ມັດທາຍບົດທີ 5-7
5 ເມື່ອພະເຢຊູເຫັນຄົນຈຳນວນຫຼາຍ ເພິ່ນໄດ້ຍ່າງຂຶ້ນພູ ແລ້ວກໍນັ່ງລົງ ແລະພວກລູກສິດໄດ້ເຂົ້າມາຫາເພິ່ນ. 2 ຈາກນັ້ນ ພະເຢຊູເລີ່ມສອນພວກເຂົາວ່າ:
3 “ຄົນທີ່ຮູ້ຕົວວ່າຈຳເປັນຕ້ອງເພິ່ງພະເຈົ້າກໍມີຄວາມສຸກ ຍ້ອນການປົກຄອງທີ່ຢູ່ໃນສະຫວັນເປັນຂອງພວກເຂົາ.
4 ຄົນທີ່ໂສກເສົ້າກໍມີຄວາມສຸກ ຍ້ອນພວກເຂົາຈະໄດ້ຮັບການປອບໃຈ.
5 ຄົນທີ່ຈິດໃຈອ່ອນໂຍນ aກໍມີຄວາມສຸກ ຍ້ອນພວກເຂົາຈະໄດ້ຮັບໂລກເປັນລາງວັນ.
6 ຄົນທີ່ຫິວກະຫາຍຢາກເຫັນຄວາມຍຸຕິທຳກໍມີຄວາມສຸກ ຍ້ອນພວກເຂົາຈະອີ່ມໃຈທີ່ໄດ້ຮັບຄວາມຍຸຕິທຳ.
7 ຄົນທີ່ເມດຕາກໍມີຄວາມສຸກ ຍ້ອນພວກເຂົາຈະໄດ້ຮັບຄວາມເມດຕາ.
8 ຄົນທີ່ມີໃຈບໍລິສຸດກໍມີຄວາມສຸກ ຍ້ອນພວກເຂົາຈະໄດ້ເຫັນພະເຈົ້າ.
9 ຄົນທີ່ສ້າງສັນຕິກໍມີຄວາມສຸກ ຍ້ອນພວກເຂົາຈະຖືກເອີ້ນວ່າເປັນລູກຂອງພະເຈົ້າ.
10 ຄົນທີ່ຖືກຂົ່ມເຫງເພາະເຮັດສິ່ງທີ່ຖືກຕ້ອງກໍມີຄວາມສຸກ ຍ້ອນການປົກຄອງທີ່ຢູ່ໃນສະຫວັນເປັນຂອງພວກເຂົາ.
11 ເມື່ອພວກເຈົ້າຖືກຄົນອື່ນດ່າ ຂົ່ມເຫງ ແລະໃສ່ຮ້າຍຍ້ອນຕິດຕາມຂ້ອຍ ພວກເຈົ້າກໍມີຄວາມສຸກ. 12 ຂໍໃຫ້ຍິນດີ ຍ້ອນພວກເຈົ້າຈະໄດ້ລາງວັນທີ່ມີຄ່າຫຼາຍໃນສະຫວັນ ພວກຜູ້ພະຍາກອນໃນສະໄໝກ່ອນກໍຖືກຂົ່ມເຫງຄືກັນກັບພວກເຈົ້າ.
13 ພວກເຈົ້າເປັນຄືກັບເກືອໃນໂລກນີ້ ແຕ່ຖ້າເກືອບໍ່ເຄັມແລ້ວ ຈະເຮັດໃຫ້ກັບມາເຄັມອີກໄດ້ແນວໃດ? ຈະເອົາໄປເຮັດຫຍັງກໍບໍ່ໄດ້ ມີແຕ່ຈະເອົາໄປຖິ້ມໃຫ້ຄົນຢຽບຍ່ຳເທົ່ານັ້ນ.
14 ພວກເຈົ້າເປັນຄືກັບແສງສະຫວ່າງຂອງໂລກ. ເມືອງທີ່ຕັ້ງຢູ່ເທິງພູເຂົາຈະເຊື່ອງໄວ້ຈາກສາຍຕາຄົນກໍບໍ່ໄດ້. 15 ເມື່ອຄົນເຮົາໄຕ້ຕະກຽງແລ້ວຈະບໍ່ເອົາກະຕ່າມາງວມໄວ້ ແຕ່ຕັ້ງໄວ້ເທິງຂາຕະກຽງເພື່ອຈະສ່ອງແສງສະຫວ່າງໃຫ້ທຸກຄົນທີ່ຢູ່ໃນເຮືອນ. 16 ຄ້າຍຄືກັນ ໃຫ້ພວກເຈົ້າສ່ອງແສງສະຫວ່າງໃຫ້ຄົນອື່ນເຫັນດ້ວຍການເຮັດດີ ເມື່ອພວກເຂົາເຫັນ ພວກເຂົາກໍຈະຍ້ອງຍໍສັນລະເສີນພະເຈົ້າຜູ້ເປັນພໍ່ຂອງພວກເຈົ້າທີ່ຢູ່ໃນສະຫວັນ.
