“Yezu kumuambila ne: ‘Meme ndi njila ne bulelela ne muoyo. Muntu kena mua kulua kudi Tatu kayi mupitshile kundi to.’”​—Yone 14:6, Nkudimuinu wa bulongolodi bupiabupia.

 “Yezu kumuandamuna ne: ‘Ndi njila, ndi bulelela, ndi muoyi. Muntu nansha umue kena mua kuya kudi Tatu kayi mupitshile kundi.’”​—Yone 14:6, Mukanda wa Mvidi Mukulu (Mishonyi).

 Muntu udi musue kutendelela Tatu Yehowa a Nzambi, udi ne bua kumanya mudimu wa mushinga mukole udi nawu Yezu.

 “Meme ndi njila.” Yezu ke “njila” bua kusemena kudi Nzambi mu mushindu udiye wanyisha. Tshilejilu, bantu badi basambila Nzambi badi ne bua kumusambila mu dîna dia Yezu. (Yone 16:23, 24) Lufu lua Yezu ke ludi luambuluisha bantu bua kulengejangana ne Nzambi anyi bua kupeta kabidi dianyisha diende. (Lomo 5:8-11) Yezu wakashiya kabidi tshilejilu tshia mua kudituala tshidi bantu badi basue kusankisha Nzambi ne bua kulonda.​—Yone 13:15.

 “Meme ndi . . . bulelela.” Yezu uvua wamba anu bulelela ne ubutumikila. (1 Petelo 2:22) Pavua muntu umuteleja, uvua mua kulonga bulelela budi butangila Nzambi. (Yone 8:31, 32) Yezu uvua kabidi “bulelela” bualu wakakumbaja milayi ya buprofete ya mu Bible. Ke mushindu uvuaye muvuije milayi ya Nzambi bualu bulelela.​—Yone 1:17; 2 Kolinto 1:19, 20; Kolosayi 2:16, 17.

 “Meme ndi . . . muoyo.” Yezu wakafila muoyo wende bua bantu badi baleja ditabuja kudiye bapete muoyo wa tshiendelele. (Yone 3:16, 36) Udi kabidi “muoyo” bua bantu bakadi bafue bualu neababishe ku lufu.​—Yone 5:28, 29; 11:25.

 “Muntu kena mua kulua kudi Tatu kayi mupitshile kundi to.” Bantu badi basue kuikala mu malanda mimpe ne Nzambi badi ne bua kuitaba mudimu wa pa buawu udi nawu Yezu. Badi benza nanku padibu basambila Nzambi mu dîna dia Yezu, nunku badi baleja ne: mbamanye bukokeshi bua Yezu Kristo. (Yone 15:16) Mbamanye kabidi ne: lupandu ludiku anu bua Yezu.​—Bienzedi 4:12; Filipoyi 2:8-11.

 Mu Yone nshapita wa 13 too ne wa 17 mudi mibelu ivua Yezu mupeshe bapostolo bende ba lulamatu 11 butuku kumpala kua kufuaye. Mu nshapita wa 14, Yezu wakakankamija bayidi bende bua kuleja ditabuja kudiye ne kudi Tatu wende ne bua babanange ne babatumikile. (Yone 14:1, 12, 15-17, 21, 23, 24) Wakaleja muvuaye mu malanda makole ne Tatuende ne mutshidiye nende mu malanda au. (Yone 14:10, 20, 28, 31) Wakajadikila bayidi bende ne: nansha muvuaye ne bua kupingana mu diulu mu katupa kakese, kavua ne bua kubalekela to. (Yone 14:18) Wakabalaya kabidi “muambuluishi” uvuaye mumvuije ne: ‘nnyuma muimpe, watuma Tatu mu dîna dianyi.’ (Yone 14:25-27) Yezu wakalongolola bayidi bende bua ntatu ivua mibindile kumpala mu mishindu ayi ne mikuabu.