Lokola mafunda ya bantu kena kubaka kaka mbotama, beto kele na nsatu ya kutunga bayinzo mingi samu na kusambila Yehova. Samu na kukokisa nsatu yango, Departema ya kusala baplan mpe kutunga (LDC) kanaka kutunga mpe kubongisa bisika ya nsambudulu kuluta 2 700 na mvula ya kisalu ya 2020. a

 Kasi, mambu simbaka diaka ve samu na maladi ya yimbi ya COVID-19. Samu na kutanina bampangi na beto mpe samu na kuzitisa malako yina bamfumu ya Leta tulaka, komite ya kubimisa mikanda ya Kimvuka ya Ntuadisi tubaka ti bampangi yina kesalaka na kisalu ya kutunga babika ntete kutunga na yinza ya mvimba. Atako mutindu yina, na mvula ya kisalu ya 2020, batungaka mpe babongisaka diaka bisika ya nsambudulu kuluta 1 700 tekila Coronavirus banda. Katula yau, bisalu yankaka ya nene kuluta 100 yina metadila bafiliale salamaka. Tala mutindu bisalu ya kutunga yina salamaka na baflilale zole natinaka bampangi na beto mambote.

 Filiale ya Cameroun. Filiale ya ntama yina vuandaka na Douala, kumaka fioti mpenza mpe yalombaka kutunga bayinzo yankaka. Komite ya kubimisa mikanda monaka mbote kubongisa diaka filiale yango, kasi mbongo yina lombamaka samu na kusala bisalu yango vuandaka mingi kuluta valere ya yinzo yango. Basosaka diaka kuzaba kana balendaka tunga yinzo yankaka to kusumba mpe kubongisa diaka yinzo yina bavuandaka na yau, kasi makanisi yango nionso zole simbaka ve.

 Kaka na ntangu yango, bampangi kuwaka ti na nordi ya mbanza ya Douala, bamfumu ya Leta bakaka dikanisi ya kutunga nzila yina kena kunata na mosi ya Bayinzo ya lukutakanu na beto ya nene. Nzila yango kepesa dikoki ya kukuenda na kisika yango mpe yakesala ti kuran, maza mpe mambu yankaka vuanda mbote. Yau nde vuandaka nsatu ya bampangi ya komite ya filiale. Na yau, Kimvuka ya Ntuadisi ndimaka batunga filiale ya yimpa na kati ya lupangu ya Yinzo ya balukutakanu ya nene.

 Bambangi ya Yehova salaka kintuadi na bisadi ya kompani yankaka samu na kutunga bayinzo yango, yau salaka ti mbongo yankaka bikana mpe yabika baka ntangu mingi. Kisalu yango lombaka mbongo ya badolare kuluta bamilion 2, mpe yakudiaka mbongo fioti kuluta mutindu bakanisaka! Dibuta ya betele bandaka kuvuanda na bayinzo yango mua ntangu fioti tekila COVID-19 banda.

 Bampangi ya betele ya Cameroun kena kuvuanda na bayinzo ya kitoko mpe bakena kusala na babiro ya kitoko, mpe bakena kumona ti filiale yango ya yimpa kele kado yina mekatuka na Yehova. Mpangi mosi na nketo na yandi metuba: “Beto zola sala bisalu ya ngolo mpe kubaka kado yango na valere mingi.”

 Biro ya mbangudulu ya mikanda na Tojolabal, na Mexique. Yameluta bamvula mingi, ekipi ya mbangudulu ya ndinga Tojolabal vuandaka sala kisalu yango na filiale ya Amerique centrale yina kele pene ya mbanza ya Mexico. Nzokande ndinga ya Tojolabal ketubamaka mingi na ltamirano mpe na Las Margaritas, yina kele na distanse ya bakilometre kana 1 000! Yau salaka ti bambangudi kuma na mukakatano ya kubangula mbote ndinga ya Tojolabal. Mpe filiale vuandaka na mukakatano ya kubaka bampangi yina kele na makoki samu na kupesa maboko na ekipi ya bambangudi ya ndinga ya Tojolabal mpe bampangi yankaka samu na kusala baanrejistrema.

 Yau yina komite ya kusonika ya Kimvuka ya Ntuadisi monaka mbote ti ekipi ya bambangudi ya ndinga Tojolabal kuenda na kisika yina baketubaka ndinga yango. Samu na yau, filiale bakaka nzengolo ya kusumba yinzo mosi mpe kubongisa yau diaka. Kusala mutindu yina salaka ti mbongo mingi bikana na kisika ya kutunga yinzo yankaka to kufutila.

 Mbangudi mosi metubila mambote yina yandi mebaka: “Na bamvula 10 yina munu mesala na kisalu ya kubangula na filiale, mukutanaka ata kilumbu mosi ve na dibuta yina ketubaka ndinga na munu. Ntangu yayi munu kele mpenza na kisika yina baketubaka ndinga ya Tojolabal. Konso kilumbu munu kesololaka na bantu yina ketubaka ndinga ya Tojolabal. Yau mesala ti muzaba mambu mingi ya ndinga na beto mpe munu bongisa diaka kisalu na munu ya kubangula.”

 Samu na mvula ya kisalu ya 2021, kana mambu metambula mbote, nsatu kele ya kutunga babiro ya mbangudulu 75 mpe bayinzo ya bakalasi ya Teokrasi. Beto ketatamana kusala bisalu ya nene na bafiliale 8, buela diaka kisalu ya biro ya nene na Ramapo, na New York, mpe kukatula filiale ya Argentine mpe ya Italie kisika yakele samu na kunata yau kisika yankaka. Katula yau, beto kele na nsatu ya kutunga Bayinzo ya Kimfumu ya yimpa 1 000, mpe kukatula bisika ya kisambu 6 000 yina mebeba mpe kubongisa yau diaka, mpe kubongisa diaka Bayinzo ya Kimfumu 4 000.

 Wapi kisika mbongo kekatuka samu bisalu nionso yina ya kutunga mpe kubongisa? Mpangi Lázaro González, mpangi ya komite ya filiale ya Amerique Centrale, pesaka mvutu na kiuvu yango ntangu bavuandaka tubila kisalu ya kutunga biro ya mbangudulu ya ndinga ya Tojolabal, yandi tubaka ti: “Na terituare ya filiale na beto, bantu kevuandaka mpenza na mbongo mingi ve. Kana yavuandaka ve samu na lusadusu ya bampangi nionso na yinza ya mvimba, yazolaka vuanda mpasi beto tunga babiro ya mbangudulu samu na bampangi na beto yina kevuandaka ntama. Na yau, makabu yina bampangi kepesaka na yinza ya mvimba salaka ti bampangi na beto bambangudi kuma pembeni ya bampangi yina ketubaka bandinga ya babuala na bau. Beto kena kupesa matondo mingi na bampangi na beto ya yinza ya mvimba samu na makabu na bau ya luzolo ya mbote.” Ee, Kana kisalu ya kutunga kena kusalama, yakele samu na makabu na beno samu na kusadisa kisalu ya kusamuna na yinza ya mvimba, bampangi mingi kepesaka makabu na nzila ya donate.jw.org..