17 ຢ່າຄິດວ່າຂ້ອຍມາຍົກເລີກກົດໝາຍຂອງໂມເຊຫຼືຄຳສອນຂອງພວກຜູ້ພະຍາກອນ. ຂ້ອຍບໍ່ໄດ້ມາເພື່ອລົບລ້າງສິ່ງນັ້ນ ແຕ່ມາເຮັດໃຫ້ສຳເລັດ. 18 ຂ້ອຍຈະບອກໃຫ້ຮູ້ວ່າ ຟ້າກັບດິນຈະສູນຫາຍໄປກໍຍັງງ່າຍກວ່າທີ່ຕົວໜັງສືຕົວນ້ອຍໆຕົວໜຶ່ງຫຼືສ່ວນໃດສ່ວນໜຶ່ງຂອງຕົວໜັງສືໃນກົດໝາຍນັ້ນຈະຫາຍໄປ ທຸກຢ່າງທີ່ຂຽນໄວ້ຈະຕ້ອງເກີດຂຶ້ນຢ່າງແນ່ນອນ. 19 ດັ່ງນັ້ນ ຄົນທີ່ບໍ່ເຮັດຕາມກົດໝາຍເລັກໆນ້ອຍໆພຽງຂໍ້ໜຶ່ງແລະຍັງສອນຄົນອື່ນບໍ່ໃຫ້ເຮັດນຳ ຄົນນັ້ນກໍບໍ່ເໝາະສົມທີ່ຈະມີສ່ວນໃນການປົກຄອງທີ່ຢູ່ໃນສະຫວັນ. ສ່ວນຄົນທີ່ເຮັດຕາມແລະສອນຄົນອື່ນໃຫ້ເຮັດນຳ ຄົນນັ້ນກໍເໝາະສົມທີ່ຈະມີສ່ວນໃນການປົກຄອງທີ່ຢູ່ໃນສະຫວັນ. 20 ແລະຂ້ອຍຈະບອກໃຫ້ຮູ້ວ່າ ຖ້າພວກເຈົ້າບໍ່ເຮັດດີໃຫ້ຫຼາຍກວ່າພວກຄູສອນສາສະໜາແລະພວກຟາຣິຊາຍ ພວກເຈົ້າຈະບໍ່ມີສ່ວນໃນການປົກຄອງທີ່ຢູ່ໃນສະຫວັນ.
21 ພວກເຈົ້າເຄີຍໄດ້ຍິນທີ່ຄົນໃນສະໄໝກ່ອນສອນກັນວ່າ: ‘ຢ່າຂ້າຄົນ ຖ້າຜູ້ໃດຂ້າຄົນ ລາວຈະຕ້ອງຖືກສານຕັດສິນ.’ 22 ແຕ່ຂ້ອຍຈະບອກພວກເຈົ້າວ່າ ທຸກຄົນທີ່ໃຈຮ້າຍໃຫ້ຄົນອື່ນບໍ່ເຊົາຈະຕ້ອງຖືກສານຕັດສິນ ແລະຜູ້ໃດກໍຕາມທີ່ເອີ້ນຄົນອື່ນແບບດູຖູກຢຽດຫຍາມຈະຕ້ອງຖືກສານສູງຕັດສິນ ແລະຖ້າຜູ້ໃດເວົ້າວ່າ: ‘ຈັ່ງແມ່ນເຈົ້າໂງ່ ເຈົ້າຈ້າເນາະ!’ ຈະຕ້ອງຖືກໂທດໃນເກເຮັນນາ bເຊິ່ງມີໄຟທີ່ຮ້ອນແຮງ.
23 ດັ່ງນັ້ນ ຖ້າພວກເຈົ້າເອົາເຄື່ອງຖວາຍມາທີ່ແທ່ນບູຊາແລະຄິດພໍ້ວ່າຍັງມີຄົນຄຽດໃຫ້ເຈົ້າຢູ່ 24 ໃຫ້ວາງເຄື່ອງຖວາຍໄວ້ຕໍ່ໜ້າແທ່ນບູຊາແລະໄປຄືນດີກັບລາວກ່ອນ ແລ້ວຈຶ່ງກັບມາຖວາຍເຄື່ອງນັ້ນ.
25 ຖ້າມີຜູ້ໃດຟ້ອງຮ້ອງເຈົ້າ ໃຫ້ຟ້າວຕົກລົງກັບລາວຕອນທີ່ກຳລັງໄປສານ ຖ້າບໍ່ດັ່ງນັ້ນລາວຈະສົ່ງເຈົ້າໃຫ້ຜູ້ພິພາກສາຕັດສິນ ແລະຜູ້ພິພາກສາຈະສົ່ງເຈົ້າໃຫ້ຜູ້ຄຸມຄຸກ ແລ້ວເຈົ້າຈະຕິດຄຸກ. 26 ຂ້ອຍຈະບອກໃຫ້ຮູ້ວ່າ ເຈົ້າຈະບໍ່ໄດ້ອອກຈາກຄຸກແທ້ໆຈົນກວ່າຈະໃຊ້ໜີ້ໃຫ້ຄົບທຸກກີບ.
