Udi ne bua kukeba bua kumanya malu a bitendelelu bikuabu anyi?

MIGUEL ukadi mpindieu Ntemu wa Yehowa mu Amerike wa ku Sud udi wamba ne: “Nkavua muenze bu tshidimu tshijima mbuela mu bisangilu bia bena Kristo ne mvua nsanka bua kuambila bakuabu malu a Bukalenge bua Nzambi. Pashishe ngakabanga kuteleja malongesha a bitendelelu bikuabu ku tshisanji ne ku televizion. Mvua ngela meji ne: malu au avua mua kungambuluisha bua kumanya bantu ba mu bitendelelu bikuabu bimpe. Ngakamona ne: malongesha abu kaavua umvuangana ne Bible, kadi mvua anu musue kumanya malu a bungi.”

Mu ditunga dimue dimue adi, kuvua Jorge uvua ulongesha bantu bakuabu malu a ntendelelu mulelela ne tshisumi. Kadi kunyima, yeye pende wakabanga kuteleja malongesha a bitendelelu bikuabu ku tshisanji ne ku televizion. Uvua wamba ne: “Mbimpe kumanya tshidi bakuabu balongesha.” Pavuabu bamukonka bua njiwu ivua mua kumuvuila bua diteleja malongesha a dishima, uvua wandamuna ne: “Kakuena tshintu tshidi mua kunyanga ditabuja dia muntu udi mumanye Bible bimpe to.” Malu aa adi ajula lukonko lua mushinga elu: Bidiku bia meji bua kuteleja malongesha a bitendelelu bikuabu anyi?

Mushindu wa kujingulula Buena-Kristo bulelela

Kunyima kua lufu lua bapostolo, bitendelelu bivua bibila ku Buena-Kristo biakavulangana e kunyangabi ntendelelu mulelela. Bu muvua Yezu mudianjile kumanya bualu ebu, wakaleja mua kusunguluja Buena-Kristo bua dishima ne Buena-Kristo bulelela. Tshia kumpala, wakatudimuija ne: “Nuende badimuke kudi baprofete badi ne mashimi, batu balua kunudi baluate biseba bia mikoko, kadi munda muabo mudi nkashama idi ne luonji.” Pashishe wakamba ne: “Nenubajingulule ku mamuma abo.” (Matayo 7:15-23) Bayidi balelela ba Yezu badi benza malu avuaye mulongeshe, ne badi babajingulula bipepele ku mamuma abu mimpe. Batu baya kutangila bantu bua kubumvuija  tshidi Bukalenge bua Nzambi ku diambuluisha dia Mukanda wa Nzambi anu bu muvua Yezu wenza. Bu mudibu balonda tshilejilu tshiende, kabena babuelakana mu malu a tshididi ne a bena panu to. Buabu buobu Bible ke Dîyi dia Nzambi ne ke bulelela. Badi bamanyisha dîna dia Nzambi. Ne bu mudibu badienzeja bua kunangangana mushindu udi Nzambi ulongesha, kabatu baluangana mvita to. Kadi badi bamonangana bu bena muntu.​—Luka 4:43; 10:1-9; Yone 13:34, 35; 17:16, 17, 26.

Bilondeshile Mukanda wa Nzambi, kudi mushindu wa ‘kujingulula ditapuluka didi pankatshi pa bantu bimpe ne bantu babi, pankatshi pa badi bakuatshila Nzambi mudimu ne badi kabayi bamukuatshila mudimu.’ (Malaki 3:18) Lelu’eu batendeledi balelela badi mu buobumue mu lungenyi ne mu bienzedi, anu bu muvua bena Kristo ba mu bidimu lukama bia kumpala. (Efeso 4:4-6) Wewe mumane kumanya tshisumbu tshia bena Kristo balelela etshi, bua tshinyi udi ne bua kuditua kabidi mu dikebulula anyi dizuka bua kumanya malongesha a bakuabu?

