IHINDA inyinyi thutha wa kũhonia atumumu erĩ ahoi, Jesu nĩatonyire gacagi kanini hakuhĩ na Jerusalemu. Akĩĩra arutwo ake erĩ: ‘Thiĩi mũtonye mũciĩ ũrĩa na nĩ mũkuona ndigiri yohetwo, ĩĩ na njaũ yayo. Ciohorei mũndehere,’

Ndigiri yarehwo, akĩmĩikarĩra. Rĩu akĩmĩhaica gatĩĩna kanini atonyete Jerusalemu. Rĩrĩa akuhĩhĩirie itũũra-rĩ, kĩrĩndĩ kĩnene kĩa andũ gĩgĩũka kũmũtũnga. Aingĩ ao makĩaũra nguo ciao makĩara njĩra-inĩ. Angĩ magĩtua mathĩgĩ ma mĩtĩ. O namo makĩarũo njĩra-inĩ, na makĩanĩrĩra: ‘Ngai nĩarathime mũthamaki ũrĩa ũkĩĩte thĩinĩ wa rĩĩtwa rĩa Jehova!’

Mahinda ma tene thĩinĩ wa Isiraeli athamaki erũ mangĩatonyire Jerusalemu mahaicĩte njaũ ya ndigiri nĩguo meyonanie he kĩrĩndĩ. Na ũũ nĩguo Jesu aragĩka. Nao andũ aya maronania atĩ nĩ marenda Jesu atuĩke mũthamaki wao. No ti andũ othe maramwenda. Tũkuona ũũ nĩ ũndũ wa ũrĩa gwekĩkire rĩrĩa Jesu aatonyire thĩinĩ wa hekarũ.

Hekarũ-inĩ Jesu nĩ aahonirie andũ arĩa maarĩ itumumu na ithua. Rĩrĩa ciana nyinyi cionire ũũ, ikĩanĩrĩra ikĩgocaga Jesu. Ũndũ ũcio ũkĩrakaria athinjĩri-Ngai, na makĩũria Jesu atĩrĩ: ‘Kaĩ ũtekũigua ũrĩa ciana ici ikuuga?’

Nake Jesu akĩmera atĩrĩ, ‘Ĩĩ-ni, nĩngũigua. Kaĩ mũtarĩ mwathoma ciugo ici cia Biblia: “Tũnua-inĩ twa twana na ngenge nĩwatũmire hoime rũgooco?” ’ Nĩ ũndũ ũcio ciana ciathire na mbere na kũgooca mũthamaki wa Ngai.

Twagĩrĩirũo nĩ gũtuĩka ta ciana icio, kana tiguo? Andũ amwe mahota gũtũgiria kwaria ũhoro wa ũthamaki wa Ngai. No tũgũthiĩ na mbere tũkĩĩraga andũ arĩa angĩ ũndũ wĩgiĩ maũndũ ma magegania marĩa Jesu arĩĩkĩra andũ.

Rĩrĩa Jesu aarĩ gũkũ thĩ-rĩ, ihinda rĩake rĩtiarĩ ikinyu rĩa gwathana arĩ mũthamaki. Ihinda rĩu rĩgakinya rĩ? Arutwo a Jesu nĩ mendaga kũmenya. Nĩ tũgũthoma ũhoro o narua.