27 ພວກເຈົ້າເຄີຍໄດ້ຍິນຄຳເວົ້າທີ່ວ່າ: ‘ຢ່າຫຼິ້ນຊູ້.’ 28 ແຕ່ຂ້ອຍຈະບອກພວກເຈົ້າວ່າ ທຸກຄົນທີ່ແນມເບິ່ງຜູ້ຍິງຈົນເກີດຄວາມຕ້ອງການທາງເພດ ກໍເປັນຊູ້ໃນໃຈກັບຜູ້ຍິງຄົນນັ້ນແລ້ວ. 29 ຖ້າຕາເບື້ອງຂວາຂອງເຈົ້າເຮັດໃຫ້ເຈົ້າຫຼົງເຮັດຜິດ ຄວັດມັນຖິ້ມໂລດ ເພາະວ່າເສຍອະໄວຍະວະຢ່າງໜຶ່ງກໍດີກວ່າໝົດໂຕຖືກໂຍນລົງໃນເກເຮັນນາ. c 30 ຖ້າມືເບື້ອງຂວາຂອງເຈົ້າເຮັດໃຫ້ເຈົ້າຫຼົງເຮັດຜິດ ຕັດມັນຖິ້ມໂລດ ເພາະວ່າເສຍອະໄວຍະວະຢ່າງໜຶ່ງກໍດີກວ່າໝົດໂຕຖືກໂຍນລົງໃນເກເຮັນນາ. d
31 ຍັງມີຄຳເວົ້າອີກວ່າ: ‘ຖ້າຜູ້ໃດຢ່າຮ້າງກັບເມຍ ກໍໃຫ້ລາວເຮັດໃບຢ່າຮ້າງໃຫ້ເມຍນຳ.’ 32 ແຕ່ຂ້ອຍຈະບອກພວກເຈົ້າວ່າ ຜູ້ຊາຍທີ່ຢ່າຮ້າງກັບເມຍທັງໆທີ່ເມຍບໍ່ໄດ້ເຮັດຜິດສິນລະທຳທາງເພດ e ລາວກໍເຮັດໃຫ້ເມຍມີຄວາມສ່ຽງທີ່ຈະມີຊູ້ ແລະຄົນທີ່ແຕ່ງດອງກັບຜູ້ຍິງທີ່ຢ່າຮ້າງແບບນີ້ກໍເປັນຊູ້ກັບລາວຄືກັນ.
33 ແລະພວກເຈົ້າເຄີຍໄດ້ຍິນທີ່ຄົນໃນສະໄໝກ່ອນຖືກສອນວ່າ: ‘ຢ່າເຮັດຜິດຄຳສາບານ ເມື່ອປະຕິຍານໄວ້ກັບພະເຢໂຫວາແລ້ວເຈົ້າຕ້ອງເຮັດຕາມນັ້ນ.’ 34 ແຕ່ຂ້ອຍຈະບອກພວກເຈົ້າວ່າຢ່າສາບານເລີຍ. ຢ່າສາບານໂດຍອ້າງສະຫວັນ ເພາະສະຫວັນເປັນບັນລັງຂອງພະເຈົ້າ 35 ຢ່າສາບານໂດຍອ້າງໂລກ ເພາະໂລກນີ້ເປັນບ່ອນວາງຕີນຂອງພະອົງ ແລະຢ່າອ້າງເຢຣູຊາເລັມ ເພາະເຢຣູຊາເລັມເປັນເມືອງຂອງກະສັດອົງທີ່ຍິ່ງໃຫຍ່. 36 ແລະຢ່າສາບານໂດຍເອົາຫົວຂອງຕົວເອງເປັນປະກັນ ເພາະເຈົ້າຄວບຄຸມຜົມເສັ້ນໜຶ່ງໃຫ້ຂາວຫຼືດຳກໍບໍ່ໄດ້. 37 ໃຫ້ຄຳເວົ້າຂອງພວກເຈົ້າທີ່ວ່າ ‘ແມ່ນ’ ກໍໃຫ້ໝາຍຄວາມວ່າແມ່ນ ທີ່ວ່າ ‘ບໍ່’ ກໍໃຫ້ໝາຍຄວາມວ່າບໍ່ ຖ້າເວົ້າເກີນນີ້ກໍມາຈາກຕົວຊົ່ວຮ້າຍ.
38 ພວກເຈົ້າເຄີຍໄດ້ຍິນຄຳເວົ້າທີ່ວ່າ: ‘ຕາແທນຕາ ແຂ້ວແທນແຂ້ວ.’ 39 ແຕ່ຂ້ອຍຈະບອກພວກເຈົ້າວ່າ: ຢ່າຕໍ່ສູ້ກັບຄົນທີ່ເຮັດຊົ່ວຕໍ່ເຈົ້າ ຖ້າຜູ້ໃດຕົບແກ້ມເບື້ອງຂວາຂອງເຈົ້າກໍປິ່ນແກ້ມເບື້ອງຊ້າຍໃຫ້ລາວນຳ. 40 ແລະຖ້າຜູ້ໃດຟ້ອງຮ້ອງຈະເອົາເສື້ອໂຕທາງໃນຂອງເຈົ້າ ກໍເອົາເສື້ອຄຸມໃຫ້ລາວນຳ. 41 ແລະຖ້າຜູ້ໃດສັ່ງເຈົ້າໃຫ້ໄປ 1 ກິໂລແມັດ ກໍໃຫ້ໄປ 2 ກິໂລແມັດໂລດ. 42 ຖ້າຜູ້ໃດຂໍຫຍັງນຳເຈົ້າກໍເອົາໃຫ້ລາວໂລດ ຜູ້ໃດມາຢືມຫຍັງນຳເຈົ້າກໍເອົາໃຫ້ລາວຢືມ fໂລດ.