Nudimuke bua balongeshi ba dishima

Bible udi uleja ne: nansha kunyima kua muntu mumane kulonga bulelela bua mu Bible, malongesha a dishima adi mua kulua kumunyanga mu nyuma. Mupostolo Paulo wakatudimuija ne: ‘Nudimuke bua muntu kikadiku udi mua kununyanga ne nkindi yende ne lubombo lua patupu, bu mudi bilele biamba kudi bantu, bu mudi mayisha a kumudilu a pa buloba, ne ki mbu mudi Kristo mutuyishe.’ (Kolosai 2:8) Ndiumvuija kayipu ditue didi mu mvese eu! Bulelela, balongeshi ba dishima badi mua kuikala njiwu ya bushuwa bualu badi banyanga bantu.

Bushuwa, mupostolo Paulo uvua mumanye malu avua bakuabu bitabuja. Umue musangu wakatuadija muyuki wende wamba ne: ‘Nuenu bena Atena, ndi ntangila ne: mu malu onso nudi nutamba kutshina nzambi yenu. Bualu bua pangakadi mpita mu njila, ntangila bintu binudi nutendelela, ngakasangana kabidi tshioshelu tshiakadi ne dîna difundaku ne: Kudi Nzambi udi kayi Mumanyibue.’ (Bienzedi 17:22, 23) Kadi Paulo kavua ne tshibidilu tshia kunyanga lungenyi luende ne nkindi ya bangamba-malu bena Greke nansha.

Kusua kumanya ntuadijilu ne malu adi bitendelelu bia mashimi bilongesha mbualu pa bule, kadi kuabueja mu lungenyi mbualu bukuabu. * Yehowa mmuteke “mupika wa lulamatu ne wa budimu” bua kufilaye malongesha mashindamene pa Dîyi Diende. (Matayo 4:4; 24:45, NW) Paulo wakafunda ne: ‘Kanuena mua kudisanga ku mesa a Mukalenge ne ku mesa a bademon popamue. Anyi, tudi tufuisha Mukalenge mukawu anyi?’​—1 Kolinto 10:20-22.

Bamue balongeshi ba dishima bavua mua kuikala kumpala bena Kristo balelela, kadi kuluabu pashishe kulekela bulelela. (Yuda 4, 11) Kabiena mua kutukemesha to. Yezu wakakula bua “mupika wa lulamatu ne wa budimu” udi muikale kasumbu ka bena Kristo bela manyi, ne bua ‘mupika mubi,’ kasumbu ka badi badiabakena ne: ‘mfumu wanyi kêna ulua katataka,’ ne babanga kukuma bapika nabu. (Matayo 24:48, 49) Misangu mivule, bantu aba ne badi babalonda kabatuku ne abu malongesha masunguluke to; batu basue anu kunyanga ditabuja dia bakuabu. Mupostolo Yone wakafunda ne: ‘Bialua muntu kunudi kayi ulua ne diyisha edi, kanumuitabuji mu nzubu, kanumuedi muoyo.’​—2 Yone 10; 2 Kolinto 11:3, 4, 13-15.

Bantu badi bakeba bulelela ne muoyo umue badi ne bua kukonkonona ne lubatshi malu a bitendelelu kabukabu adibu bumvua. Ndekelu wa bionso, Nzambi neabeneshe bantu ba mutshima muakane badi bakeba bulelela. Bible udi wamba bua meji a kudi Nzambi ne: ‘Biwaakeba bu muudi ukeba tshiamu tshia argent, biwaakeja mu muudi ukeja biuma bisokoka, nunku neusangane dimanya dia Nzambi.’ (Nsumuinu 2:4, 5) Bu mudi bena Kristo balelela bamane kupeta dimanya dia Nzambi edi mu Bible ne mu tshisumbu tshia bena Kristo, ne bamone mushindu udi Yehowa ubenesha bantu badi batumikila dimanya edi, kabena batungunuka ne kuteleja malongesha a bitendelelu bia dishima nansha.​—2 Timote 3:14.

[Mêyi adi kuinshi]