Gũcaria Macokio
Gũcaria Macokio
“Hakuhĩ mũndũ o wothe arĩ ũrĩa oigaga ũhoro-inĩ wĩgiĩ [Jesu] nũ. O na wĩtĩkio kana nganja ciitũ ingĩkorũo itariĩ atĩa, ithuothe nĩ twĩkoraga tũkĩĩyũria, ‘Mũndũ ũcio aarĩ ũ?’”—MWANDĨKI STAN GUTHRIE.
ANDŨ nĩ meciragia mũno ũhoro wĩgiĩ Jesu. Mabuku mamwĩgiĩ nĩ magũragwo mũno. Nacio thenema imwĩgiĩ ikagĩa ngumo nene. Ĩndĩ, andũ aingĩ no meyũragia ciũria ciĩgiĩ Jesu. Makoragwo na mawoni matiganĩte megiĩ Jesu aarĩ ũ.
Mĩaka mĩnini mĩhĩtũku, aandĩki eerĩ a mohoro nĩ mooririe andũ macokie kĩũria gĩkĩ Intaneti-inĩ, “Jesu aarĩ ũ?” Maya maarĩ mamwe ma macokio mao:
● “Kwahoteka aarĩ rabii (mũrutani) wahũthĩrire ũtũũro wake ũrĩ kĩonereria kĩa ũcayanĩri.”
● “Aarĩ mũndũ o ta arĩa angĩ no mũtũũrĩre wake waarĩ wa mwanya.”
● “Gũtirĩ ũira wa kuonania atĩ Jesu aarĩ kuo.”
● “Jesu nĩ Mũriũ wa Ngai ũrĩa waciarirũo, agĩkua, na akĩriũka kuuma kũrĩ akuũ nĩguo atũhonokie harĩ mehia maitũ. Ũmũthĩ arĩ muoyo, na nĩ arĩũka thĩ rĩngĩ.”
● “Njĩtĩkĩtie Jesu Kristo nowe tu mũriũ wa Ngai, ũkoragwo e mũndũ biũ na o hĩndĩ ĩyo ĩyo e Ngai biũ.”
● “Nĩ ũndũ wa wana gwĩtĩkia atĩ Jesu aarĩ kuo.”
Hatarĩ nganja, mawoni macio matiganĩte ũguo matingĩkorũo marĩ ma ma mothe. Hihi nĩ kũrĩ kĩhumo kĩmwe kĩa ũhoro kĩngĩcokia ciũria ciitũ ciĩgiĩ Jesu na njĩra ya kwĩhokeka? Acabi a ngathĩti ĩno metĩkĩtie atĩ Bibilia nĩ Kiugo kĩa Ngai na atĩ noyo iiki ĩngĩtwĩra ma yothe ĩgiĩ Jesu. a—2 Timotheo 3:16.
Gĩcunjĩ-inĩ kĩrĩa kĩrũmĩrĩire, nĩ tũkwarĩrĩria ũrĩa Bibilia ĩcokagia ciũria imwe ciĩgiĩ Jesu iria ciũragio kaingĩ. We mwene oigire atĩ njĩra ya ũhonokio nĩ hingũre harĩ “mũndũ o wothe ũmwĩhokete.” (Johana 3:16) Tũgũkũũria wĩthuthurĩrie macokio macio ũcoke ũtue itua rĩa kana nĩ ũkũbatara kwĩruta makĩria ũhoro wĩgiĩ Jesu na ũrĩa ũngĩonania atĩ nĩ ũmwĩtĩkĩtie.
[Kohoro ka magũrũ-inĩ]
a Nĩgetha wone ũhoro makĩria, rora gĩcunjĩ gĩa 2, kĩrĩa kĩrĩ na kĩongo, “Bibilia—Ibuku Riumĩte Kwĩ Ngai,” ibuku-inĩ rĩa Bibilia Ĩrutanaga Atĩa Kũna? rĩrĩa rĩcabĩtwo nĩ Aira a Jehova.
[Mbica karatathi ka 3]
top © Angelo Cavalli/age fotostock; bottom © Alain Caste/age fotostock; © 2010 SuperStock
