ບົດຄວາມສຶກສາທີ 14
ການໂຈມຕີທີ່ມາຈາກທາງເໜືອ!
“ມີກອງທັບຕັກແຕນບຸກເຂົ້າມາໃນແຜ່ນດິນຂອງຂ້ອຍ.”—ໂຢເອນ 1:6
ເພງ 95 ແສງສະຫວ່າງທີ່ແຮງກ້າຂຶ້ນ
ໃຈຄວາມສຳຄັນ *
1. ພີ່ນ້ອງຣັດເຊວແລະໝູ່ໃຊ້ວິທີໃດສຶກສາຄົ້ນຄວ້າຄຳພີໄບເບິນ ແລະເປັນຫຍັງວິທີນັ້ນຈຶ່ງດີຫຼາຍ?
ຫຼາຍກວ່າ 100 ປີທີ່ຜ່ານມາ ພີ່ນ້ອງຊີ. ທີ. ຣັດເຊວແລະໝູ່ເຊິ່ງເປັນນັກສຶກສາຄຳພີໄບເບິນກຸ່ມນ້ອຍໆເລີ່ມປະຊຸມນຳກັນ. ພວກເຂົາຢາກເຂົ້າໃຈສິ່ງທີ່ຄຳພີໄບເບິນສອນແທ້ໆກ່ຽວກັບພະເຢໂຫວາພະເຈົ້າ ພະເຢຊູຄລິດ ຄ່າໄຖ່ ແລະຄົນຕາຍແລ້ວເປັນແນວໃດ. ວິທີການສຶກສາຂອງພວກເຂົາແມ່ນງ່າຍໆແບບນີ້ຄື ຄົນໜຶ່ງຈະຕັ້ງຄຳຖາມຂຶ້ນມາ ແລ້ວທຸກຄົນໃນກຸ່ມກໍຈະຄົ້ນຄວ້າຂໍ້ຄຳພີທຸກຂໍ້ທີ່ກ່ຽວກັບເລື່ອງນັ້ນ ເມື່ອໄດ້ຄຳຕອບແລ້ວພວກເຂົາກໍຈະຈົດໄວ້. ຍ້ອນພະເຢໂຫວາຊ່ວຍເຫຼືອ ພວກເຂົາຈຶ່ງເຂົ້າໃຈຄວາມຈິງພື້ນຖານໃນຄຳພີໄບເບິນ ເຊິ່ງເປັນຄວາມຮູ້ທີ່ມີຄ່າຫຼາຍສຳລັບພວກເຮົາຈົນເຖິງທຸກມື້ນີ້.
2. ອັນໃດອາດເຮັດໃຫ້ເຮົາເຂົ້າໃຈຄຳພະຍາກອນໃນຄຳພີໄບເບິນຜິດ?
2 ແຕ່ບໍ່ດົນກຸ່ມນັກສຶກສາຄຳພີໄບເບິນກໍພົບວ່າ ຄຳພະຍາກອນໃນຄຳພີໄບເບິນເຂົ້າໃຈຍາກກວ່າຫຼັກຄຳສອນພື້ນຖານໃນຄຳພີໄບເບິນ. ເປັນຫຍັງຈຶ່ງເປັນແບບນັ້ນ? ເຫດຜົນໜຶ່ງກໍຄື ເຮົາຈະເຂົ້າໃຈຄຳພະຍາກອນໄດ້ດີກໍຕໍ່ເມື່ອຄຳພະຍາກອນນັ້ນກຳລັງເກີດຂຶ້ນຫຼືສຳເລັດໄປແລ້ວ. ແຕ່ອີກເຫດຜົນໜຶ່ງກໍຄື ເພື່ອຈະເຂົ້າໃຈຄຳພະຍາກອນໄດ້ຢ່າງຖືກຕ້ອງ ເຮົາຕ້ອງເບິ່ງວ່າເນື້ອໃນນັ້ນເວົ້າເຖິງຫຍັງ. ຖ້າເຮົາເບິ່ງແຕ່ສ່ວນໃດສ່ວນໜຶ່ງຂອງຄຳພະຍາກອນແລະບໍ່ໄດ້ເບິ່ງສ່ວນອື່ນ ເຮົາກໍອາດເຂົ້າໃຈຜິດໄດ້ ເຊິ່ງເປັນແບບນັ້ນກັບຄຳພະຍາກອນຂອງໂຢເອນຄືກັນ. ຕອນນີ້ໃຫ້ເຮົາມາກວດເບິ່ງຄືນວ່າເປັນຫຍັງເຮົາຄວນປັບປ່ຽນຄວາມເຂົ້າໃຈໃນຄຳພະຍາກອນຂອງໂຢເອນ.
