2. Kec

“Kec bino poto.”—MARAKO 13:8.

● Lo moro oriŋo olaro calo moro me Quaratadji, Niger. Omare, amare, omege, kede amege a lo-ni daŋ oriŋo i paŋgula okene me lobo-naca pi kec. Aco kun, lo-ni tye kene daŋ kede okeka acel keken ame en peto te buto iye piny idye ot. Piŋo en tye kene? Sidi ame obedo atela moro me calo-naca okobo ni, “En pe twero pitto jo ture dok lewic make me nennogi tye a kanynyo kec.”

ATENI I KOM KOP MAN NYUTO ŊO? I wi lobo aluto, cocok dano acel i kom jo abiro pe twero nwoŋŋo cam ame oromo pi nino acel acel. Wel man doŋ tye arac akato i lobe mogo i tuŋ piny, tuŋ to, kede tuŋ kide me Afrika, kan ame acel me adek me jo nwoŋo kec oridogi atek. Me niaŋ i kom wel man, tam koŋ i kom paco moro ame tye iye ico, cege, kede atin. Ka cam ame tye romo ka jo aryo keken, ŋa ame doŋ abuto kec? Itamo ni ico, dako, iya nyo atin, aye myero doŋ but kec? Man obedo tam ame kodi pacci magi myero mok didik.

PYEM AŊO AME MARO KATTO I KOM KOP MAN? Lobo ceko cem abup dok ame oromo pi jo luŋ. Mitte ka ni ogwok dok oti kede jammi ame okwanyo i lobo aber.

ITAMO NI KODI PYEMMONO DAŊ TERE TYE? Ateni gire, i kare-ni opur twero puro cam adwong kato kare moro keken i tekwaro a dano. Onwoŋo twero bedo ber ka gamente apapat ogwoko cam ame opuro aber me cobbo peko me kec. Cite, kadi naka i ŋe mwakki apol ame dano obedo temmo me gwokko cem, man ducu pe okonyo i cobbo peko me ginacama.

YIN ITAMO NIŊO IYE? Itamo ni gin ame ocoo Marako 13:8 tye acobere kakare? Itamo ni peko me kec pwod tye oriddo jo apol i wi lobo ducu, kadi bed bala rwom me tet tye oyito malo?Oyeŋo kede kec pol kare kelo pekki okene ame nyuto kare me agikki.

[Pwony apire tek ame ojuro i dure kopporo]

“Wel itino ame kato acel me adek oko to kede two mogo bala two ewuku, two cado kede two ocele ame gin onwoŋo mom otwero to kede ka onwoŋo ni opitogi aber.”​—ANN M. VENEMAN, CON ONWOŊO BWOO WI TIC A UN AME MIO KONY PI ITINO.

 [Pwoc baŋ amak cal]

© Paul Lowe/​Panos Pictures