43 ພວກເຈົ້າເຄີຍໄດ້ຍິນຄຳເວົ້າທີ່ວ່າ: ‘ໃຫ້ຮັກເພື່ອນບ້ານແລະຊັງສັດຕູ.’ 44 ແຕ່ຂ້ອຍຈະບອກພວກເຈົ້າວ່າ: ໃຫ້ຮັກສັດຕູແລະອະທິດຖານເພື່ອຄົນທີ່ຂົ່ມເຫງພວກເຈົ້າ 45 ຖ້າເຮັດແນວນັ້ນ ພວກເຈົ້າກໍຈະເປັນລູກແທ້ໆຂອງພະເຈົ້າຜູ້ເປັນພໍ່ທີ່ຢູ່ໃນສະຫວັນ ເພາະພະອົງໃຫ້ດວງຕາເວັນສ່ອງແສງແກ່ທັງຄົນດີແລະຄົນຊົ່ວ ແລະໃຫ້ຝົນຕົກແກ່ຄົນເຮັດດີແລະຄົນເຮັດຊົ່ວ. 46 ຖ້າພວກເຈົ້າຮັກແຕ່ຄົນທີ່ຮັກພວກເຈົ້າ ພວກເຈົ້າກໍບໍ່ໄດ້ດີກວ່າຄົນອື່ນແມ່ນບໍ? ພວກຄົນເກັບພາສີກໍເຮັດແບບນັ້ນຄືກັນ. 47 ແລະຖ້າພວກເຈົ້າທັກທາຍແຕ່ໝູ່ຂອງພວກເຈົ້າ ພວກເຈົ້າເຮັດຫຍັງພິເສດກວ່າຄົນອື່ນໆບໍ? ຄົນຊາດອື່ນກໍເຮັດແບບນັ້ນຄືກັນ. 48 ດັ່ງນັ້ນ ພວກເຈົ້າຕ້ອງເປັນຄົນດີພ້ອມ gຄືກັບພະເຈົ້າຜູ້ເປັນພໍ່ທີ່ຢູ່ໃນສະຫວັນ.”
6 “ລະວັງ ຢ່າເຮັດດີເພື່ອອວດຄົນອື່ນ ຖ້າເຮັດແນວນັ້ນ ພວກເຈົ້າຈະບໍ່ໄດ້ຮັບລາງວັນຈາກພະເຈົ້າຜູ້ເປັນພໍ່ທີ່ຢູ່ໃນສະຫວັນ. 2 ເວລາທີ່ເຈົ້າຊ່ວຍເຫຼືອຄົນທຸກ h ຢ່າເປັນຄືຄົນທີ່ເຮັດດີເພື່ອຈະໄດ້ໜ້າເຊິ່ງມັກໂຄສະນາຄວາມດີຂອງຕົວເອງໃນບ່ອນປະຊຸມແລະຕາມຖະໜົນເພື່ອໃຫ້ຄົນມາຍົກຍ້ອງ. ຂ້ອຍຈະບອກໃຫ້ຮູ້ວ່າ ພວກເຂົາໄດ້ລາງວັນສ່ຳນັ້ນແຫຼະ. 3 ເມື່ອເຈົ້າຊ່ວຍເຫຼືອຄົນທຸກ ຢ່າໃຫ້ມືເບື້ອງຊ້າຍຮູ້ວ່າມືເບື້ອງຂວາເຮັດຫຍັງ 4 ໃຫ້ເຮັດເປັນຄວາມລັບ ແລ້ວພໍ່ຂອງເຈົ້າຜູ້ເຫັນທຸກສິ່ງທີ່ເຈົ້າເຮັດກໍຈະໃຫ້ລາງວັນເຈົ້າ.
5 ຕອນທີ່ພວກເຈົ້າອະທິດຖານ ຢ່າເຮັດຄືກັບຄົນໜ້າຊື່ໃຈຄົດທີ່ຢືນໃນບ່ອນປະຊຸມແລະຕາມແຈຖະໜົນໃຫຍ່ເພື່ອອວດຄົນອື່ນ. ຂ້ອຍຈະບອກໃຫ້ຮູ້ວ່າ ພວກເຂົາໄດ້ລາງວັນສ່ຳນັ້ນແຫຼະ. 6 ແຕ່ເມື່ອອະທິດຖານ ໃຫ້ເຂົ້າໄປໃນຫ້ອງສ່ວນຕົວ ອັດປະຕູແລະອະທິດຖານເຖິງພະເຈົ້າຜູ້ເປັນພໍ່ທີ່ເຈົ້າເບິ່ງບໍ່ເຫັນ ແລ້ວພະອົງຜູ້ເຫັນທຸກສິ່ງທີ່ເຈົ້າເຮັດກໍຈະໃຫ້ລາງວັນເຈົ້າ. 7 ຕອນທີ່ເຈົ້າອະທິດຖານ ຢ່າເວົ້າຊ້ຳຄຳເກົ່າຄືກັບຄົນຕ່າງຊາດເຮັດ ຍ້ອນພວກເຂົາຄິດວ່າ ເວົ້າຫຼາຍໆຈຶ່ງຈະໄດ້ຮັບຄຳຕອບ. 8 ຢ່າເຮັດຄືກັບພວກເຂົາ ເພາະພະເຈົ້າຜູ້ເປັນພໍ່ຂອງພວກເຈົ້າຮູ້ວ່າພວກເຈົ້າຕ້ອງການຫຍັງກ່ອນທີ່ພວກເຈົ້າຈະຂໍນຳເພິ່ນຊ້ຳ.
9 ພວກເຈົ້າຄວນອະທິດຖານແບບນີ້:
‘ພະເຈົ້າ ພໍ່ຂອງພວກເຮົາທີ່ຢູ່ໃນສະຫວັນ ຂໍໃຫ້ຊື່ຂອງພະອົງເປັນທີ່ເຄົາລົບນັບຖືຢູ່ສະເໝີ. i 10 ຂໍໃຫ້ການປົກຄອງຂອງພະອົງມາທີ່ໂລກນີ້ ແລະຂໍໃຫ້ທຸກຢ່າງໃນໂລກແລະໃນສະຫວັນເປັນໄປຕາມທີ່ພະອົງຕ້ອງການໃຫ້ເປັນ. 11 ຂໍໃຫ້ພວກເຮົາມີອາຫານກິນໃນມື້ນີ້. 12 ຂໍພະອົງຍົກໂທດໃຫ້ພວກເຮົາຄືກັບທີ່ພວກເຮົາຍົກໂທດໃຫ້ຄົນທີ່ເຮັດຜິດຕໍ່ພວກເຮົາ. 13 ຂໍພະອົງຊ່ວຍພວກເຮົາຢ່າໃຫ້ຍອມແພ້ຕໍ່ການລໍ້ໃຈແລະຂໍຊ່ວຍພວກເຮົາໃຫ້ພົ້ນຈາກຕົວຊົ່ວຮ້າຍ.’