3-4. ເຮົາເຄີຍເຂົ້າໃຈຄຳພະຍາກອນໂຢເອນ 2:7-9 ແນວໃດ?
3 ອ່ານໂຢເອນ 2:7-9. ໂຢເອນບອກລ່ວງໜ້າວ່າຝູງຕັກແຕນຈະມາກັດກິນພືດຜັກທັງໝົດຂອງຊາວອິດສະຣາເອນ. ພວກມັນມີແຂ້ວໃຫຍ່ຄືສິງແລະຈະກັດກິນທຸກຢ່າງທີ່ຂວາງໜ້າ! (ໂຢເອນ 1:4, 6) ເປັນເວລາຫຼາຍປີທີ່ເຮົາເຂົ້າໃຈວ່າຄຳພະຍາກອນນີ້ໝາຍເຖິງປະຊາຊົນຂອງພະເຈົ້າທີ່ປະກາດຄືຝູງຕັກແຕນເຊິ່ງບໍ່ມີຫຍັງມາຫ້າມໄດ້. ເຮົາເຂົ້າໃຈວ່າການປະກາດນີ້ສົ່ງຜົນກະທົບຮ້າຍແຮງຕໍ່ “ແຜ່ນດິນ” ຫຼືຄົນທີ່ນັບຖືສາສະໜາອື່ນ. *
4 ຖ້າເຮົາອ່ານສະເພາະແຕ່ໂຢເອນ 2:7-9 ເຮົາກໍມີເຫດຜົນທີ່ຈະເຂົ້າໃຈແບບນັ້ນ ແຕ່ຖ້າເຮົາເບິ່ງເນື້ອໃນຂອງຄຳພະຍາກອນນີ້ທັງໝົດ ເຮົາກໍຈະເຫັນວ່າເຮົາຕ້ອງປ່ຽນຄວາມເຂົ້າໃຈໃໝ່ໃນເລື່ອງນີ້. ຂໍໃຫ້ເຮົາມາເບິ່ງ 4 ເຫດຜົນທີ່ເຮັດເຮົາຕ້ອງປ່ຽນຄວາມເຂົ້າໃຈໃໝ່.
ເຫດຜົນ 4 ຢ່າງທີ່ເຮົາຕ້ອງປ່ຽນຄວາມເຂົ້າໃຈໃໝ່
5-6. ເຮົາອາດມີຄຳຖາມຫຍັງເມື່ອອ່ານ (ກ) ໂຢເອນ 2:20 ແລະ (ຂ) ໂຢເອນ 2:25?
5 ເຫດຜົນທຳອິດ ຂໍໃຫ້ສັງເກດຄຳສັນຍາຂອງພະເຢໂຫວາກ່ຽວກັບຕັກແຕນທີ່ວ່າ: “ຜູ້ນັ້ນທີ່ມາແຕ່ທິດອຸດອນ [ຝູງຕັກແຕນ] ເຮົາຈະໃຫ້ໜີໄກ ຈາກພວກທ່ານ.” (ໂຢເອນ 2:20) ຖ້າຝູງຕັກແຕນໝາຍເຖິງພະຍານພະເຢໂຫວາທີ່ເຊື່ອຟັງຄຳສັ່ງຂອງພະເຢຊູທີ່ໃຫ້ໄປປະກາດແລະສອນຄົນເປັນລູກສິດ ແລ້ວເປັນຫຍັງພະເຢໂຫວາຈຶ່ງສັນຍາວ່າຈະຂັບໄລ່ພວກເຂົາອອກໄປ? (ເອເຊກ. 33:7-9; ມທ. 28:19, 20) ເຫັນໄດ້ແຈ້ງວ່າພະເຢໂຫວາບໍ່ໄດ້ໄລ່ຜູ້ຮັບໃຊ້ທີ່ສັດຊື່ຂອງພະອົງ ແຕ່ວ່າຈະໄລ່ບາງສິ່ງຫຼືບາງຄົນທີ່ເປັນສັດຕູຂອງຜູ້ຮັບໃຊ້ພະອົງ.
