ພະເຈົ້າມີຢູ່ແທ້ບໍ?
ຄຳຕອບຈາກຄຳພີໄບເບິນ
ແມ່ນແລ້ວ ຄຳພີໄບເບິນໃຫ້ຫຼັກຖານທີ່ຈະແຈ້ງວ່າພະເຈົ້າມີຢູ່ແທ້. ແລະສະໜັບສະໜູນເຮົາໃຫ້ມີຄວາມເຊື່ອໃນພະເຈົ້າ ບໍ່ແມ່ນເຊື່ອແບບງົມງວາຍຍ້ອນວ່າສາສະໜາສອນແນວນັ້ນ ແຕ່ໂດຍໃຊ້ “ຄວາມສາມາດໃນການຄິດຫາເຫດຜົນ” ແລະ “ຄວາມເຂົ້າໃຈ.” (ໂຣມ 12:1; 1 ໂຢຮັນ 5:20) ຂໍໃຫ້ເບິ່ງເຫດຜົນຕ່າງໆຕໍ່ໄປນີ້ທີ່ຢູ່ໃນຄຳພີໄບເບິນ:
ເອກະພົບທີ່ເປັນລະບົບລະບຽບແລະສິ່ງມີຊີວິດຕ່າງໆເທິງໂລກເຮັດໃຫ້ເຮົາຮູ້ວ່າມີຜູ້ສ້າງ. ຄຳພີໄບເບິນບອກວ່າ: “ເຮືອນທຸກຫຼັງຕ້ອງມີຄົນສ້າງ ແຕ່ຜູ້ທີ່ສ້າງທຸກສິ່ງແມ່ນພະເຈົ້າ.” (ເຮັບເຣີ 3:4) ຄວາມຈິງນີ້ເປັນເລື່ອງງ່າຍໆ ແມ່ນແຕ່ຫຼາຍຄົນທີ່ມີການສຶກສາສູງກໍຍອມຮັບວ່າເລື່ອງນີ້ມີເຫດຜົນ. a
ມະນຸດເຮົາເກີດມາພ້ອມກັບຄວາມຕ້ອງການທີ່ຈະຮູ້ວ່າເຮົາເກີດມາເຮັດຫຍັງແລະເປັນຫຍັງເຮົາຈຶ່ງຢູ່ບ່ອນນີ້ ເຖິງວ່າເຮົາຈະມີສິ່ງຈຳເປັນພື້ນຖານຄົບໝົດແລ້ວ ເຊັ່ນ ວັດຖຸ ເງິນຄຳ ຫຼືອາຫານ ແຕ່ຄວາມຕ້ອງການທີ່ຈະຮູ້ເລື່ອງນີ້ກໍຍັງຢູ່. ຄຳພີໄບເບິນບອກວ່ານີ້ເປັນຄວາມຕ້ອງການດ້ານຄວາມເຊື່ອ ເຊິ່ງລວມເຖິງຄວາມຕ້ອງການທີ່ຢາກຈະຮູ້ຈັກແລະນະມັດສະການພະເຈົ້າ. (ມັດທາຍ 5:3; ພະນິມິດ 4:11) ຄວາມຕ້ອງການນີ້ເປັນຫຼັກຖານທີ່ເຮັດໃຫ້ເຮົາຮູ້ວ່າຜູ້ສ້າງໂຕເຮົາມີຢູ່ແທ້ ເພິ່ນໃສ່ຄວາມຕ້ອງການນີ້ໄວ້ໃນໂຕເຮົາຕັ້ງແຕ່ເກີດ ນີ້ສະແດງວ່າເພິ່ນຮັກເຮົາ ຍ້ອນເພິ່ນຢາກໃຫ້ເຮົາຮູ້ຈັກແລະນະມັດສະການເພິ່ນ.—ມັດທາຍ 4:4
ຄຳພະຍາກອນໃນຄຳພີໄບເບິນເກີດຂຶ້ນແທ້ທຸກລາຍລະອຽດແລະຖືກຂຽນຂຶ້ນຫຼາຍຮ້ອຍປີກ່ອນເຫດການນັ້ນຈະເກີດຂຶ້ນ. ຄວາມຖືກຕ້ອງແລະລາຍລະອຽດຕ່າງໆຂອງຄຳພະຍາກອນເຫຼົ່ານັ້ນເປັນຫຼັກຖານໜັກແໜ້ນທີ່ເຮັດໃຫ້ເຮົາຮູ້ວ່າຕ້ອງມາຈາກແຫຼ່ງທີ່ເໜືອກວ່າມະນຸດ ເຊິ່ງກໍຄືພະເຈົ້າ.—2 ເປໂຕ 1:21
ຜູ້ຂຽນຄຳພີໄບເບິນມີຄວາມຮູ້ທາງວິທະຍາສາດຫຼາຍກວ່າຄົນອື່ນໆໃນສະໄໝດຽວກັນ. ຕົວຢ່າງ ໃນສະໄໝກ່ອນຫຼາຍຄົນເຊື່ອວ່າໂລກຂອງເຮົາຢອງຢູ່ເທິງຫຼັງສັດ ເຊັ່ນ: ຊ້າງ ໝູປ່າ ຫຼືງົວ. ແຕ່ຄຳພີໄບເບິນບອກວ່າພະເຈົ້າ “ກາງທ້ອງຟ້າດ້ານເໜືອໄວ້ເທິງຄວາມວ່າງເປົ່າ.” (ໂຢບ 26:7, ລ.ມ.) ແລະຍັງອະທິບາຍຮູບຊົງຂອງໂລກວ່າເປັນ “ວົງມົນ.” (ເອຊາອີ 40:22, ລ.ມ.) ຫຼາຍຄົນຄິດວ່າເຫດຜົນດຽວທີ່ເຮັດໃຫ້ຜູ້ຂຽນເຫຼົ່ານີ້ມີຄວາມເຂົ້າໃຈທີ່ລ້ຳສະໄໝຕ້ອງເປັນຍ້ອນເຂົາເຈົ້າໄດ້ຮັບຂໍ້ມູນມາຈາກພະເຈົ້າ.