14 ຖ້າເຈົ້າໃຫ້ອະໄພຄົນທີ່ເຮັດຜິດຕໍ່ເຈົ້າ ພະເຈົ້າຜູ້ເປັນພໍ່ທີ່ຢູ່ໃນສະຫວັນກໍຈະໃຫ້ອະໄພເຈົ້າຄືກັນ. 15 ແຕ່ຖ້າເຈົ້າບໍ່ໃຫ້ອະໄພຄົນອື່ນ ພະອົງກໍຈະບໍ່ໃຫ້ອະໄພເຈົ້າຄືກັນ.
16 ເວລາເຈົ້າຖືສິນອົດອາຫານ ຢ່າເຮັດໜ້າເສົ້າໝອງຄືກັບຄົນທີ່ເຮັດທຳທ່າວ່າເຫຼື້ອມໃສພະເຈົ້າ ຍ້ອນຄົນພວກນັ້ນປ່ອຍໃຫ້ໜ້າໂຊມເພື່ອໃຫ້ຄົນເຫັນວ່າອົດອາຫານ. ຂ້ອຍຈະບອກໃຫ້ຮູ້ວ່າ ພວກເຂົາໄດ້ລາງວັນສ່ຳນັ້ນແຫຼະ. 17 ແຕ່ເມື່ອເຈົ້າຖືສິນອົດອາຫານ ໃຫ້ລ້າງໜ້າແລະເອົານ້ຳມັນໃສ່ຜົມ 18 ເພື່ອຈະບໍ່ມີໃຜຮູ້ວ່າເຈົ້າກຳລັງຖືສິນອົດອາຫານຢູ່ ຍົກເວັ້ນພະເຈົ້າຜູ້ເປັນພໍ່ຂອງເຈົ້າເທົ່ານັ້ນທີ່ຮູ້ ແລ້ວພະອົງຜູ້ເຫັນທຸກສິ່ງທີ່ເຈົ້າເຮັດກໍຈະໃຫ້ລາງວັນເຈົ້າ.
19 ໃຫ້ເຊົາສະສົມຊັບສົມບັດສຳລັບຕົວເອງໃນໂລກ ເພາະສິ່ງເຫຼົ່ານີ້ຖືກມອດແລະຂີ້ໝ້ຽງກິນໄດ້ ແລະຖືກຄົນມາລັກເອົາໄປໄດ້. 20 ແຕ່ໃຫ້ສະສົມຊັບສົມບັດໄວ້ໃນສະຫວັນ ເພາະຢູ່ຫັ້ນບໍ່ມີມອດແລະຂີ້ໝ້ຽງມາກິນ ແລະບໍ່ມີຜູ້ໃດມາລັກເອົາໄປໄດ້. 21 ຊັບສົມບັດຂອງເຈົ້າຢູ່ໃສ ໃຈຂອງເຈົ້າກໍຢູ່ທີ່ນັ້ນ.
22 ຕາເປັນຄືກັບແສງສະຫວ່າງສຳລັບຮ່າງກາຍ ຖ້າຕາຂອງເຈົ້າເບິ່ງທີ່ສິ່ງດຽວ j ຮ່າງກາຍທຸກສ່ວນກໍຈະແຈ້ງສະຫວ່າງ. 23 ແຕ່ຖ້າຕາຂອງເຈົ້າເບິ່ງດ້ວຍຄວາມອິດສາ k ທຸກສ່ວນໃນຮ່າງກາຍຂອງເຈົ້າກໍຈະມືດໄປ. ຖ້າແສງສະຫວ່າງໃນຕົວເຈົ້າກາຍເປັນຄວາມມືດ ຕົວເຈົ້າຈະມືດຫຼາຍຂະໜາດໃດ!
24 ບໍ່ມີຜູ້ໃດເປັນທາດຂອງນາຍ 2 ຄົນໄດ້ ເພາະລາວຈະຊັງນາຍຜູ້ນີ້ແລະຮັກນາຍຜູ້ນັ້ນ ຫຼືບໍ່ກໍຈະພັກດີຕໍ່ນາຍຜູ້ນີ້ແລະດູຖູກນາຍຜູ້ນັ້ນ. ພວກເຈົ້າຈະເປັນທັງທາດຂອງພະເຈົ້າແລະທາດຂອງຊັບສົມບັດກໍບໍ່ໄດ້.
