BUA BALEDI
8: Ikala tshilejilu
TSHIDIBI BIUMVUIJA
Baledi badi bafila tshilejilu badi benza malu adibu balongesha. Tshilejilu, mbikole bua kutekemena bua muanebe ikale wamba bulelela pikalaye ukumvua wamba ne: “Muambila ne: tshiena kumbelu to,” paudi kuyi musue kuyukila ne muntu udi mulue kukutangila.
David udi wamba ne: “Bantu batu batamba kuamba ne: ‘Enza tshindi ngamba, kadi kuenji tshindi ngenza to.’ Kadi lungenyi elu kalutu luenda bimpe bua bana to. Bana badi anu bu ndanda udi umina malu onso atudi tuamba ne tuenza, ne padibu batumona katuyi tuenza tshitudi tubalongesha nebatuambile.”
DÎYI DINENE DIA MU BIBLE: “Wewe udi uyisha ne: ‘Kuibi,’ udi wiba anyi?”—Lomo 2:21.
BUA TSHINYI BIDI NE MUSHINGA
Bana nansha bakadi bitende batu balonda nangananga bidi baledi babu benza kupita bidi bantu bakuabu benza, nansha bobu bikale bena mulongo nabu. Bidi biumvuija ne: wewe ke udi pa muaba wa kumpala bua kulombola bana bebe mu njila muimpe, kadi anu wewe wenza biudi ubalongesha.
Nicole udi wamba ne: “Tudi mua kuambulula bualu misangu ne misangu ne kudiebeja bikala bana betu bumvue, kadi musangu utudi anu katuyi tuenza bualu butudi bambe, bana badi batuambilabu. Bana batu batuma ntema bikole ku malu onso atudi tuenza, too ne dîba ditudi tuela meji ne: meji abu adi kua tshianana.”
DÎYI DINENE DIA MU BIBLE: “Meji adi afumina muulu . . . kaena ne lubombo.”—Yakobo 3:17.
TSHIUDI MUA KUENZA
Konkonona bikadilu biebe wewe muine. Mbintu bia mushindu kayi biutu wewe umona bua kupitshisha kapepe? Utu wenzela muena dibaka nebe ne bana bebe malu mushindu kayi? Utu ne balunda ba mushindu kayi? Utuku uditeka pa muaba wa bakuabu anyi? Mu tshikoso, utu muntu uudi musue bua bana bebe bikale anyi?
Christine udi wamba ne: “Meme ne bayanyi katutu tuenza bua bana betu bikale benza malu atutu katuyi tuenza to.”
Lomba luse paudi wenza tshilema. Bana bebe bakadi bamanye ne: kuena mupuangane to. Paudi wambila muena dibaka nebe anyi muanebe ne: “Mfuila koku luse” padibi bikengela, udi ubapesha dilongesha dia mushinga dia kuitaba bilema ne kudipuekesha.
Robin udi wamba ne: “Mbimpe bana betu batumvue tuitaba bilema bietu ne tulomba luse. Tuetu katuyi tuenza nanku nebalonge anu bua kusokoka bilema biabu.”
Wendell udi wamba ne: “Bu mutudi baledi, tuetu ke badi bana batamba kuidikija bikole, ne tshilejilu tshietu ke tshiamu tshietu tshinene tshia mudimu bualu badi batshimona misangu yonso. Bana badi balongela ku malu adi baledi babu benza misangu yonso.”
Mona bikuabu:
TSHIBUMBA TSHIA NSENTEDI
Longesha bana mua kudiambuila majitu
Mmunyi mudi tshilejilu tshia Yezu mua kukuambuluisha bua wewe kulua muledi muimpe menemene?
TSHIBUMBA TSHIA NSENTEDI
Udi mua kulua muledi muimpe mushindu kayi?
Mmunyi muudi mua kukolesha bana bimpe?
