“ເຮັດຕາມທີ່ຂ້ອຍສອນສະເໝີ”
“ເຮັດຕາມທີ່ຂ້ອຍສອນສະເໝີ”
“ຖ້າພວກເຈົ້າເຮັດຕາມທີ່ຂ້ອຍສອນສະເໝີ ພວກເຈົ້າກໍເປັນລູກສິດຂອງຂ້ອຍແທ້ໆ ແລະພວກເຈົ້າຈະຮູ້ຈັກຄວາມຈິງ ແລ້ວຄວາມຈິງຈະເຮັດໃຫ້ພວກເຈົ້າເປັນອິດສະຫຼະ.”—ໂຢຮັນ 8:31, 32
ຄຳເວົ້ານີ້ໝາຍຄວາມວ່າແນວໃດ? “ຄຳສອນ” ຂອງພະເຢຊູໝາຍເຖິງທຸກສິ່ງທີ່ເພິ່ນບອກເຊິ່ງມາຈາກພະເຈົ້າ. ພະເຢຊູບອກວ່າ “ພະບິດາຜູ້ໃຊ້ເຮົາມານັ້ນແຫຼະໄດ້ສັ່ງເຮົາວ່າຈະສອນຫຍັງແລະຈະເວົ້າຫຍັງ.” (ໂຢຮັນ 12:49) ເມື່ອພະເຢຊູອະທິດຖານເຖິງພະເຢໂຫວາພໍ່ໃນສະຫວັນ ເພິ່ນໄດ້ເວົ້າວ່າ: “ຖ້ອຍຄຳຂອງພະອົງເປັນຄວາມຈິງ.” ພະເຢຊູໄດ້ຍົກຖ້ອຍຄຳຂອງພະເຈົ້າຂຶ້ນມາເວົ້າຢູ່ເລື້ອຍໆເພື່ອສະໜັບສະໜູນຄຳສອນຂອງເພິ່ນ. (ໂຢຮັນ 17:17; ມັດທາຍ 4:4, 7, 10) ດັ່ງນັ້ນ ຄລິດສະຕຽນແທ້ຈະ ‘ເຮັດຕາມທີ່ເພິ່ນສອນສະເໝີ’ ເຊິ່ງໝາຍເຖິງການຍອມຮັບວ່າຄຳພີໄບເບິນຖ້ອຍຂອງພະເຈົ້າເປັນ “ຄວາມຈິງ” ແລະເປັນມາດຕະຖານສູງສຸດສຳລັບຄວາມເຊື່ອແລະການປະພຶດຂອງເຂົາເຈົ້າ.
ຄລິດສະຕຽນໃນຍຸກທຳອິດເປັນແບບນັ້ນບໍ? ອັກຄະສາວົກໂປໂລໄດ້ໃຫ້ຄວາມນັບຖືຕໍ່ຖ້ອຍຄຳຂອງພະເຈົ້າແບບດຽວກັບພະເຢຊູ. ລາວຂຽນວ່າ: “ພະຄຳພີທຸກຕອນ ພະເຈົ້າດົນໃຈໃຫ້ຂຽນຂຶ້ນມາ ມີປະໂຫຍດ.” (2 ຕີໂມທຽວ 3:16) ຜູ້ຊາຍທີ່ໄດ້ຮັບການແຕ່ງຕັ້ງໃຫ້ເປັນຜູ້ສອນໃນປະຊາຄົມຄລິດສະຕຽນຕ້ອງ “ຍຶດໝັ້ນກັບຖ້ອຍຄຳທີ່ເປັນຄວາມຈິງ.” (ຕີໂຕ 1:7, 9) ຄລິດສະຕຽນໃນຍຸກທຳອິດໄດ້ຮັບຄຳເຕືອນໃຫ້ປະຕິເສດ “ປັດຊະຍາແລະຄຳຫຼອກລວງທີ່ບໍ່ມີປະໂຫຍດຕາມທີ່ມະນຸດສອນຕໍ່ໆກັນມາແລະຕາມແນວຄິດຕ່າງໆຂອງໂລກ ເຊິ່ງບໍ່ໄດ້ມາຈາກພະຄລິດ.”—ໂກໂລຊາຍ 2:8
ໃຜກຳລັງເຮັດແບບດຽວກັນໃນທຸກມື້ນີ້? ຄູ່ມືຖາມຕອບຂອງຄລິດຕະຈັກກາໂຕລິກ (ພາສາອັງກິດ) ບອກວ່າ: “ພະຄຳພີສັກສິດບໍ່ແມ່ນແຫຼ່ງດຽວທີ່ຊ່ວຍໃຫ້ຄລິດຕະຈັກ [ກາໂຕລິກ] ໝັ້ນໃຈໃນທຸກສິ່ງທີ່ໄດ້ຮັບການເປີດເຜີຍຈາກພະເຈົ້າ. ສະນັ້ນ ທັງຄຳສອນສືບປາກແລະພະຄຳພີສັກສິດຈຶ່ງເປັນສິ່ງທີ່ຕ້ອງຍອມຮັບ ທັງຍົກຍ້ອງເທີດທູນດ້ວຍຄວາມນັບຖືແລະຄວາມພັກດີຢ່າງດຽວກັນ.” ບົດຄວາມໜຶ່ງໃນວາລະສານແມັກເຄນ ອ້າງເຖິງຄຳເວົ້າຂອງນັກເທດຄົນໜຶ່ງໃນໂຕຣອນໂຕ ການາດາ ທີ່ຖາມວ່າ “ເປັນຫຍັງເຮົາຕ້ອງຟັງສຽງຂອງ ‘ນັກປະຕິວັດ’ ຈາກຍຸກສອງພັນປີກ່ອນນຳ? ເຮົາກໍມີຄວາມຄິດດີໆຂອງເຮົາເອງ ແຕ່ຄວາມຄິດເຫຼົ່ານັ້ນກັບຖືກບົດບັງມາຕະຫຼອດເພາະເຮົາມີແຕ່ຍຶດຕິດກັບພະເຢຊູແລະພະຄຳພີ.”
ສາລານຸກົມກາໂຕລິກສະບັບໃໝ່ (ພາສາອັງກິດ) ເວົ້າເຖິງພະຍານພະເຢໂຫວາວ່າ: “ເຂົາເຈົ້າຖືວ່າຄຳພີໄບເບິນເປັນມາດຕະຖານພຽງຢ່າງດຽວສຳລັບຄວາມເຊື່ອແລະການປະພຶດຕົວ.” ເມື່ອບໍ່ດົນມານີ້ ຜູ້ຊາຍຄົນໜຶ່ງໃນການາດາເວົ້າກັບພະຍານພະເຢໂຫວາເຊິ່ງກຳລັງແນະນຳໂຕຢູ່ໜ້າປະຕູເຮືອນຂອງລາວວ່າ: “ຂ້ອຍຮູ້ວ່າເຈົ້າແມ່ນໃຜ.” ລາວຊີ້ໄປໃສ່ຄຳພີໄບເບິນແລ້ວເວົ້າວ່າ: “ຫັນເດ້ຫຼັກຖານ.”