Nĩ ũthomete na kinyi icunjĩ cia ica ikuhĩ cia Mũrangĩri? Ta rora kana no ũhote gũcokia ciũria ici:

Nĩkĩ aciari arĩa mathamĩire kũndũ kũngĩ nĩ marabatara gwĩciria ũhoro wa rũthiomi nĩguo mateithie ciana ciao ikũre kĩĩroho?

No kũhoteke ciana ciĩrute rũthiomi rwa kũrĩa mũikaraga irĩ cukuru kana irĩ itũũra-inĩ. Kũmenya thiomi igĩrĩ no gũteithie ciana ciaku. Aciari magĩrĩirũo gwĩciria nĩ kũ ciana ciao ingĩnyitĩra ũhoro wa ma na ithiĩ na mbere kĩĩroho, no akorũo nĩ kĩũngano-inĩ kĩa rũthiomi rwa kũrĩa maraikara kana rwa kũrĩa moimĩte. Aciari Akristiano nĩ meimaga nĩguo maige mbere maũndũ ma kĩĩroho ma ciana ciao.​—w17.05, kar. 9-​11.

Nĩ kĩĩ Jesu eetaga “ici” rĩrĩa oririe Petero: “Nĩ ũnyendete gũkĩra ici?” (Joh. 21:15)

No kũhoteke Jesu aaragia ũhoro wa thamaki iria ciarĩ hau kana biacara ya gũtega thamaki. Jesu aakua, Petero nĩ aacokereire wĩra wake wa gũtega thamaki. Akristiano nĩ magĩrĩirũo kũrora harĩa maigĩte wĩra ngoro-inĩ ciao.​—w17.05, kar. 22-​23.

Nĩ kĩĩ gĩatũmire Iburahimu ere mũtumia wake oige atĩ aarĩ mwarĩ wa ithe? (Kĩam. 12:​10-13)

Ma nĩ atĩ Sara aarĩ mwarĩ wa ithe na Iburahimu. Korũo Sara oigire atĩ aarĩ mũtumia wake, no gũkorũo Iburahimu nĩ angĩoragirũo na ũndũ ũcio ũtũme age kũruta rũciaro rũrĩa Ngai aamwĩrĩire.​—wp17.3, kar. 14-​15.

Nĩ ũndũ ũrĩkũ Elias Hutter aambĩrĩirie nĩguo ateithie arĩa meendaga kwĩruta Kĩhibirania?

Eendaga arutwo mahote gũkũũrana ciugo cia Kĩhibirania iria irĩ Bibilia-inĩ ciathondeketwo kuumana na kiugo kĩrĩkũ, o hamwe na ndemwa iria ciongagĩrĩrũo kĩambĩrĩria-inĩ kana mũthia-inĩ wa kiugo. Aandĩkaga kĩhumo gĩa kiugo na mwandĩko mũmata, nacio ndemwa iria ciongagĩrĩrũo kĩambĩrĩria-inĩ kana mũthia-inĩ wa kiugo agaciandĩka na mwandĩko mũceke. Njĩra o ta ĩyo nĩyo ĩhũthĩrĩtwo gacunjĩ-inĩ ka ũhoro wa magũrũ-inĩ thĩinĩ wa New World Translation of the Holy Scriptures​—With References.​—wp17.4, kar. 11-​12.

Mũkristiano agĩrĩirũo kũrora maũndũ marĩkũ agĩciria ũhoro wa kũiga matharaita ma kwĩgitĩra kuumana na andũ arĩa angĩ?

Ũndũ ũmwe nĩ atĩ, Ngai onaga muoyo ũrĩ mũtheru. Jesu ndeerire arũmĩrĩri ake makuuage hiũ cia kwĩgitĩra. (Luk. 22:​36, 38) Twagĩrĩirũo gũtura hiũ citũ ituĩke hiũ cia mĩraũ. Muoyo nĩ wa bata mũno gũkĩra indo cia kĩĩmwĩrĩ. Nĩ tũtĩaga thamiri cia andũ arĩa angĩ na twendaga gũkorũo tũrĩ kĩonereria kĩega. (2 Kor. 4:2)​—w17.07, kar. 31-​32.

Nĩ kĩĩ gĩtũmaga Mathayo na Luka mataarĩrie ũtũũro wa Jesu arĩ mũnini na njĩra itiganĩte?

Mathayo ataaragĩria ũhoro wa Jusufu, ta ũrĩa eekire amenya atĩ Mariamu arĩ na nda na ndũmĩrĩri iria aaheirũo kĩroto-inĩ cia gũthiĩ Misiri na kuuma kuo. Nake Luka ataaragĩria ũhoro wa Mariamu, ta rĩrĩa aaceereire Elizabethi na ũrĩa eekire rĩrĩa Jesu aatigĩtwo hekarũ-inĩ arĩ kamwana.​—w17.08, kar. 32.

Nĩ maũndũ marĩkũ mamwe Bibilia ĩĩtirĩtie?

Ciugo imwe ihũthĩrĩtwo thĩinĩ wa Bibilia nĩ icenjagia ũrĩa ciugĩte thutha wa ihinda. Maũndũ ma gĩũteti nĩ mahutĩtie rũthiomi rũrĩa rwaragio nĩ andũ aingĩ. Nĩ gũkoretwo na ũkararia wa kũregana na ũtaũri wa Bibilia na thiomi iria ciaragio nĩ andũ aingĩ.​—w17.09, kar. 19-​21.

Hihi nĩ tũkoragwo na mũraika wa gũtũgitĩra?

Aca. Jesu nĩ aaririe ũhoro wa araika a atũmwo ake marorete ũthiũ wa Ngai. (Mat. 18:10) Oigaga atĩ araika nĩ makenagĩra gũteithĩrĩria o ũmwe wa arutwo ake, no ti atĩ araika nĩ magitagĩra o ũmwe wao na njĩra ya kĩama.​—wp17.5, kar. 5.

Wendo ũrĩa mũnene mũno nĩ ũrĩkũ?

A·gaʹpe nĩguo wendo ũrĩa mũnene mũno hĩndĩ ĩrĩa ũratongorio nĩ motaaro marĩa magĩrĩire. No ũhutanie na kuonania wendo muororo na ũrata. Wonanagio na njĩra nene kũgerera ciĩko citũ njega kwerekera andũ arĩa angĩ tũtarĩ na mwĩyendo.​—w17.10, kar. 7.