Le bbʉngʉe biskui madhó Tsi (Imbwa) dho
ÉTATS-UNIS nǎ Oregon nǎ di ná Nick ró dho kʉ ná ke pori ɨ: “2014 dzá mwanzo na, ma ngangʉe madhó aro kʉ ná Tsi ma na ma bbí ddinga nari tso. Fø bbagʉ di ná Yova dzá Dimu ngʉ adi lod’ra bí ina prezatoire na. Kpa ngʉ adi ndima ronga thó bblo ndirigoti kpa kuso lú da ná krʉ kʉ ná ndrŭ ronga kpa ngʉ adi zʉ hwè na.
“Fø Yova dzá Dimu nanga nzɨ ngʉ adi jini ndrŭ dho dhé ri, ro kpa nanga jingʉeni madhó tsi dho maddi. Ddikpa cha, Elaine ró dho kʉ ná isɨle ngʉ lod’ra prezatoire na ná saa na, le bbʉngʉe biskui madhó aro kʉ ná tsi dho. Ro føri goti, ko njú Yova dzá Dimu na ngbaga ma lo ndima d’ra prezatoire na ro ró, madhó tsi ngʉ adi riji ndima rá kpa dhi ngana ndiro kpa bbʉ ‘biskui’ ndima dho d’e.
“B’lo bi ro da fø nga goti ro, tsi nanga ngʉ adi jini bbo biskui dho ndirigoti ma nanga maddi ngʉ adi jini bbo sese ma loti kpa na naridho. Ro ma nzɨ ngʉ adi riji ma tilo kpa na bbo ri. Madhó cho ngʉe 70 djolu, ro ma nzá chungʉe Yova dzá Dimu urie ná lo ro d’ʉ ri. Ma thí bí kʉ ná dini bʉngʉe bbo naridho ma ngʉ rinja ri kʉ bblo ma ne Biblia nǎ longa ddiro dhé.
“Fø saa na dhé, ma njangʉe nja kʉ ná Yova dzá Dimu lo ndima d’ra njonjo kʉ ná bbagʉ lu ndima dhó prezatoire na ro. Kpa maddi ngʉe krʉ saa ró ji ndima nanga jini ro. Kpa ngʉ adi madhó krʉ kʉ ná logoti ngʉ Biblia nǎ ro, ná føri lingʉeri ma li ma thí bbo kpa djo.
“Ddikpa cha, Elaine dhungʉeri ma tsó, ‘ni ká urie zǎ kʉ Mungu dhó ro si ná kado nari ngba?’ Ma ngʉngʉe logoti ‘ngba o!’ Føri goti Elaine zøngʉe Isaya 11:6-9 ma dho. Fø nga djó ro ma jingʉeri ji ma zø Biblia, ro ma nzá jingʉe ma zø Yova dzá Dimu bbʉ ma dho ná vichapo ri.
“Fø nga goti, Elaine ma, ndi bbá ke Brent ma na ma tingʉe sese ndirigoti bbo na mana kʉ ná lo naridho, ma nanga jingʉeni bbo. Kpa pongʉeri ma zø Biblia Matayo djó ro kpø Matendo djo ndiro ma chu bbʉbbʉ Mukristo ká le ka le e ngba ma nari d’e. Ma njingʉeri fø nganga. Føri goti, ma ungʉe Brent ma, Elaine ma na ko nga Biblia nǎ longanedha tso nari u. Føri ngʉe 2016 dzá katikati na.
“Biblia nǎ longanedha dhi ddo ma, Pidhinga dzá dza na ma si ra ná ddo ma na ma ngʉ adi b’o bbo hwè na. Ma ronga lengʉeni bbo ndirigoti ma ngʉe hwè na bbo Biblia ddi ná lo ma chu naridho. Ro cho ddi goti ma bangʉe batizo. Kpadjo madhó cho kʉ 79 ro, ma adi mbai po bbo dho nari kʉ ma ba bbʉbbʉ kʉ ná dini. Yova le ma ronga le ndirigoti ke liri ma e ndidzá dz’ djolu gble kʉ ná familia kana.”