25 ດັ່ງນັ້ນ ຂ້ອຍຈະບອກເຈົ້າວ່າ ໃຫ້ເຊົາອຸກໃຈກັບເລື່ອງຊີວິດການເປັນຢູ່ວ່າຈະມີກິນບໍ ຈະມີດື່ມບໍ ຫຼືອຸກໃຈວ່າຈະມີເຄື່ອງນຸ່ງໃສ່ຫຼືບໍ່. ຊີວິດສຳຄັນກວ່າອາຫານແລະຮ່າງກາຍສຳຄັນກວ່າເຄື່ອງນຸ່ງບໍ່ແມ່ນບໍ? 26 ເບິ່ງນົກໃນທ້ອງຟ້າແມ້ ພວກມັນບໍ່ໄດ້ຫວ່ານຫຼືເກັບກ່ຽວຫຼືສະສົມເມັດພືດໄວ້ໃນເລົ້າເຂົ້າ ແຕ່ພະເຈົ້າຜູ້ເປັນພໍ່ຂອງເຈົ້າໃນສະຫວັນກໍຍັງລ້ຽງພວກມັນ. ພວກເຈົ້າມີຄ່າຫຼາຍກວ່ານົກບໍ່ແມ່ນບໍ? 27 ໃນພວກເຈົ້າມີຜູ້ໃດບໍທີ່ອຸກໃຈແລ້ວຈະຕໍ່ຊີວິດໄດ້ອີກຈັກໜ້ອຍໜຶ່ງ? 28 ເປັນຫຍັງຈຶ່ງອຸກໃຈເລື່ອງເຄື່ອງນຸ່ງ? ເບິ່ງດອກໄມ້ໃນທົ່ງແມ້ ມັນງອກງາມຂຶ້ນໄດ້ແນວໃດ ທັງໆທີ່ມັນບໍ່ໄດ້ເຮັດວຽກໜັກແລະບໍ່ໄດ້ຕ່ຳຜ້າ 29 ແຕ່ຮູ້ບໍວ່າ ຂະໜາດກະສັດໂຊໂລໂມນຕອນທີ່ແຕ່ງໂຕເຕັມຍົດກໍຍັງບໍ່ງາມເທົ່າກັບດອກໄມ້ດອກໜຶ່ງທີ່ຢູ່ໃນທົ່ງ. 30 ຖ້າພະເຈົ້າຕົກແຕ່ງດອກໄມ້ໃບຫຍ້າໃນທົ່ງເຊິ່ງຢູ່ພຽງມື້ນີ້ ແລະມື້ອື່ນກໍຈະຖືກເຜົາຖິ້ມ ພະອົງຈະຕົກແຕ່ງເຈົ້າຫຼາຍກວ່ານັ້ນບໍ່ແມ່ນບໍ ພວກເຈົ້າຈັ່ງແມ່ນມີຄວາມເຊື່ອໜ້ອຍແທ້ໆ. 31 ດັ່ງນັ້ນ ຢ່າອຸກໃຈແລະເວົ້າວ່າ ‘ພວກເຮົາຈະມີກິນບໍ ຈະມີດື່ມບໍ ຫຼືຈະມີເຄື່ອງນຸ່ງໃສ່ຫຼືບໍ່?’ 32 ຄົນຕ່າງຊາດສະແຫວງຫາສິ່ງຂອງເຫຼົ່ານີ້ ແຕ່ພະເຈົ້າຜູ້ເປັນພໍ່ຂອງພວກເຈົ້າທີ່ຢູ່ໃນສະຫວັນຮູ້ຢູ່ແລ້ວວ່າພວກເຈົ້າຕ້ອງມີສິ່ງຂອງທັງໝົດນີ້.
33 ດັ່ງນັ້ນ ພວກເຈົ້າຕ້ອງເຮັດໃຫ້ການປົກຄອງຂອງພະເຈົ້າແລະຄວາມຖືກຕ້ອງຊອບທຳຂອງພະອົງເປັນສິ່ງສຳຄັນທີ່ສຸດໃນຊີວິດສະເໝີ ແລ້ວພະອົງຈະໃຫ້ພວກເຈົ້າມີສິ່ງທັງໝົດນີ້. 34 ຢ່າອຸກໃຈກ່ຽວກັບເລື່ອງຂອງມື້ອື່ນ ເພາະມື້ອື່ນກໍຈະມີເລື່ອງຂອງມື້ອື່ນໃຫ້ອຸກໃຈອີກ ແຕ່ລະມື້ມີບັນຫາຫຼາຍພໍຢູ່ແລ້ວ.”
7 “ໃຫ້ເຊົາຕັດສິນຄົນອື່ນ ເພື່ອພະເຈົ້າຈະບໍ່ຕັດສິນພວກເຈົ້າ 2 ເພາະພວກເຈົ້າຕັດສິນຄົນອື່ນແນວໃດ ພະເຈົ້າກໍຈະຕັດສິນພວກເຈົ້າແນວນັ້ນ ແລະພວກເຈົ້າເຮັດຕໍ່ຄົນອື່ນແນວໃດ ພວກເຂົາກໍຈະເຮັດຕໍ່ພວກເຈົ້າແນວນັ້ນຄືກັນ. 3 ແລ້ວເປັນຫຍັງເຈົ້າຈຶ່ງຈ້ອງເບິ່ງສ້ຽນທີ່ຢູ່ໃນຕາຂອງຄົນອື່ນ ແຕ່ບໍ່ເຫັນທ່ອນໄມ້ທີ່ຢູ່ໃນຕາຂອງຕົວເອງ? 4 ເຈົ້າບອກຄົນອື່ນໄດ້ແນວໃດວ່າ ‘ຂ້ອຍຈະເຂ່ຍສ້ຽນອອກຈາກຕາຂອງເຈົ້າໃຫ້’ ທັງໆທີ່ໄມ້ເປັນທ່ອນຍັງຢູ່ໃນຕາຂອງເຈົ້າ? 5 ເຈົ້າທີ່ຄິດວ່າຕົວເອງດີ! ໃຫ້ເອົາທ່ອນໄມ້ອອກຈາກຕາຂອງຕົວເອງກ່ອນແມ້ ເພື່ອເຈົ້າຈະເຫັນແຈ້ງໆ ແລ້ວຈຶ່ງຈະເຂ່ຍສ້ຽນອອກຈາກຕາຂອງຄົນອື່ນໄດ້.
