Dilongesha dia mu Bible didi ne bukole bua bungi bua kushintulula nsombelu wa bantu. Mona bilejilu bibidi bidi bijadika bualu ebu: tshia Ricardo ne tshia Andres.

RICARDO: Pantshivua anu ne bidimu 15, ngakabuela mu dingumba dia benzavi. Balunda banyi bavua bansaka bikole bua kuenza malu mabi. Ngakadifundila too ne tshipatshila tshia kuenza bidimu 10 mu buloko. Bidi mua kumueneka bu lungenyi lua butatakane. Kadi muaba umvua musombele bavua banyisha bantu bavua benza buloko ne babanemeka. Mvua musue kubafuana.

Ngakenza malu onso avua benzavi benza bu mudi dinua bintu bidi bikuata, dienda masandi ne dienza malu a tshikisu. Dimue dituku butuku tuakaluangana ne bingoma. Meme kuela meji ne: nebanshipe, kadi ngakapanduka tshiyi mupete nansha njiwu to. Panyima pa malu aa, ngakatuadija kuela meji bikole bua nsombelu wanyi ne bipatshila bianyi, ke meme kuangata dipangadika dia kushintuluka. Kadi mvua mua kuenza tshinyi? Nkuepi kumvua mua kupetela diambuluisha?

Bena mu dîku dietu ba bungi kabavua ne disanka to. Bavua ne ntatu mivule. Kadi kabivua nanku bua dîku dia manseba kampanda to. Mvua mujadike ne: yeye ne dîku diende bavua bantu bimpe ne bavua batumikila mêyi manene a mu Bible. Bena mu dîku diende bakangambila musangu kampanda ne: dîna dia Nzambi n’Yehowa. Nunku katupa kîpi panyima pa diluangana dietu dia mvita ne bingoma, ngakasambila Yehowa mmutela mu dîna, ne mmulomba bua angambuluishe. Ngakakema bikole dituku divua dilonda pavua Ntemu wa Yehowa kampanda mukokole kuanyi. Yeye au ke wakalua mulongeshi wanyi wa Bible.

Ngakapeta lutatu kampanda lunene diakamue. Balunda banyi ba kale bavua misangu yonso bambikila ku telefone, bandomba bua ngikale nsomba kabidi nabu. Nansha muvuabi bikole, ngakabenga. Mvua mudisuike bua kutungunuka ne kulonga Bible, ne ndi ne disanka dia bungi bualu ngakenza anu nanku. Nsombelu wanyi wakashintuluka bikole ne ngakapeta disanka dilelela.

Ndi mvuluka mumvua musambile Nzambi mmuambila ne: kuvua musangu kampanda umvua njinga kuenza bidimu dikumi mu buloko bua bantu bannemeke bu muena mu dingumba dia benzavi. Nunku ngakamulomba bua anganyishile bua meme kumuenzela mudimu nansha bua bidimu dikumi mu mudimu wa ku dîba ne ku dîba bua ngambuluishe bakuabu anu muvuabu bangambuluishe panyi. Nzambi wakandamuna disambila dianyi bualu ndi muenze bidimu 17 mu mudimu eu. Ndi mua kusakidila ne: tshitu muanji kubuela mu buloko to.

Kadi balunda banyi ba kale ba bungi bakadi benze bidimu bia bungi mu buloko. Bakuabu bakadi bafue. Pandi mvuluka malu aa ndi ne dianyisha divule bua balela banyi badi Bantemu. Bavua basue kushilangana ne bantu bakuabu pa kutumikila malu a mu Bible. Ndi mufike ku dibanemeka bikole kupita mumvua nnemeka muntu kayi yonso  wa mu dingumba dia benzavi. Tshia mushinga menemene ndi ngela Nzambi tuasakidila bua mudiye mundongeshe bua kuikala ne nsombelu mutambe buimpe.

ANDRES: Ndi muledibue ne mukolele muaba uvua bantu bapele uvua ba bungi ne tshibidilu tshia kunua bintu bidi bikuata, kunyengangana bintu, kushipangana, ne kuenda bundumba bikole. Tatu uvua kanuayi ne uvua unua bintu bidi bikuata. Yeye ne mamu bavua misangu yonso batanda ne baluangana.

Ngakatuadija kunua maluvu ne bintu bidi bikuata pantshivua muana menemene. Dîba dianyi dia bungi mvua ndipitshishila mu njila, ngibangana bintu ne mbipanyisha. Pangakakola, tatu wakajinga kusemena pabuipi nanyi, kadi mu mushindu mubi bualu wakandongesha mua kubueja bintu bidi bikuata mu ditunga dietu mu musokoko ne bikuabu bivua mbulamatadi mukandike bua kubipanyisha. Ngakapeta makuta a bungi ne lukasa luonso. Pashishe dituku dikuabu bampulushi bakalua kuanyi bamba mumvua musue kushipa muntu. Bakankuata, ne kunkoselabu tshibawu tshia bidimu bitanu bia buloko bualu mvua sua kushipa muntu.

Dituku kampanda mu dinda bakela dîyi mu buloko bamanyisha ne: kuvua Bantemu ba Yehowa bavua balue bua kuyukila ne bena mu buloko malu a mu Bible. Ngakaya kuteleja. Malu amvua mumvue akandenga, ke meme kutuadija kulonga Bible ne Bantemu. Pavuabu bandongesha kabavua bansokoka malu to, kadi bakandeja patoke mikenji minene ya Nzambi ya bikadilu bilenga.

Anu pine apu, ngakajingulula ne: bivua bikengela bua muntu angambuluishe bua meme kuenza mashintuluka avua akengedibua nangananga pavua bena mu buloko nanyi bavua kabayi banange mumvua ndonga Bible bantatshisha. Nunku ngakasambila Yehowa bua ampeshe bukole ne meji, ne wakangambuluisha. Bushuwa, mvua mene mpeta ne dikima dia kuyisha bena mu buloko nanyi malu a mu Bible pamutu pa kulekela bua muvuabu bantatshisha.

Pakafika dîba dia meme kupatuka, bikavua bintonda ne nkavua njinga bua kushala kabidi mu buloko. Pamvua ngenda mpatukamu, bena buloko nanyi ba bungi bakankupa bianza bua kundaya. Bakuabu bakangambila ne dinanga dionso ne: “Pastere waya bimpe.”

Bidi bingenza buôwa pandi ngela meji tshivua mua kumfikila bu meme tshiyi muitabe bua Nzambi andongeshe. Ndi ne disanka dia bungi bua mudi Nzambi munnange ne kayi mungangate bu muntu udi mumane kujimina to. a