ຫຼາຍຄົນບໍ່ເຊື່ອວ່າພະເຈົ້າມີຢູ່ແທ້ຍ້ອນບໍ່ໄດ້ຮັບຄຳຕອບທີ່ມີເຫດຜົນສຳລັບຄຳຖາມທີ່ສຳຄັນ ແຕ່ຄຳພີໄບເບິນຕອບຄຳຖາມເຫຼົ່ານີ້. ຕົວຢ່າງເຊັ່ນ: ຖ້າພະເຈົ້າເປັນຄວາມຮັກແລະມີພະລັງອຳນາດທີ່ຈະເຮັດຫຍັງກໍໄດ້ ແລ້ວເປັນຫຍັງໂລກຂອງເຮົາຈຶ່ງມີແຕ່ຄວາມທຸກແລະຄວາມຊົ່ວຮ້າຍ? ເປັນຫຍັງຫຼາຍຄັ້ງສາສະໜາເປັນຕົ້ນເຫດເຮັດໃຫ້ເກີດຄວາມຊົ່ວແທນທີ່ຈະສະໜັບສະໜູນຄົນໃຫ້ເຮັດດີ?—ຕີໂຕ 1:16
a ຕົວຢ່າງເຊັ່ນ ນັກດາລາສາດທີ່ຊື່ອາລັນ ແຊນເດດຈ໌ບອກວ່າ: “ຂ້ອຍຮູ້ສຶກວ່າເປັນໄປບໍ່ໄດ້ເລີຍທີ່ຄວາມເປັນລະບົບລະບຽບແບບນັ້ນຈະເກີດມາຈາກຄວາມບັງເອີນໂດຍທີ່ບໍ່ມີການຄວບຄຸມ. ຈະຕ້ອງມີຫຍັງບາງຢ່າງທີ່ຄວບຄຸມໃຫ້ເກີດຄວາມເປັນລະບົບລະບຽບແບບນັ້ນ. ຂ້ອຍກໍບໍ່ຢາກເວົ້າເຖິງເລື່ອງພະເຈົ້າດອກ ແຕ່ມັນກໍເປັນຄຳອະທິບາຍດຽວສຳລັບສິ່ງທີ່ໜ້າງຶດງໍ້ຕ່າງໆທີ່ເກີດຂຶ້ນມາ.”
ເລື່ອງທີ່ເຈົ້າອາດຈະມັກ
ຄຳສອນທີ່ສຳຄັນໃນຄຳພີໄບເບິນ
ພະເຈົ້າມີແທ້ບໍ?
ມາເບິ່ງວ່າເປັນຫຍັງການເຊື່ອວ່າມີພະເຈົ້າເປັນເລື່ອງມີເຫດຜົນ.
ຫໍສັງເກດການ
ໃຜສ້າງພະເຈົ້າ?
ການເຊື່ອວ່າພະເຈົ້າມີຊີວິດຢູ່ຕະຫຼອດມາເປັນເລື່ອງທີ່ມີເຫດມີຜົນບໍ?
ກ່ຽວກັບເຮົາ
ຂໍໃຫ້ມີຄົນມາສອນ
ເບິ່ງວ່າຄຳພີໄບເບິນສອນຫຍັງ ຫຼືມາຮູ້ຈັກພະຍານພະເຢໂຫວາຫຼາຍຂຶ້ນ.