6 ເຫດຜົນທີ່ສອງ ຂໍໃຫ້ເບິ່ງສິ່ງທີ່ຂຽນໃນໂຢເອນ 2:25 (ລ.ມ.) ພະເຢໂຫວາບອກວ່າ: “ເຮົາຈະຊົດໃຊ້ ທີ່ເຮົາສົ່ງຝູງຕັກແຕນຝູງໃຫຍ່ໄປກິນພືດຜົນຂອງພວກເຈົ້າຫຼາຍປີຄື ຝູງຕັກແຕນ ຕັກແຕນໂຕອ່ອນ ຕັກແຕນຫິວຈັດ ແລະຕັກແຕນກິນບໍ່ອັ້ນ.” ຂໍສັງເກດທີ່ພະເຢໂຫວາບອກວ່າ “ເຮົາຈະຊົດໃຊ້” ສິ່ງທີ່ຕັກແຕນໄດ້ທຳລາຍ. ຖ້າຕັກແຕນໝາຍເຖິງປະຊາຊົນຂອງພະເຢໂຫວາກໍໝາຍຄວາມວ່າຂ່າວສານທີ່ພວກເຂົາປະກາດໄດ້ກໍ່ຄວາມເສຍຫາຍ. ແຕ່ຂ່າວສານນັ້ນສາມາດຊ່ວຍຊີວິດຄົນແລະກະຕຸ້ນຄົນຊົ່ວໃຫ້ກັບໃຈໄດ້ ເຊິ່ງນີ້ເປັນເລື່ອງທີ່ດີແທ້ໆ!—ເອເຊກ. 33:8, 19
7. ຄຳວ່າ “ພາຍຫຼັງການນັ້ນ” ໃນໂຢເອນ 2:28, 29 ເຮັດໃຫ້ເຮົາເຂົ້າໃຈຫຍັງ?
7 ອ່ານໂຢເອນ 2:28, 29. ເຫດຜົນທີສາມກ່ຽວຂ້ອງກັບລຳດັບເຫດການຂອງຄຳພະຍາກອນນີ້. ຂໍສັງເກດທີ່ພະເຢໂຫວາບອກວ່າ: “ພາຍຫຼັງການນັ້ນ ເຮົາຈະຖອກພະວິນຍານ [“ພະລັງບໍລິສຸດ,” ລ.ມ.] ຂອງເຮົາ.” ນີ້ໝາຍຄວາມວ່າພະເຈົ້າຈະໃຫ້ພະລັງບໍລິສຸດຫຼັງຈາກທີ່ຝູງຕັກແຕນເຮັດວຽກສຳເລັດແລ້ວ. ຖ້າຕັກແຕນແມ່ນປະຊາຊົນຂອງພະເຢໂຫວາທີ່ເຮັດວຽກປະກາດ ແລ້ວເປັນຫຍັງພະອົງຈຶ່ງໃຫ້ພະລັງບໍລິສຸດຫຼັງຈາກ ທີ່ພວກເຂົາປະກາດສຳເລັດແລ້ວ? ທີ່ຈິງ ພວກເຂົາຖືກຕໍ່ຕ້ານແລະຖືກສັ່ງຫ້າມຕັ້ງຫຼາຍປີ ແລະທີ່ພວກເຂົາສາມາດເຮັດວຽກປະກາດໄດ້ສຳເລັດ ກໍຍ້ອນວ່າມີພະລັງບໍລິສຸດຂອງພະເຈົ້າ.
ພີ່ນ້ອງໂຈເຊບ ເອັບຟ໌. ຣັດເທີຝອດແລະຜູ້ຖືກເຈີມຄົນອື່ນໆປະກາດຄຳພິພາກສາຂອງພະເຈົ້າຕໍ່ໂລກຊົ່ວນີ້ຢ່າງກ້າຫານ (ເບິ່ງຂໍ້ 8)
8. ຝູງຕັກແຕນທີ່ເວົ້າເຖິງໃນພະນິມິດ 9:1-11 ໝາຍເຖິງໃຜ? (ເບິ່ງຮູບໜ້າປົກ)
8 ອ່ານພະນິມິດ 9:1-11. ບັດນີ້ໃຫ້ເຮົາມາເບິ່ງເຫດຜົນທີສີ່. ຕອນນັ້ນທີ່ເຮົາເຂົ້າໃຈວ່າຝູງຕັກແຕນໃນປຶ້ມໂຢເອນໝາຍເຖິງວຽກປະກາດຂອງເຮົາ ກໍຍ້ອນໃນປຶ້ມພະນິມິດມີຄຳພະຍາກອນທີ່ຄ້າຍຄືກັນ. ຄຳພະຍາກອນນັ້ນອະທິບາຍວ່າຕັກແຕນມີໜ້າຄືກັບໜ້າຄົນແລະເທິງຫົວຂອງພວກມັນມີສິ່ງທີ່ “ເບິ່ງຄືກັບມົງກຸດຄຳ.” (ພນມ. 9:7) ພວກມັນທໍລະມານ “ຄົນ [ສັດຕູຂອງພະເຈົ້າ] ທີ່ບໍ່ມີກາປະທັບຂອງພະເຈົ້າຢູ່ໜ້າຜາກ” ເປັນເວລາຫ້າເດືອນ ເຊິ່ງສ່ຳກັບຊີວິດຂອງໂຕຕັກແຕນ. (ພນມ. 9:4, 5) ຄຳພະຍາກອນນີ້ເບິ່ງຄືວ່າໝາຍເຖິງຜູ້ຖືກເຈີມຂອງພະເຢໂຫວາ. ພວກເຂົາປະກາດຄຳພິພາກສາຂອງພະເຈົ້າຕໍ່ໂລກຊົ່ວນີ້ຢ່າງກ້າຫານ ດັ່ງນັ້ນ ຜູ້ທີ່ຢູ່ຝ່າຍໂລກຊົ່ວນີ້ຈຶ່ງຮູ້ສຶກທຸກທໍລະມານ.
