Tudi dijinga ne bulongolodi bua Yehowa

UKADIKU mumvue muntu wamba ne: “Ndi ngitabuja Nzambi, kadi tshitu ngitaba tshitendelelu kampanda” anyi? Misangu mivule bantu bavua kumpala bayi banene ba mu nzambi kadi bakalekela bualu tshitendelelu tshiabu katshivua tshikumbaja majinga abu a mu nyuma batu bamba mêyi a muomumue. Nansha mudibu batekesha mu mikolo kudi bitendelelu mu tshibungi tshiabi, ba bungi badi baleja ne: batshitu anu basue kutendelela Nzambi. Kadi badi bela meji mudibi bikengela kutendelela Nzambi mushindu udibu buobu bamone pamutu pa kuikala mu tshitendelelu anyi tshisumbu kampanda.

Ntshinyi tshidi Bible wamba? Nzambi mmusue bua bena Kristo bikale mu bulongolodi peshi mu tshisumbu anyi?

Bena Kristo ba kumpala bakapeta diambuluisha bualu bavua benze bulongolodi

Bena kuitabuja balume ne bakaji bakapeta nyuma wa Yehowa mu dituku dia Pentekoste wa mu tshidimu tshia 33 B.B., bavua “muaba umue,” mu nzubu wa kuulu mu tshimenga tshia Yelushalema. (Bienzedi 2:1) Ke dituku diakaledibua tshisumbu tshia bena Kristo, tshiakabuela mene pashishe mu matunga makuabu. Tshivua dibenesha bua bayidi ba Yezu abu menemene. Bua tshinyi? Bualu bumue mbuobu’ebu: bavua babapeshe mudimu wa mushinga, mudimu wa kuyisha lumu luimpe lua Bukalenge bua Nzambi “pa buloba buonso buasa.” (Matayo 24:14, NW) Mu tshisumbu, bena kuitabuja bakavua ne dimanya divule bavua mua kulongesha bena kuitabuja nabu bapiabapia mushindu wa kuyisha.

Abidi mmale asatu mmîpi, mukenji wa Bukalenge ukavua mupatuke mu Yelushalema, muye mikuabu miaba. Pankatshi pa tshidimu tshia 62 ne tshia 64 B.B., mupostolo Petelo wakafunda mukanda wende wa kumpala wakatuminaye bena Kristo “bena tshimuangi, ba mu Ponto, Galatia, Kapadokia, Asia ne mu Bitunia,” miaba yonso eyi idi lelu mu ditunga dia Turquie. (1 Petelo 1:1) Kuvua kabidi bena kuitabuja mu Palestine, Lebanona, Sulia, Kupulio, Gelika, Kulete ne mu Italia. Anu muvua Paulo mufundile bena Kolosai bu mu tshidimu tshia 60 anyi tshia 61 B.B., lumu luimpe lukavua ‘luambibue munkatshi mua bifukibua bionso muinshi mua diulu.’​—Kolosai 1:23.

Bualu buibidi budi buleja buimpe bua kuikala mu tshisumbu buvua ne: bantu bavua mua kukankamijangana munkatshi muabu. Pavua bena Kristo badisangisha mu tshisumbu, bavua bateleja miyuki ivua ikankamijangana, balonga Mifundu minsantu pamue, balondelangana malu mamona avua akolesha ditabuja ne basambila pamue. (1 Kolinto, nshapita wa 14) Ne bantu bapie mu nyuma bavua ‘balama tshisumbu tshia mikoko ya Nzambi.’​—1 Petelo 5:2.

 Bena Kristo bakafika ku dimanyangana ne ku dinangangana ku diambuluisha dia tshisumbu. Bena Kristo ba kumpala bakakoleshibua ne kukankamijibua bualu kabavua bamona kuikala kudisangisha ne bakuabu mu tshisumbu bu bujitu nansha.​—Bienzedi 2:42; 14:27; 1 Kolinto 14:26; Kolosai 4:15, 16.

Tshisumbu tshia pa buloba bujima tshivua kabidi ne mudimu wa kukolesha buobumue. Bena Kristo bakalonga mua ‘kuikala bonso dîyi dimue.’ (1 Kolinto 1:10, MMM) Mbualu bua mushinga menemene. Bena mu tshisumbu kabavua balonge tulasa tua mumue to, ne bantu ne bantu bavua ne wabu nkoleshilu. Kabavua bakula miakulu ya muomumue to, ne bavua kabidi bashilangane bikole ku ngikadilu ya bumuntu buabu. (Bienzedi 2:1-11) Imue misangu mene, bavua bapangakanangana ku mmuenenu. Nansha nanku, bavua babambuluisha bua kujikija dikokangana mu tshisumbu.​—Bienzedi 15:1, 2; Filipoi 4:2, 3.

