• Musungula kudi Nzambi. “Meme nkayanyi ke udi muteke mukalenge wanyi . . . Nemfile bisamba bu bumpianyi buebe ne ntengu ya buloba bu tshintu tshiebe.”​—Misambu 2:6, 8.

• Mupianyi wa Mukalenge Davidi. “Mbatulelele muana, mbatupeshe muana wa balume . . . Bua kuvula kua bukokeshi buende ne bua ditalala, kakuakuikala ndekelu pa nkuasa wa bukalenge wa Davidi ne pa bukalenge buende bua kubujadika bikole.”​—Yeshaya 9:6, 7.

• Mulelela ku Beteleheme. “Beteleheme Efelata . . . , kuudi nekupatuke bua bualu buanyi muntu wikala mfumu . . . Bunene buende nebutue ku ntengu ya buloba.”​—Mika 5:2, 4.

• Mubengibua kudi bantu ne nebamushipe. “Bavua bamupetule, ne tuetu katuakamutua mushinga. . . . Bakamutubula bua dishipa dietu dia mikenji.”​—Yeshaya 53:3, 5.

• Mujula ku lufu ne mutumbishibua. “Wewe kuakundekela mu Lukita to. Wewe kuakuitaba bua muena lulamatu webe amone dijimba to. . . . Ku tshianza tshiebe tshia balume kudi diakalenga bua kashidi.”​—Misambu 16:10, 11.

Anu muntu umue ke udi mukumbaje malu onso aa tshishiki bua kuikala Mukokeshi muimpe, Yezu Kristo ke muntu au. Bushuwa, muanjelu mukuabu wakambila Mariya mamuende wa Yezu ne: “Nzambi neamupeshe nkuasa wa bukalenge wa tatuende Davidi, . . . Bukalenge buende kabuakuikala ne ndekelu to.”​—Luka 1:31-33.

Yezu katu muanji kulua mukokeshi pa buloba to. Kadi neakokeshe bantu bu Mukalenge wa Bukalenge bua Nzambi kumbukila mu diulu. Tshidi tshienza bua ikale Mukokeshi muimpe ntshinyi? Mona malu avuaye muenze patshivuaye pa buloba.

•   Yezu uvua utabalela bantu. Yezu uvua muambuluishe balume ne bakaji, bana ne bakole, nansha bapele anyi babanji kayi utangila kuvuabu bafumine to. (Matayi 9:36; Mâko 10:16) Pavua muena nsudi mukuabu mumusengelele ne: “Wewe musue udi mua kundengejaku,” wakumvua luse, kumondopaye.​—Mâko 1:40-42.

• Yezu wakatulongesha mua kusankisha Nzambi. Wakamba ne: “Kanuena mua kuikala bapika ba Nzambi ne ba Biuma popamue to.” Wakamba kabidi ne: tudi ne bua kuenzela bakuabu malu mutudi basue bua batuenzele petu. Dîyi adi ke didibu babikila ne: Mubelu munene. Bualu bukuabu, wakaleja ne: Nzambi kena anu utangila malu atudi tuenza nkayawu to, kadi udi utangila kabidi mutudi tuela meji ne tudiumvua. Nunku bua tuetu kusankisha Nzambi, tudi ne bua kutabalela mutudi tudiumvua menemene. (Matayi 5:28; 6:24; 7:12) Yezu wakashindika ne: bua tuetu kuikala bushuwa ne disanka, tudi ne bua kumanya tshidi Nzambi musue bua tuenze, pashishe kutshienza.​—Luka 11:28.

• Yezu wakalongesha tshidi kunanga bakuabu kumvuija. Malu avua Yezu wamba ne wenza avua ne bukole ne avua alenga mioyo ya bantu bavua bamuteleja. Bible udi wamba ne: “Misumba ya bantu yakakema bikole bua mushindu uvuaye ulongesha, bualu uvua ubalongesha bu muntu uvua ne bukokeshi.” (Matayi 7:28, 29) Wakabalongesha bua ‘kunanga bena lukuna babu.’ Wakasambila too ne bua bantu bavua bamushipeshe wamba ne: “Tatu, bafuila luse, bualu ki mbamanye tshidibu benza to.”​—Matayi 5:44; Luka 23:34.

Yezu mmukumbane menemene bua kuikala Mukokeshi muimpe wa buloba udi wambuluisha bantu ne udi ne bulenga. Kadi ndîba kayi didiye utuadija kukokesha?