9. ຝູງຕັກແຕນທີ່ໂຢເອນແລະໂຢຮັນເຫັນຕ່າງກັນແນວໃດ?
9 ເຖິງວ່າຄຳພະຍາກອນທີ່ຢູ່ໃນພະນິມິດແລະໂຢເອນຈະມີບາງຢ່າງທີ່ຄ້າຍຄືກັນ ແຕ່ກໍມີບາງຢ່າງທີ່ຕ່າງກັນຢ່າງຊັດເຈນ. ຂໍໃຫ້ຄິດເຖິງເລື່ອງເຫຼົ່ານີ້: ຄຳພະຍາກອນຂອງໂຢເອນເວົ້າເຖິງຝູງຕັກແຕນທີ່ທຳລາຍພືດຜັກ. (ໂຢເອນ 1:4, 6, 7) ແຕ່ໃນນິມິດຂອງໂຢຮັນ ຝູງຕັກແຕນ “ໄດ້ຮັບຄຳສັ່ງບໍ່ໃຫ້ສ້າງຄວາມເສຍຫາຍຕໍ່ພືດພັນໃນໂລກ.” (ພນມ. 9:4) ຝູງຕັກແຕນທີ່ໂຢເອນເຫັນແມ່ນມາຈາກທາງເໜືອ. (ໂຢເອນ 2:20) ແຕ່ຝູງຕັກແຕນທີ່ໂຢຮັນເຫັນອອກມາຈາກເຫວເລິກ. (ພນມ. 9:2, 3) ປຶ້ມໂຢເອນບອກວ່າຝູງຕັກແຕນຈະຖືກໄລ່ໜີ ສ່ວນປຶ້ມພະນິມິດບອກວ່າຝູງຕັກແຕນບໍ່ໄດ້ຖືກໄລ່ໜີ ແຕ່ຖືກປ່ອຍໃຫ້ເຮັດວຽກຈົນສຳເລັດ ແລະບໍ່ມີບ່ອນໃດບອກວ່າພະເຢໂຫວາບໍ່ພໍໃຈພວກມັນ.—ເບິ່ງຂອບ “ ຄຳພະຍາກອນເລື່ອງຝູງຕັກແຕນ ມີຈຸດຄືກັນແຕ່ແຕກຕ່າງກັນ.”
10. ຂໍໃຫ້ຍົກຕົວຢ່າງຈາກຄຳພີໄບເບິນວ່າເປັນຫຍັງເປັນໄປໄດ້ທີ່ຝູງຕັກແຕນທີ່ໂຢເອນແລະໂຢຮັນເຫັນມີຄວາມໝາຍບໍ່ຄືກັນ.
10 ເຮົາເຫັນວ່າສອງຄຳພະຍາກອນນີ້ຕ່າງກັນຢ່າງຊັດເຈນ ເຮົາຈຶ່ງສະຫຼຸບໄດ້ວ່າສອງຄຳພະຍາກອນນີ້ບໍ່ກ່ຽວຂ້ອງກັນ. ຄັນຊັ້ນ “ຕັກແຕນ” ທີ່ຢູ່ໃນປຶ້ມໂຢເອນບໍ່ຄືກັບ “ຕັກແຕນ” ທີ່ຢູ່ໃນປຶ້ມພະນິມິດບໍ? ແມ່ນແລ້ວ ບໍ່ຄືກັນເລີຍ. ມີຫຼາຍເທື່ອທີ່ຄຳພີໄບເບິນເວົ້າເຖິງບາງສິ່ງທີ່ຄືກັນ ແຕ່ມີຄວາມໝາຍຕ່າງກັນ. ຕົວຢ່າງ: ພະນິມິດ 5:5 ເອີ້ນພະເຢຊູວ່າ “ສິງຈາກຕະກູນຢູດາ” ແຕ່ 1 ເປໂຕ 5:8 ເອີ້ນມານຮ້າຍວ່າ “ໂຕສິງທີ່ຮ້ອງແຜດສຽງ.” ຈາກເຫດຜົນ 4 ຢ່າງແລະບັນຫາຕ່າງໆທີ່ເຮົາໄດ້ເບິ່ງມາແລ້ວສະແດງວ່າ ເຮົາຕ້ອງຕີຄວາມໝາຍຄຳພະຍາກອນຂອງໂຢເອນໃໝ່. ແລ້ວຄວາມໝາຍແທ້ໆຂອງຄຳພະຍາກອນນີ້ແມ່ນຫຍັງລະ?
