Kuhĩrĩria Ngai

‘Wee Jehova nĩ Ũũmenyete’

MWANDĨKI ũmwe wĩtagwo Arthur H. Stainback, oigire ũũ: “Gũtirĩ ũndũ ũthumbũraga mũndũ ta kũmenya atĩ hatirĩ mũndũ o na ũmwe ũramũrũmbũiya kana kũmũcaĩra.” Hihi wanagerera ũndũ ta ũcio? Hihi kũrĩ hĩndĩ wanaigua atĩ hatirĩ mũndũ o na ũmwe ũrakũrũmbũiya kana akamenya maũndũ marĩa ũragerera? Angĩkorũo nĩguo-rĩ, no ũhoorerio nĩ kũmenya atĩ: Jehova nĩ arũmbũyagia ndungata ciake mũno nginya nĩ amenyaga maũndũ marĩa iragerera ũtũũro-inĩ wacio. Ciugo cia Daudi thĩinĩ wa Thaburi 139 nĩ cinyitaga mbaru ma ĩyo.

Nĩ ũndũ wa kũmenya ũrĩa Ngai aamũrũmbũyagia, Daudi oigire ũũ: “JEHOVA, gũ’thuuthuuria nĩũ’thuuthuurĩtie, ũgakĩ’menya.” (Mũhari wa 1) Daudi aahũthĩrire kiugo kĩega mũno kĩa ngerekano. Kiugo gĩa Kĩhibirania kĩrĩa gĩtaũrĩtwo ‘gũ’thuuthuuria’ nĩ ta kuuga, kwenja mahiga ma goro (Ayubu 28:3), gũthigana bũrũri (Atiirĩrĩri Bũrũri 18:2), kana gũtuĩria maũndũ megiĩ ciira (Gũcokerithia Maathani 13:14). Ĩĩni, Jehova atũĩ wega ũũ atĩ nĩ ta atũthuuthurĩtie maũndũ-inĩ mothe ma ũtũũro witũ. Daudi aratũruta atĩ Ngai nĩ arũmbũyagia ndungata ciake. Acithuuthuragia wega agacimenya irĩ mũndũ ũmwe ũmwe.

Daudi aathire na mbere gũtĩtĩrithia ũrĩa Ngai athuthuragia andũ biũ, rĩrĩa oigire ũũ: “Wee nĩũmenyaga ũhoro wakwa, gũikara thĩ o na gũũkĩra; ũkoragwo ũkũũraine itaranio ciakwa ũrĩ o kũraya.” (Mũhari wa 2) Ũhoro wa ma nĩ atĩ, Jehova aikaraga igũrũ “kũraya.” O na kũrĩ ũguo, nĩ amenyaga rĩrĩa twahurũka, rĩngĩ na rĩngĩ thutha wa mũthenya ũiyũirũo nĩ mĩhang’o, na rĩrĩa twarahũka rũcinĩ kwambĩrĩria mawĩra maitũ ma o mũthenya. Ningĩ nĩ amenyaga mathugunda, merirĩria na mĩerekera iitũ. Hihi Daudi nĩ aamakaga nĩ ũndũ wa Jehova kũmũthuuthuria mũno? Aca, aakenaga mũno nĩ gũthuuthurio. (Mũhari wa 23, 24) Nĩkĩ?

Daudi nĩ aamenyaga atĩ Jehova akoragwo na muoroto mwega hĩndĩ ĩrĩa egũthuuthuria ndungata Ciake. Akĩaria igũrũ rĩgiĩ muoroto ũcio, Daudi oigire: “Ũthũngũrũraga kũgenda gwakwa o na gũkoma, ũgakĩmenya ikĩro ciakwa o ciothe.” (Mũhari wa 3) O mũthenya, Jehova nĩ onaga ‘ikĩro ciitũ ciothe’—mahĩtia maitũ o hamwe na ciĩko ciitũ njega. Hihi atindagĩrĩra o maũndũ marĩa moru kana atindagĩrĩra marĩa mega? Kiugo gĩa Kĩhibirania kĩrĩa gĩtaũrĩtwo ‘gũthũngũrũra’ nĩ ta kuuga “gũcunga” kana “kũhuuha,” ta ũrĩa mũrĩmi ahuhaga magetha make moime mahuti agatigwo na irio njega. Kiugo gĩa Kĩhibirania kĩrĩa gĩtaũrĩtwo ‘kũmenya’ nĩ kuuga “kuona kĩndũ kĩrĩ kĩa bata.” Rĩrĩa Jehova egũthuuthuria ciugo na ciĩko cia andũ ake o mũthenya, onaga iria njega irĩ cia bata mũno. Nĩkĩ? Onaga kĩyo kĩao gĩa kũmũkenia kĩrĩ kĩa bata mũno.

Thaburi 139 ĩtũrutaga atĩ Jehova nĩ arũmbũyagia andũ ake biũ. Amathuuthuragia na akamagitĩra makĩruta mawĩra mao o mũthenya. Nĩ ũndũ ũcio, nĩ amenyaga mathĩna marĩa macemanagia namo, o hamwe na ruo rwa ngoro na meciria rũrĩa ruumanaga na mathĩna macio. Hihi nĩ ũiguaga ũkĩenda gũtungatĩra Ngai ũrĩ tha ta ũcio? Angĩkorũo nĩguo-rĩ, gĩa na ma atĩ: Jehova ‘ndangĩriganĩrũo nĩ wĩra waku, o na wendani ũrĩa wonanĩtie nĩ ũndũ wa rĩĩtwa rĩake.’—Ahibirania 6:10.