Konso mvula, bampangi yankaka yina kele na kisalu ya ntangu nionso na yinza ya mvimba, bakebokuluaka na Kalasi ya Gileadi, yina kebongisamaka na kisika ya nene ya malongi ya Watchtower na Patterson, na New York. a Na kalasi yango, bana kalasi kelongukaka mutindu ya kukuma diaka na makoki na biyekua yina bakele na yau na nkubukulu ya Yehova. Formasion yango kesadisaka bau basadisa bimvuka samu yakuma ngolo mpe bavuandisa mambu na babetele na yinza ya mvimba.

 Gileadi kele mpenza kalasi yina kesangisaka bampangi ya yinza ya mvimba. Na kifuani, na kalasi ya mbala 147, yina salamaka na 2019, yavuandaka na bana kalasi 56, yina katukaka na bayinsi 29. Bana kalasi yina kekotaka Gileadi kele bampangi yina kesalaka kisalu ya ntangu nionso, na kifuani bampangi ya betele, bankengi ya kizungidila, bamisionere, to bampasudi nzila ya nene.

 Mambu kebongisamaka tekila kalasi banda. Na kifuani, Biro ya nene yina ketadilaka mambu ya bavuayaje kesumbaka batike samu na bana kalasi yina mebokulua na kalasi. Na kalasi ya mbala 147, yalombaka kubimisa badolare 1 075samu na muana kalasi mosi mosi yina katukaka na bisika yankaka mpe na Patterson. Bana kalasi yina kekatukaka na ba île ya Salomon fueti baka baavion yiya samu na kukuma na Patterson mpe na manima, baavion tatu samu na kuvutuka na buala na bau; basalaka vuayaje ya bakilometre 35 400, kukuenda mpe kuvutuka! Muana kalasi mosi fueti futa tike ya badolare 2 300. Samu na kutanina mbongo, biro ya bavuayaje kesosaka baavion na ordinatere mpe bakekangaka bisika samu na kufuta tike na ntalu ya fioti. Ata na manima ya kukanga bisika, programe yango ya ordinatere ketatamanaka kusosasosa basabala mingi mpe bangonda mingi samu na kubaka bisika yina bamekitisa tike. Biro ya bavuayaje kesadilaka diaka batike yina bakepesaka bakliyan yina kesalaka bavuayaje mbala na mbala to ba-point samu na kusumba tike na ntalu ya fioti .

 Yakelombaka na bana kalasi yankaka babaka ntete viza samu bakota na États-Unis. Yau yina, Biro ya bavuayaje kesadisaka bau babaka viza ya bana kalasi. Samu na kubaka viza mpe kundimama, muana kalasi mosi mosi fueti futa badolare 510.

 Yinki mambote beto kebakaka na formasion yina bana kalasi kebakaka? Hendra Gunawan kele nkulutu na Asie du Sud-Est. Yandi kele na kimvuka mosi yina nketo mosi na bakala na yandi mekotaka na kalasi ya Gileadi. Yandi metuba mutindu yayi: “Ntete ntete, kimvuka na beto vuandaka ve na bampasudi nzila ya ngonda na ngonda. Ntangu bampangi yina katukaka na Gileadi kuizaka na kimvuka na beto, vema na bau mpe mpeve na bau ya kukipesa salaka ti bampangi yankaka baka lukanu ya kubanda kisalu ya mpasudi nzila ya ngonda na ngonda. Kutu na manima, mpangi mosi ya nketo ya kimvuka na beto kotaka na kalasi ya bamuangisi ya nsangu ya mbote ya Kimfumu!”

 Sergio Panjaitan kesalaka kintuadi na bampangi yankaka yina katukaka na kalasi ya Gileadi kuna na betele ya Asie du Sud-Est. Yandi metuba mutindu yayi: “Formasion babakaka vuandaka mbote samu na bau mosi kaka ve, yavuandaka mpe mbote samu na beto. Balongukaka mambu mingi! Kasi na kisika bakukikumisa ti bamezaba mambu mingi kuluta bampangi yankaka, bakena kumonisa bau nde mambu yina balongukaka. Na mutindu yina nde bakekindisaka beto mpe beto kekindisaka bau.”

 Wapi kisika kekatukaka mbongo samu na kubongisa kalasi yango? Na makabu yina kepesamaka samu na kisalu ya kusamuna na yinza ya mvimba, yankaka kepesamaka na mutindu ya kupesa makabu yina kele na donate.jw.org. Matondo mingi samu na makabu na beno, yakena kusadisa samu na kutuadisa kalasi yina mebongisamaka samu na bana kalasi yina kekatukaka na yinza ya mvimba.