ຄຳພະຍາກອນໃນໂຢເອນມີຄວາມໝາຍແນວໃດ?
11. ໂຢເອນ 1:6 ແລະ 2:1, 8, 11 ຊ່ວຍເຮົາໃຫ້ຮູ້ວ່າຝູງຕັກແຕນແມ່ນໃຜ?
11 ເມື່ອເຮົາຄົ້ນຄວ້າເບິ່ງຄຳພະຍາກອນຂອງໂຢເອນຢ່າງລະອຽດ ເຮົາກໍຈະຮູ້ວ່າຄຳພະຍາກອນນີ້ກຳລັງບອກລ່ວງໜ້າເຖິງການໂຈມຕີຈາກກອງກຳລັງທະຫານ. (ໂຢເອນ 1:6; 2:1, 8, 11) ພະເຢໂຫວາບອກວ່າພະອົງໃຊ້ກອງທັບ “ຝູງໃຫຍ່” (ທະຫານບາບີໂລນ) ໄປລົງໂທດຊາວອິດສະຣາເອນທີ່ບໍ່ເຊື່ອຟັງ. (ໂຢເອນ 2:25) ກອງທັບທີ່ບຸກເຂົ້າມານັ້ນຖືກເອີ້ນວ່າ: “ຜູ້ນັ້ນທີ່ມາແຕ່ທິດອຸດອນ [ທິດເໜືອ]” ການເອີ້ນແບບນີ້ເໝາະສົມແທ້ໆ ເພາະບາບີໂລນບຸກໂຈມຕີອິດສະຣາເອນຈາກທາງເໜືອ. (ໂຢເອນ 2:20) ກອງທັບນັ້ນເປັນຄືກັບຝູງຕັກແຕນທີ່ເປັນລະບຽບ. ໂຢເອນບອກວ່າ: ‘[ທະຫານ] ທຽວໄປໃນທາງເອງທຸກຄົນ . . . ເຂົາເຂົ້າໄປໃນເມືອງ ເຂົາແລ່ນເທິງກຳແພງ ເຂົາຂຶ້ນເຮືອນທັງຫຼາຍ. ເຂົາເຂົ້າທາງປ່ອງອ້ຽມຄືຂະໂມຍ.’ (ໂຢເອນ 2:8, 9) ເຈົ້ານຶກພາບອອກບໍ? ມີທະຫານຢູ່ທຸກບ່ອນ ບໍ່ມີບ່ອນໃດລີ້ໄດ້ ແລະບໍ່ມີໃຜທີ່ຈະໜີຈາກກອງທັບຂອງບາບີໂລນໄດ້!
12. ຄຳພະຍາກອນຂອງໂຢເອນເລື່ອງຝູງຕັກແຕນສຳເລັດເປັນຈິງແນວໃດ?
12 ຄືກັບຝູງຕັກແຕນ ຊາວບາບີໂລນ (ຫຼືຊາວການເດ) ໄດ້ມາໂຈມຕີເມືອງເຢຣູຊາເລັມໃນປີ 607 ກ່ອນ ຄ.ສ. ຄຳພີໄບເບິນບອກວ່າ: “ກະສັດພວກການເດເອນຂຶ້ນໄປຕໍ່ສູ້ເຂົາແລະໄດ້ຂ້າຄົນໜຸ່ມທັງຫຼາຍຂອງເຂົາດ້ວຍດາບ . . . ບໍ່ໄດ້ອີ່ດູຄົນໜຸ່ມຫຼືຜູ້ສາວປອດ ຫຼືຜູ້ເຖົ້າແກ່ຫຼືຄົນເຖົ້າແລ້ວ. ພະອົງໄດ້ມອບເຂົາທັງປວງໄວ້ໃນມືທ່ານ. ແລະເຂົາໄດ້ຈູດວິຫານຂອງພະເຈົ້າ ແລະໄດ້ມ້າງກຳແພງເມືອງເຢຣຶຊາເລມລົງ ແລະໄດ້ຈູດລາຊະວັງທັງປວງໃນເມືອງ ແລະເຄື່ອງອັນປະເສີດທັງປວງໃນເມືອງກໍໄດ້ຖືກມອບໄວ້ໃນຄວາມຈິບຫາຍ.” (2 ຂ່າວ. 36:17, 19) ຫຼັງຈາກທີ່ບາບີໂລນທຳລາຍເມືອງນີ້ແລ້ວ ຜູ້ຄົນກໍຈະເວົ້າວ່າເມືອງນີ້ “ຮ້າງເປົ່າຈົນບໍ່ມີຄົນບໍ່ມີສັດ ປະເທດນີ້ມອບໄວ້ໃນມືແຫ່ງພວກຊາວການເດແລ້ວ.”—ຢເຣ. 32:43
13. ຂໍໃຫ້ອະທິບາຍຄວາມໝາຍຂອງເຢເຣມີ 16:16, 18.
