Diandamuna dia mu Bible

 Misangu mikuabu batu babikila “nsapi ya Bukalenge” ne: “nvungula ya bukelenge,” idi ileja bukokeshi bua kupetesha bantu mushindu wa “kubuela mu Bukalenge bua Nzambi.” (Matayi 16:19; Mukanda wa Nzambi; Bienzedi 14:22) a Yezu wakapesha Petelo “nsapi ya Bukalenge bua mu diulu.” Mbuena kuamba ne: Petelo wakapeta bukokeshi bua kuleja muvua bena lulamatu mua kubuela mu Bukalenge bua mu diulu pavuabu bapeta nyuma muimpe.

Bakakuata mudimu ne nsapi ayi bua banganyi?

 Petelo wakenza malu ne bukokeshi bua kudi Nzambi bua kuambuluisha bisumbu bisatu bia bantu bua kubuela mu Bukalenge:

1.   Bena Yuda ne bavua bitabe buena Yuda. Matuku makese panyima pa lufu lua Yezu, Petelo wakakankamija musumba wa bena kuitabuja bena Yuda bua kuitaba Yezu bu muntu uvua Nzambi musungule bua kukokesha mu Bukalenge. Petelo wakabaleja tshivuabu ne bua kuenza bua kupandishibua. Nunku wakabambuluisha bua kubuela mu Bukalenge, ne bantu binunu ne binunu “bakitabuja dîyi diende.”​—Bienzedi 2:38-41.

2.   Bena Samalea. Pashishe bakatuma Petelo kudi bena Samalea. b Wakenza kabidi mudimu ne lusapi lua Bukalenge pavuaye yeye ne mupostolo Yone ‘babalombele Nzambi bua bapete nyuma muimpe.’ (Bienzedi 8:14-17) Bualu abu buakabambuluisha bua kubuela mu Bukalenge.

3.   Bantu ba bisamba bikuabu. Bidimu bisatu ne tshitupa panyima pa lufu lua Yezu, Nzambi wakaleja Petelo ne: bantu ba bisamba bikuabu (bantu bavua kabayi bena Yuda) bavua ne bua kupeta pabu mushindu wa kubuela mu Bukalenge. Nunku Petelo wakenza mudimu ne lumue lua ku nsapi pa kuyisha bantu ba bisamba bikuabu, kubambuluishaye bua kupeta nyuma muimpe, kuluabu bena Kristo, ne bena Bukalenge bua Nzambi.​—Bienzedi 10:30-35, 44, 45.

‘Kubuela mu Bukalenge’ kudi kumvuija tshinyi?

 Bantu badi bushuwa ‘babuela mu Bukalenge’ badi bakokesha pamue ne Yezu mu diulu. Bible ukavua mumanyishe ne: bavua ne bua ‘kusomba mu nkuasa ya bukalenge’ ne “kukokesha bu bakalenge pa buloba.”​—Luka 22:29, 30; Buakabuluibua 5:9, 10.

Malu atu bantu babuejakaja bua nsapi ya Bukalenge

 Mudi bamue babuejakaja: Diulu divua dindile Petelo bua kuangata dipangadika dia dîba dia kuenza mudimu ne nsapi ya Bukalenge.

 Bulelela bua bualu: Pavua Yezu muakule bua nsapi ya Bukalenge, wakambila Petelo ne: “Tshionso tshiudi mua kusuika pa buloba netshikale tshimana kusuika mu diulu, ne tshionso tshiudi mua kusulula pa buloba netshikale tshimana kusulula mu diulu.” (Matayi 16:19) Nansha mudi bamue bela meji ne: mêyi aa adi aleja ne: Petelo ke uvua wangata mapangadika kumpala kua diulu, miaku ya pa muanda ya mu tshiena Greke tshia ntuadijilu idi ileja ne: mapangadika avua Petelo wangata avua ne bua kulonda mapangadika akavua mamana kuangata mu diulu, kadi kaavua ne bua kuadianjidila to. c

 Bible udi uleja miaba mikuabu ne: Petelo uvua ukokela diulu pavuaye wenza mudimu ne nsapi ya Bukalenge. Tshilejilu, wakatumikila mêyi a kudi Nzambi pavuaye muenze mudimu ne lusapi luisatu.​—Bienzedi 10:19, 20.