kashidi. Mukanda umvua mufunde eu uvua umvuija tshipatshila tshia mukanda ne mukanda wonso.

“Bu mumvua njinga kumanya tshivuaye mua kuamba bua mikanda eyi, ngakamulomba bua kumonangana nende. Kunyima kua mbingu ndambu bakanganyishila bua meme kumonangana nende, ne ngakaya ne bande wa video wa Les Témoins de Jéhovah​—Un nom, une organisation. Tuakenza nende mêba matue ku abidi. Panyima pa tuetu bamane kutangila bande wa video eu ne ngovena, ngakamuebeja tshivuaye wela meji bua bande eu. Wakangandamuna ne: ‘Kakuena bulongolodi bukuabu pa buloba apa bu buenu nansha. Mvua mua kuikalaku ne bantu bu nuenu badi mua kungambuluisha bua kukumbaja midimu ya mu mbulamatadi wanyi!’ Pashishe wakangebeja ni nkavuaku muye ku tshilombuelu tshia bulongolodi buetu. Ngakamuandamuna ne: nansha mumvua ne tshipatshila atshi katshia pamvua ne bidimu 14, tshivua muanji kupeta mushindu wa kuya kumona tshilombuelu tshietu ku Brooklyn, mu New York to. Tshivua tshimue tshia ku bipatshila bivua mua kunkolela bua kukumbaja. Wakashala muntangile mutantshi. Pashishe yeye kungambila ne: uvua musue bua meme kuyaku. Wakenza mushindu wa tuetu kupeta mikanda ya njila ne kutupeshaye tike ya ndeke ya tshianana!

“Mpindieu ngovena eu udi upeta bibejibeji bia Tshibumba tshia Nsentedi ne Réveillez-vous! pa tshibidilu. Tudi tuela meji ne: mu matuku makese aa netuikale mua kutuadija nende dilonga dia Bible.”