Nkonko minene ivua bakulu ba tshisumbu kabayi mua kuandamuna, bavua bayitumina batangidi bena ngendu bapie mu nyuma, bu mudi Paulo. Nkonko minene ivua itangila malongesha bavua bayitumina kasumbu kaludiki kavua mu Yelushalema. Ku ntuadijilu, kasumbu kaludiki aka kavua kenza amu ne bapostolo ba Yezu Kristo, kadi kunyima bakalua kukadiundisha pa kuelamu bakulu ba tshisumbu tshia mu Yelushalema. Bisumbu bionso bivua bitaba bukokeshi buvua Nzambi mupeshe kasumbu kaludiki aka ne baleji-mpala baku bua kulombola mudimu, kuteka bantu bua kuenzabu midimu kampanda ne bua kuangata mapangadika pa malu manene avua atangila malongesha. Tshilejilu, pavua kasumbu kaludiki kakose tshilumbu kampanda, bisumbu bionso biakitaba dipangadika edi ne ‘bonso bakasanka pavuabu babakolesha ku muoyo.’​—Bienzedi 15:1, 2, 28, 30, 31.

Bulelela, Yehowa wakakuata mudimu ne tshisumbu tshia mu bidimu lukama bia kumpala. Kadi netuambe munyi bua lelu?

Tudi dijinga ne bulongolodi lelu

Anu bu bana babu ba mu bidimu lukama bia kumpala, lelu Bantemu ba Yehowa badi bangata mudimu wa kuyisha lumu luimpe lua Bukalenge ne mushinga wa bungi. Umue wa ku mishindu idibu bakumbaja mudimu eu nku diabanya Bible ne mikanda idi imumvuija. Kadi bua malu kuenzekawu mushindu’eu, bidi bikengela kuikale bulongolodi.

Mikanda ya bena Kristo eyi badi ne bua kuyifunda bimpe, kulongolola bilema, kuyipatula ku biamu ne kuyitumina bisumbu. Bena Kristo badi mu bisumbu abi badi baya kuyituadila bantu badi basue kuyibala. Ke mudi lumu luimpe lua Bukalenge lufike kudi bantu miliyo mivule nunku. Bena Kristo aba badi baluangana bua mudimu wabu wenzeke mu bulongame, badi baditatshisha bua kabikadi batamba kuyisha tshitupa kampanda tshia tshipapu tshidibu benzela mudimu ne eku balengulula tshikuabu. Bionso ebi bidi bilomba bulongolodi.

Bu mudi ‘Nzambi kayi ne kansungansunga,’ bidi bikengela kukudimuna Bible ne mikanda idi yambuluisha bua kumumvua. (Bienzedi 10:34) Lelu’eu tshibejibeji etshi tshidi mu miakulu 132 ne tshikuabu tshidi tshipatuka pamue natshi (Réveillez-vous!), tshidi mu miakulu 83. Bua kuenza bintu bionso ebi bidi bikengela kuikale tusumbu tua bakudimunyi tulongolola bimpe.

Bena mu bisumbu batu bakoleshibua mu nyuma patubu babuela mu bisangilu ne mu mpuilu ya bena Kristo. Batu batelejamu miyuki mishindamene pa Bible, balonga Mifundu, balondelangana malu mamona adi akoleshangana ku muoyo ne batu kabidi basambila. Ne amu bu muvua bana babu ba mu bidimu lukama bia kumpala, batu babakumbula kudi batangidi bena ngendu ba dinanga bua kubakolesha. Ke bua tshinyi lelu bena Kristo badi benza “tshisumbu tshimue, ne mulami umue.”​—Yone 10:16.

Mbulelela bua se: Bantemu ba Yehowa ne bena Kristo ba kumpala ki mbapuangane to. Nansha nanku, badi benza mudimu pamue mu buobumue. Ke bualu kayi mudimu wa diyisha Bukalenge udi wenzeka pa buloba bujima.​—Bienzedi 15:36-40; Efeso 4:13.

[Tshimfuanyi mu dibeji 31]

Bena Kristo lelu badi benza “tshisumbu tshimue, ne mulami umue”