13 ປະມານ 200 ປີຫຼັງຈາກຄຳພະຍາກອນຂອງໂຢເອນ ພະເຢໂຫວາໄດ້ໃຫ້ເຢເຣມີບອກລ່ວງໜ້າກ່ຽວກັບລາຍລະອຽດຢ່າງອື່ນອີກທີ່ຈະເກີດຂຶ້ນໃນການໂຈມຕີນັ້ນ. ພະອົງບອກວ່າຜູ້ທີ່ມາໂຈມຕີຈະຊອກຫາຊາວອິດສະຣາເອນທີ່ເຮັດສິ່ງຊົ່ວແລະຈັບພວກເຂົາທຸກຄົນ. “ພະເຢໂຫວາກ່າວວ່າ ‘ດັ່ງນີ້ເຮົາເກນຄົນພານປາຫຼາຍຄົນແລະເຂົາຈະຈັບເຂົາຄືປາ ແລະພາຍຫຼັງນັ້ນເຮົາຈະເກນຄົນພານເນື້ອຫຼາຍຄົນທີ່ຈະຈັບເຂົາຄືຈັບເນື້ອ ແຕ່ພູທັງປວງແຕ່ດອນທັງປວງແລະແຕ່ໂກນຫີນດານທັງຫຼາຍ ແລະເຮົາຈະຕອບແທນການອະທຳກັບການບາບຂອງເຂົາ 2 ທໍ່ . . . ຍ້ອນເຂົາໄດ້ໃຫ້ແຜ່ນດິນຂອງເຂົາຖືກຖ່ອຍຮ້າຍດ້ວຍຊາກສົບທັງຫຼາຍແຫ່ງສິ່ງຂອງອັນໜ້າກຽດໜ້າຊັງຂອງເຂົາ ແລະເຂົາໄດ້ໃຫ້ດິນມູນຂອງເຮົາເຕັມໄປດ້ວຍສິ່ງຂອງອັນໜ່າຍແໜງຂອງເຂົາ.’” ບໍ່ວ່າຊາວອິດສະຣາເອນທີ່ບໍ່ກັບໃຈຈະໜີໄປລີ້ຢູ່ປ່າຫຼືມະຫາສະໝຸດ ພວກເຂົາກໍໜີບໍ່ລອດຈາກພວກບາບີໂລນ.—ຢເຣ. 16:16, 18.
ການຟື້ນຟູ
14. ໂຢເອນ 2:28, 29 ສຳເລັດເປັນຈິງຕອນໃດ?
14 ໂຢເອນມີຂ່າວດີທີ່ຈະບອກໃຫ້ຮູ້ຄື ແຜ່ນດິນຈະກັບມາມີຄວາມອຸດົມສົມບູນອີກຄັ້ງ. (ໂຢເອນ 2:23-26) ຫຼັງຈາກນັ້ນ ໃນອະນາຄົດຈະມີຄວາມຮູ້ເລື່ອງຄວາມຈິງຢ່າງຫຼວງຫຼາຍໃຫ້ກັບທຸກຄົນ. ພະເຢໂຫວາບອກວ່າ: “ເຮົາຈະຖອກພະວິນຍານ [“ພະລັງບໍລິສຸດ,” ລ.ມ.] ຂອງເຮົາລົງໃສ່ເທິງເນື້ອທັງປວງແລະລູກຊາຍລູກຍິງທັງຫຼາຍຂອງພວກທ່ານຈະທຳນວາຍ . . . ແລະໃນຄາວນັ້ນເຮົາຈະຖອກພະວິນຍານ [“ພະລັງບໍລິສຸດ,” ລ.ມ.] ຂອງເຮົາລົງໃສ່ເທິງຂ້າໃຊ້ຊາຍຍິງທັງຫຼາຍດ້ວຍ.” (ໂຢເອນ 2:28, 29) ເຫດການນີ້ບໍ່ໄດ້ເກີດຂຶ້ນທັນທີຫຼັງຈາກທີ່ຊາວອິດສະຣາເອນກັບຈາກບາບີໂລນໄປບ້ານເກີດເມືອງນອນ ແຕ່ເກີດຂຶ້ນໃນຫຼາຍຮ້ອຍປີຕໍ່ມາໃນວັນເພັນເຕກອດປີ ຄ.ສ 33. ເຮົາຮູ້ໄດ້ແນວໃດ?