6 ຢ່າເອົາສິ່ງທີ່ຄວນຖວາຍແກ່ພະເຈົ້າໃຫ້ໝາ ແລະຢ່າໂຍນໄຂ່ມຸກໃຫ້ໝູ ເພາະມັນຈະຢຽບຍ່ຳຖິ້ມລ້າໆ ແລະມັນຍັງຈະປິ່ນມາທຳຮ້າຍພວກເຈົ້າອີກ.
7 ຂໍຕໍ່ໄປເລື້ອຍໆແລ້ວພວກເຈົ້າຈະໄດ້ຮັບ ຊອກຫາຕໍ່ໄປເລື້ອຍໆແລ້ວພວກເຈົ້າຈະພົບ ເຄາະຕໍ່ໄປເລື້ອຍໆແລ້ວປະຕູຈະເປີດອອກສຳລັບພວກເຈົ້າ 8 ເພາະທຸກຄົນທີ່ຂໍຈະໄດ້ຮັບ ທຸກຄົນທີ່ຊອກຫາກໍຈະພົບ ແລະທຸກຄົນທີ່ເຄາະກໍຈະເປີດໃຫ້. 9 ຖ້າລູກຂໍເຂົ້າຈີ່ ຈະມີພໍ່ຄົນໃດບໍເອົາກ້ອນຫີນໃຫ້? 10 ແລະຖ້າລູກຂໍປາ ພໍ່ຈະເອົາງູພິດໃຫ້ບໍ? 11 ພວກເຈົ້າທີ່ເປັນຄົນບາບຍັງຮູ້ຈັກໃຫ້ສິ່ງທີ່ດີໆກັບລູກ ດັ່ງນັ້ນ ພະເຈົ້າຜູ້ເປັນພໍ່ຂອງພວກເຈົ້າທີ່ຢູ່ໃນສະຫວັນແຮ່ງຈະໃຫ້ສິ່ງທີ່ດີໆແກ່ຄົນທີ່ຂໍນຳພະອົງບໍ່ແມ່ນບໍ?
12 ດັ່ງນັ້ນ ໃຫ້ພວກເຈົ້າເຮັດຕໍ່ຄົນອື່ນຄືກັບທີ່ຢາກໃຫ້ຄົນອື່ນເຮັດຕໍ່ພວກເຈົ້າ ທີ່ຈິງ ນີ້ເປັນໃຈຄວາມສຳຄັນໃນກົດໝາຍຂອງໂມເຊແລະຄຳສອນຂອງພວກຜູ້ພະຍາກອນ.
13 ໃຫ້ເຈົ້າເຂົ້າໄປທາງປະຕູແຄບ ເພາະປະຕູທີ່ກວ້າງແລະທາງທີ່ກວ້າງໃຫຍ່ນັ້ນພາໄປເຖິງຄວາມພິນາດ ແລະມີຄົນຈຳນວນຫຼາຍເຂົ້າໄປທາງນັ້ນ 14 ແຕ່ປະຕູແຄບແລະທາງແຄບທີ່ໄປລຳບາກຈະພາໄປເຖິງຊີວິດ ແລະມີໜ້ອຍຄົນທີ່ພົບທາງນີ້.
15 ໃຫ້ລະວັງພວກຜູ້ພະຍາກອນປອມ ພວກນັ້ນປອມໂຕມາຫາພວກເຈົ້າໃນຮ່າງຂອງແກະ ແຕ່ແທ້ໆແລ້ວພວກເຂົາເປັນໝາປ່າທີ່ຫິວໂຫຍຫຼາຍ. 16 ເຈົ້າຈະຮູ້ຈັກພວກເຂົາໄດ້ຈາກການກະທຳຂອງພວກເຂົາ ຄົນເຮົາຈະປິດໝາກອະງຸ່ນຫຼືໝາກເດື່ອຈາກຕົ້ນໜາມໄດ້ບໍ? 17 ຄ້າຍຄືກັນ ຕົ້ນໄມ້ທີ່ດີກໍເກີດໝາກທີ່ດີ ແຕ່ຕົ້ນໄມ້ທີ່ບໍ່ດີກໍເກີດໝາກທີ່ບໍ່ດີ. 18 ຕົ້ນໄມ້ທີ່ດີຈະເກີດໝາກທີ່ບໍ່ດີກໍບໍ່ໄດ້ ແລະຕົ້ນໄມ້ທີ່ບໍ່ດີຈະເກີດໝາກທີ່ດີກໍບໍ່ໄດ້ຄືກັນ. 19 ຕົ້ນໄມ້ທຸກຕົ້ນທີ່ເກີດໝາກທີ່ບໍ່ດີຈະຕ້ອງຖືກປ້ຳແລະເອົາໄປຖິ້ມໃນກອງໄຟ. 20 ດັ່ງນັ້ນ ພວກເຈົ້າຈະຮູ້ໄດ້ວ່າພວກເຂົາເປັນຄົນແນວໃດ ກໍໃຫ້ເບິ່ງຈາກການກະທຳຂອງພວກເຂົາ.
