“Alifa na Omega” nĩ Jehova Ngai, Mwene-Hinya-Wothe. Rĩĩtwa rĩu rĩonekaga maita matatũ thĩinĩ wa Bibilia.—Kũguũrĩrio 1:8; 21:6; 22:13. a

 Alifa na omega nĩ ndemwa ya mbere na ya mũico harĩ ndemwa cia Kĩngiriki, rũthiomi rũrĩa rwahũthĩrirũo kwandĩka gĩcunjĩ kĩa Bibilia kĩrĩa gĩtagwo Kĩrĩkanĩro Kĩrĩa Kĩerũ, kĩrĩa gĩkoragwo na ibuku rĩa Kũguũrĩrio. Ndemwa ĩyo ya mbere na ya mũico harĩ ndemwa cia Kĩngiriki ihũthĩrĩtwo kuonania atĩ Jehova nowe kĩambĩrĩria na kĩrĩkĩrĩro. (Kũguũrĩrio 21:6) Nĩwe warĩ Ngai Mwene-Hinya-Wothe kuuma tene, na egũthiĩ na mbere gũkorũo arĩ Ngai Mwene-Hinya-Wothe nginya tene na tene. Nowe tu wa “kuuma tene nginya tene.”—Thaburi 90:2.

 Bibilia ĩhũthagĩra rĩĩtwa rĩu harĩ Jehova Ngai na Mũrũ wake Jesu, no rĩkoragwo rĩkĩaria ũhoro wa maũndũ ngũrani. Ta wĩcirie ngerekano igĩrĩ.

•   Thĩinĩ wa Isaia 44:6, Jehova oigaga ũũ: “Niĩ nĩ niĩ wa mbere na nĩ niĩ wa mũico. Gũtirĩ Ngai ũngĩ tiga niĩ.” Haha Jehova aronania atĩ we nĩwe Ngai ũrĩa wa ma ũtũũraga tene na tene; gũtirĩ ũngĩ tiga we. (Gũcokerithia Maathani 4:35, 39) Kwoguo kũringana na mũhari ũcio, rĩĩtwa “wa mbere na wa mũthia” riugĩte ũndũ ũmwe na “Alifa na Omega.”

•   Makĩria ma ũguo, rĩĩtwa “wa Mbere [pro’tos, no ti alifa] na wa Mũthia [e’skha·tos, no ti omega]” nĩ rĩonekaga thĩinĩ wa Kũguũrĩrio 1:17, 18 na 2:8. Mĩhari-inĩ ĩno, ũhoro ũrĩa ũthiũrũrũkĩirie wonanagia atĩ ũrĩa ũrarĩrĩrio nĩ aakuire na thutha ũcio agĩcoka muoyo. Nĩ ũndũ ũcio, mĩhari ĩyo ndĩngĩkorũo ĩkĩarĩrĩria Ngai, tondũ ndarĩ akua. (Habakuku 1:12) No Jesu nĩ aakuire na akĩriũkio. (Atũmwo 3:13-15) Nĩwe warĩ mũndũ wa mbere kũriũkio arĩ na mwĩrĩ ũtangĩkua wa roho igũrũ, kũrĩa atũũraga “tene na tene.” (Kũguũrĩrio 1:18; Akolosai 1:18) Jesu nĩwe ũriũkagia andũ arĩa angĩ othe. (Johana 6:40, 44) Kwoguo nĩwe warĩ wa mũthia kũriũkio ĩmwe kwa ĩmwe nĩ Jehova. (Atũmwo 10:40) Nĩ ũndũ ũcio Jesu no agĩrĩre gwĩtwo “wa Mbere na wa Mũthia.”

 Aca. Hationanĩtio ĩmwe kwa ĩmwe mwaria wa Kũguũrĩrio 22:13 nũũ, na mũrango ũcio nĩ ũkoragwo na aaria matiganĩte. Akĩaria ũhoro wa gĩcigo kĩu kĩa ibuku rĩa Kũguũrĩrio, Profesa William Barclay aandĩkire ũũ: “Maũndũ mandĩkĩtwo matarũmanĩrĩire na njĩra o yothe; . . . na kaingĩ nĩ ũndũ mũritũ kũmenya nũũ ũraria.” (The Revelation of John, Mbuku ya 2, Riuma Rĩerũ, karatathi ka 223) Nĩ ũndũ ũcio, rĩĩtwa “Alifa na Omega” thĩinĩ wa Kũguũrĩrio 22:13 nĩ rĩa Ũrĩa wĩtĩtwo ũguo kũndũ kũngĩ thĩinĩ wa Kũguũrĩrio​—Jehova Ngai.