15. ຕາມກິດຈະການ 2:16, 17 ເປໂຕໄດ້ປັບຄຳເວົ້າຫຍັງໃນຄຳພະຍາກອນຂອງໂຢເອນ 2:28 ແລະເລື່ອງນີ້ເຮັດໃຫ້ເຮົາຮູ້ຫຍັງ?
15 ໃນວັນເພັນເຕກອດ ອັກຄະສາວົກເປໂຕຖືກດົນໃຈໃຫ້ບອກວ່າເຫດການທີ່ໜ້າງຶດງໍ້ເຊິ່ງເກີດຂຶ້ນໃນມື້ນັ້ນເປັນໄປຕາມໂຢເອນ 2:28, 29. ປະມານ 9 ໂມງເຊົ້າຂອງມື້ນັ້ນ ພະເຈົ້າໄດ້ເທພະລັງບໍລິສຸດເຊິ່ງເຮັດໃຫ້ຄົນທີ່ໄດ້ຮັບພະລັງນັ້ນເລີ່ມເວົ້າເຖິງ “ສິ່ງມະຫັດສະຈັນຕ່າງໆຂອງພະເຈົ້າ.” (ກຈກ. 2:11) ຕອນທີ່ເປໂຕຍົກຄຳພະຍາກອນຂອງໂຢເອນມາເວົ້າ ລາວຖືກດົນໃຈໃຫ້ປັບຄຳເວົ້າຂອງໂຢເອນ. ເຈົ້າສັງເກດເຫັນຄຳເວົ້າທີ່ລາວປັບບໍ? (ອ່ານກິດຈະການ 2:16, 17) ແທນທີ່ຈະເລີ່ມດ້ວຍຄຳວ່າ “ຢູ່ມາພາຍຫຼັງການນັ້ນ” ເປໂຕພັດບອກວ່າ: “ໃນສະໄໝສຸດທ້າຍ” ຕາມແວດບົດນີ້ໝາຍເຖິງ ໃນສະໄໝສຸດທ້າຍຂອງລະບົບຢິວເຊິ່ງກໍຄື ບໍ່ດົນກ່ອນທີ່ເມືອງເຢຣູຊາເລັມແລະວິຫານຈະຖືກທຳລາຍ ພະເຈົ້າຈະເທພະລັງບໍລິສຸດຂອງພະອົງໃຫ້ “ກັບຄົນທຸກປະເພດ.” ເລື່ອງນີ້ເຮັດໃຫ້ເຫັນວ່າຈະຕ້ອງໃຊ້ເວລາໄລຍະໜຶ່ງກ່ອນ ກ່ອນທີ່ຄຳພະຍາກອນຂອງໂຢເອນຈະສຳເລັດເປັນຈິງ.
16. ພະລັງບໍລິສຸດຂອງພະເຈົ້າສົ່ງຜົນແນວໃດຕໍ່ວຽກປະກາດໃນສະຕະວັດທຳອິດ ແລະໃນທຸກມື້ນີ້?
16 ຫຼັງຈາກທີ່ພະເຈົ້າເທພະລັງບໍລິສຸດໃຫ້ຄລິດສະຕຽນສະຕະວັດທຳອິດ ພວກເຂົາກໍເລີ່ມເຮັດວຽກປະກາດເຊິ່ງໃນທີ່ສຸດກໍຂະຫຍາຍໄປທົ່ວໂລກ. ເມື່ອໂປໂລຂຽນຈົດໝາຍໄປຫາພີ່ນ້ອງໃນເມືອງໂກໂລຊາຍປະມານປີ ຄ.ສ 61 ລາວກໍສາມາດເວົ້າໄດ້ວ່າຂ່າວດີໄດ້ຮັບການ “ປະກາດໄປທຸກແຫ່ງທົ່ວໃຕ້ຟ້າ.” (ກລຊ. 1:23) ເມື່ອໂປໂລເວົ້າວ່າ “ທຸກແຫ່ງ” ລາວໝາຍເຖິງໂລກເຊິ່ງເປັນທີ່ຮູ້ຈັກໃນສະໄໝນັ້ນ. ຍ້ອນພະລັງບໍລິສຸດຂອງພະເຢໂຫວາຊ່ວຍ ໃນທຸກມື້ນີ້ວຽກປະກາດຈຶ່ງຂະຫຍາຍຫຼາຍ “ໄປຈົນຮອດສຸດຂອບໂລກ.”—ກຈກ. 13:47; ເບິ່ງຂອບ “ ເຮົາຈະຖອກພະວິນຍານ [“ພະລັງບໍລິສຸດ,” ລ.ມ.] ຂອງເຮົາ”
ມີຫຍັງທີ່ປ່ຽນແປງ?
