Ngai nĩ Roho, na araika o nao makoragwo marĩ ciũmbe cia roho itonekaga na “[matirĩ] nyama na mahĩndĩ.” Araika ehokeku maikaraga igũrũ na nĩ mahotaga gũthiĩ mbere ya Ngai.​—Luka 24:39; Mathayo 18:10; Johana 4:24.

Rĩmwe, araika maanehumba mĩĩrĩ ya andũ nĩguo mahingie mawĩra marĩa maahetwo nĩ Ngai gũkũ thĩ na thutha wa kũrĩkia mawĩra macio magĩcokerera mĩĩrĩ ya kĩĩroho.​—Atiirĩrĩri Bũrũri 6:​11-23; 13:​15-20.

O na gũtuĩka araika monanagio thĩinĩ wa Bibilia marĩ arũme, na hĩndĩ ciothe rĩrĩa maanehumba mĩĩrĩ ya andũ monekaga marĩ arũme, matikoragwo marĩ arũme kana atumia. Matihikanagia kana makagĩa ciana. Makĩria ma ũguo, araika matiambire gũkorũo marĩ andũ gũkũ thĩ, hihi marĩ ciana kana andũ agima. Mombirũo nĩ Jehova na nĩkĩo Bibilia ĩmetaga “ariũ a Ngai.”​—Ayubu 1:6; Thaburi 148:​2, 5.

Bibilia nĩ yaragia ũhoro wa “thiomi cia andũ na cia araika,” kuonania atĩ ciũmbe cia roho nĩ ikoragwo na mwarĩrie wacio na rũthiomi rwacio. O na gũtuĩka Ngai nĩ aahũthagĩra araika kwaranĩria na andũ, ndatwĩtĩkĩrĩtie tũmathathayagie kana tũmahoyage.​—1 Akorintho 13:1; Kũguũrĩrio 22:​8, 9.

Gũkoragwo na araika aingĩ mũno, hihi mabilioni. *​—Danieli 7:10; Kũguũrĩrio 5:11.

Araika nĩ “njamba cia hinya” mũno gũkĩra andũ na makoragwo na ũũgĩ wa igũrũ gũkĩra wa andũ. No mahote gũthiĩ na ihenya inene mũno o na gũkĩra ũrĩa tũngĩciria.​—Thaburi 103:20; Danieli 9:​20-23.

O na gũtuĩka araika makoragwo na mwĩcirĩrie wa igũrũ na hinya mũingĩ, nĩ makoragwo na mĩhaka na nĩ harĩ maũndũ matamenyaga.​—Mathayo 24:36; 1 Petero 1:12.

Araika mombirũo marĩ na ũmũndũ ũtiganĩte, ngumo cia ũngai, na wĩyathi wa gwĩthuurĩra. Nĩ ũndũ ũcio, o ta andũ, no mathuure gwĩka wega kana ũũru. Ũndũ wa kĩeha nĩ atĩ araika amwe nĩ maathuurire kũremera Ngai. ​—Judasi 6.