3. Two
3. Two
“Two areco bino poto i kabedo apol.”—LUKA 21:11
● Bonzali, ame obedo a ticcoro me yotkom i lobo Congo kan ame lweny ogudo iye jo apol, timo gin ame en twero me miyo kony me yotkom baŋ otic ame golo lonyo i te lobo ame tye acanne kede two moro arac ame olwoŋo ni Marburg i boma ame en kwo iye. a Kwaccere pi kony i baŋ otela me boma okene adwoŋ opoto nono. I ŋe dwete aŋwen ote doŋ cwallo kony, ento Bonzali onwoŋo doŋ oto oko. Two Marbug omake i kare ame en otemo laro kwo ogol lonyo moro me te lobo.
ATENI I KOM KOP MAN NYUTO ŊO? Twoe mogo ame cego yo yamo (bala two Ewuko), two cado, kuddi me two cilim, two aola owio kede two atipa tye i kin two ame maro rwenynyo kwo a jo. I mwaka moro ame okato acocok-ki, epone me twoe abic magi omyeko ni oneko jo ame welgi kato milion apar i lak abiro oko. Ket i yore acek ni two magi neko jo ame welgi kato pyera aryo oko i dakika acel acel mwaka i mwaka.
PYEM AŊO AME MARO KATTO I KOM KOP MAN? Wel jo i wi lobo tye amedde ameda, en oweko two daŋ tye anya amedde ameda. Pwod tye jo apol ame twero nwoŋŋo two.
ITAMO NI KODI PYEMMONO DAŊ TERE TYE? Wel jo ame kwo i lobo omedde yotoyot tutwal. Ento teko a dano me pimmo, geŋŋo, kede lweny i kom two daŋ omedde. Ka doŋ amannono, itamo ni rwom me dano i to kede two pe doŋ onwoŋo myero dok piny tutwal? Aco kun, oluŋtuke mere aye dok tye atimere.
YIN ITAMO NIŊO IYE? Jo tye acanne kede two areco kit acalo Baibul okobo con?
Oyeŋo, kec, kede two obedo peko ame ŋattoro keken pe kede ciŋ iye ento tye a buro kwo a jo milion apol. Jo milion apol akato tye a denno can i ciŋ dano wadgi—polgi jo ame myero gwokgi aye dok tye a wunnogi. Nen koŋ gin ame icwil me Baibul kobo ni onwoŋo bino timere.
[Coc ame tye itere piny]
a Kuddi ame kelo two Marbug mito bedo acacal kede kuddi ame kelo two Ebola.
[Pwony apire tek ame ojuro i dure kopporo]
“Lit tutwal me eŋato nyo ginnoro aye mwoddi, ento daŋ lit aroma roma ka two moro tye abedo cammi i yii dwogo kede oko kun ineno man timere pi kare alac aboŋo alokaloka moro keken.”—ADIRO AME LWENYO I KOM TWO I DEKE AME OPOTO I KABEDO MORO-NI MICHAEL OSTERHOLM.
[Pwoc baŋ amak cal]
© William Daniels/Panos Pictures