21 ບໍ່ແມ່ນທຸກຄົນທີ່ເອີ້ນຂ້ອຍວ່າ ‘ນາຍ ນາຍ’ ຈະໄດ້ມີສ່ວນໃນການປົກຄອງທີ່ຢູ່ໃນສະຫວັນ ແຕ່ຄົນທີ່ຈະເຂົ້າໄປໄດ້ມີພຽງຄົນທີ່ເຮັດຕາມສິ່ງທີ່ພໍ່ຂອງຂ້ອຍທີ່ຢູ່ໃນສະຫວັນຕ້ອງການໃຫ້ເຮັດ. 22 ໃນມື້ນັ້ນຄົນຈຳນວນຫຼາຍຈະບອກຂ້ອຍວ່າ: ‘ນາຍ ນາຍ ພວກເຮົາໄດ້ພະຍາກອນແລະຂັບໄລ່ພວກປີສາດໃນນາມຂອງທ່ານ ແລະເຮັດການອັດສະຈັນຫຼາຍຢ່າງໃນນາມຂອງທ່ານບໍ່ແມ່ນບໍ?’ 23 ແຕ່ຂ້ອຍຈະບອກພວກເຂົາວ່າ: ‘ຂ້ອຍບໍ່ເຄີຍຮູ້ຈັກພວກເຈົ້າເລີຍ! ໜີໄປໄກໆ ພວກຄົນຊົ່ວ!’
24 ດັ່ງນັ້ນ ທຸກຄົນທີ່ຟັງຄຳສອນຂອງຂ້ອຍແລະເຮັດຕາມ ພວກເຂົາກໍຄືກັບຄົນສະຫຼາດທີ່ສ້າງເຮືອນເທິງພະລານຫີນ. 25 ເຖິງວ່າຝົນຈະຕົກໜັກ ນ້ຳມາຖ້ວມ ແລະມີລົມແຮງຊັດໃສ່ ແຕ່ເຮືອນນັ້ນກໍບໍ່ເພພັງເພາະມີຮາກຖານຢູ່ເທິງພະລານຫີນທີ່ໝັ້ນຄົງ. 26 ສ່ວນທຸກຄົນທີ່ຟັງຄຳສອນຂອງຂ້ອຍແຕ່ບໍ່ເຮັດຕາມ ພວກເຂົາກໍຄືກັບຄົນໂງ່ທີ່ສ້າງເຮືອນຢູ່ເທິງດິນຊາຍ. 27 ເມື່ອຝົນຕົກໜັກ ນ້ຳມາຖ້ວມ ແລະມີລົມແຮງຊັດໃສ່ ເຮືອນນັ້ນກໍພັງພິນາດ.”
28 ເມື່ອພະເຢຊູເວົ້າຈົບແລ້ວ ຄົນທີ່ມາຟັງກໍຮູ້ສຶກງຶດງໍ້ໃນວິທີສອນຂອງເພິ່ນ 29 ເພາະເພິ່ນບໍ່ໄດ້ສອນຄືກັບພວກຄູສອນສາສະໜາຂອງພວກເຂົາ ແຕ່ສອນແບບຄົນທີ່ໄດ້ຮັບອຳນາດຈາກພະເຈົ້າ.
a ຫຼື “ຄົນອ່ອນນ້ອມຖ່ອມຕົວ”
b ສະຖານທີ່ເຜົາຂີ້ເຫຍື້ອນອກເມືອງເຢຣູຊາເລັມ. ຊື່ພາສາກຣີກຂອງຮ່ອມພູຮິນໂນມ ເຊິ່ງຢູ່ທາງຕາເວັນຕົກສ່ຽງໃຕ້ຂອງເມືອງເຢຣູຊາເລັມບູຮານ. ບໍ່ມີຫຼັກຖານວ່າ ສັດຫຼືມະນຸດທີ່ຖືກຖິ້ມໃນເກເຮັນນາຖືກເຜົາທັງໆທີ່ມີຊີວິດຢູ່ຫຼືຖືກທໍລະມານ. ດັ່ງນັ້ນ ສະຖານທີ່ນີ້ຈຶ່ງບໍ່ໄດ້ເປັນສັນຍະລັກຂອງແດນທໍລະມານທີ່ວິນຍານມະນຸດຈະຖືກທໍລະມານດ້ວຍໄຟຕະຫຼອດໄປ. ພະເຢຊູແລະພວກລູກສິດຂອງເພິ່ນໃຊ້ຄຳວ່າເກເຮັນນາເປັນສັນຍະລັກຂອງການລົງໂທດຕະຫຼອດໄປ ເຊິ່ງໝາຍເຖິງການທຳລາຍໃຫ້ສາບສູນ.
e ມາຈາກຄຳພາສາກຣີກ ພໍເນຍ ໝາຍເຖິງຄວາມສຳພັນທາງເພດທຸກຊະນິດທີ່ຜິດກົດໝາຍຂອງພະເຈົ້າ ເຊັ່ນ: ການຫຼິ້ນຊູ້ ການເປັນໂສເພນີ ເພດສຳພັນລະຫວ່າງຄົນທີ່ຍັງບໍ່ແຕ່ງດອງ ການຮັກຮ່ວມເພດ ແລະເພດສຳພັນກັບສັດ.
f ນັ້ນແມ່ນ ໃຫ້ລາວຢືມໂດຍບໍ່ເອົາດອກເບ້ຍ
g ຫຼື “ສົມບູນແບບ”
h ຫຼື “ເວລາທີ່ເຈົ້າໃຫ້ທານ”
i ຫຼື “ຂໍໃຫ້ຊື່ຂອງພະອົງສັກສິດໃນສາຍຕາຂອງທຸກຄົນ”
j ຫຼື “ເບິ່ງໂດຍບໍ່ວອກແວກ”
k ຫຼື “ເບິ່ງສິ່ງທີ່ບໍ່ດີ”