17. ມີການປັບປ່ຽນຄວາມເຂົ້າໃຈໃໝ່ກ່ຽວກັບຄຳພະຍາກອນຂອງໂຢເອນເລື່ອງຝູງຕັກແຕນແນວໃດ?
17 ມີຫຍັງທີ່ປ່ຽນແປງ? ຕອນນີ້ເຮົາເຂົ້າໃຈຄຳພະຍາກອນໃນໂຢເອນ 2:7-9 ຫຼາຍຂຶ້ນ. ເຫັນໄດ້ແຈ້ງວ່າ ຄຳພະຍາກອນນີ້ບໍ່ໄດ້ໝາຍເຖິງການເຮັດວຽກປະກາດຢ່າງກະຕືລືລົ້ນຂອງເຮົາ ແຕ່ໝາຍເຖິງການທີ່ກອງທັບບາບີໂລນມາໂຈມຕີເມືອງເຢຣູຊາເລັມໃນປີ 607 ກ່ອນ ຄ.ສ.
18. ມີຫຍັງທີ່ບໍ່ປ່ຽນແປງກ່ຽວກັບປະຊາຊົນຂອງພະເຢໂຫວາ?
18 ແລ້ວມີຫຍັງທີ່ບໍ່ປ່ຽນແປງ? ປະຊາຊົນຂອງພະເຢໂຫວາປະກາດຂ່າວດີຕໍ່ໄປ ບໍ່ວ່າຈະຢູ່ໃສກໍຕາມແລະໃຊ້ທຸກວິທີເພື່ອຈະປະກາດໃຫ້ໄດ້. (ມທ. 24:14) ບໍ່ມີລັດຖະບານໃດທີ່ຈະສັ່ງຫ້າມຫຼືຂັດຂວາງເຮົາບໍ່ໃຫ້ເຮັດຕາມຄຳສັ່ງທີ່ໃຫ້ປະກາດໄດ້. ແລະຍ້ອນພະເຢໂຫວາອວຍພອນ ພວກເຮົາຈຶ່ງຫ້າວຫັນເຮັດວຽກປະກາດຂ່າວດີຢ່າງກ້າຫານຫຼາຍກວ່າເກົ່າ! ຂໍໃຫ້ເຮົາຖ່ອມໃຈຕໍ່ໆໄປທີ່ຈະໝາຍເພິ່ງການຊີ້ນຳຈາກພະເຢໂຫວາເພື່ອຈະເຂົ້າໃຈຄຳພະຍາກອນໃນຄຳພີໄບເບິນ ແລະໝັ້ນໃຈວ່າເມື່ອເຖິງເວລາທີ່ເໝາະສົມ ພະອົງຈະຊ່ວຍເຮົາໃຫ້ “ເຂົ້າໃຈຄວາມຈິງທັງໝົດ”!—ຢຮ. 16:13
ເພງ 97 ຊີວິດເຮົາຕ້ອງອາໄສຄຳສອນຂອງພະເຈົ້າ
^ ຂໍ້ 5 ເປັນເວລາຫຼາຍປີທີ່ເຮົາເຊື່ອວ່າຄຳພະຍາກອນທີ່ບັນທຶກໃນໂຢເອນບົດ 1 ແລະ 2 ໝາຍເຖິງວຽກປະກາດຂອງເຮົາໃນປັດຈຸບັນ. ແຕ່ເຮົາມີເຫດຜົນທີ່ດີ 4 ຢ່າງທີ່ຕ້ອງປ່ຽນຄວາມເຂົ້າໃຈໃໝ່ກ່ຽວກັບເລື່ອງນີ້. ແລ້ວມີເຫດຜົນຫຍັງແດ່?
^ ຂໍ້ 3 ຕົວຢ່າງ: ເບິ່ງບົດຄວາມ “ສະຕິປັນຍາຂອງພະເຢໂຫວາເຫັນໄດ້ຈາກສິ່ງທີ່ພະອົງສ້າງ” ໃນຫໍສັງເກດການ 15 ເມສາ 2009 ຂໍ້ 14-16 (ພາສາໄທ)
