Hihi wĩ na mĩaka gatagatĩ ka 23 na 65 na ũrĩ ũtungata-inĩ wa mahinda mothe? Wĩ na ũgima mwega wa mwĩrĩ, na hihi no ũhote gũtungata kũndũ kũrĩ na bata mũnene wa ahunjia? Angĩkorũo macokio maku nĩ ĩĩ, hihi nĩ wĩcirĩtie kũiyũria fomu ya Cukuru ya Ahunjia a Ũthamaki? Kuuma hĩndĩ ya kĩrathi kĩa mbere, andũ ngiri nyingĩ arĩa marĩ kĩhiko-inĩ na arĩa matarĩ kĩhiko-inĩ nĩ maiyũrĩtie fomu. O na kũrĩ ũguo, kwĩ na ũbataro mũnene makĩria wa ariũ a Ithe witũ arĩa matarĩ kĩhiko-inĩ maiyũrie fomu ĩyo. Hoya Jehova akũhe wendi mũnene makĩria wa kũmũkenia na kwĩgerekania na Mũriũ wake. (Thb 40:8; Mat 20:28; Ahi 10:7) Ũcoke ũrore ũrĩa ũngĩnyihanyihia mathaa maku ma wĩra kana maũndũ mangĩ marĩa mangĩkũgirĩrĩria, nĩguo ũhote kwagĩrĩra.

Nĩ mĩeke ĩrĩkũ ya ũtungata arĩa marĩkĩtie cukuru ĩyo ya gĩtheokrasi magĩĩte nayo? Amwe nĩ matũmĩtwo magatungate kũndũ kwaragio thiomi ingĩ kana makanyitanĩre mahunjio-inĩ ma kũndũ kwa mũingĩ taũni-inĩ nene. Angĩ nao macokaga magatungata marĩ arori a mũthiũrũrũko a gũteithĩrĩria, arori a mũthiũrũrũko, kana amishonarĩ. O ũgĩciragia ũrĩa ũngĩandandũra ũtungata waku harĩ Jehova, wĩgerekanie na mwerekera wa mũnabii Isaia ũrĩa woigire ũũ: “Niĩ ũyũ haha! Ndũma!”​—Isa 6:8.

WĨRORERE VIDEO YA AMISHONARĨ​—ARUTI WĨRA MARĨ WĨRA-INĨ WA MAGETHA, ŨCOKE ŨCOKIE CIŨRIA ICI:

• Amishonarĩ mathuuragwo atĩa?

• Nĩ wĩra ũrĩkũ mwega ũrarutwo nĩ amishonarĩ?

• Nĩ irathimo ta irĩkũ ciumanaga na ũtungata wa ũmishonarĩ?