N nase na Montreal, kel sidadi más grandi di pruvínsia di Quebec, na Kanadá. N tinha três irmon. Nos mai ku nos pai kria-nu ku txeu amor i nu tinha bons vizinhu na Rosemont. Nu ta viveba sábi i na pas ku kunpanheru.

 Kantu mi éra pikinoti N tinha interesi pa Bíblia. N ta lenbra ma ku 12 anu, N gostaba txeu di lé Novu Testamentu ki ta pâpia sobri vida di Jizus. Amor i konpaxon di Jizus pa otus algen toka nha korason, pur isu N krê sérba sima el. Infilismenti, kel dizeju li kaba kantu N fika más grandi i N kumesa ta kolega ku kes algen ki éra mau influénsia pa mi.

 Nha pai ta tokaba saxofone. El da-m se saxofone i tanbê el djuda-m kria un grandi amor pa múzika. N pasa ta konsentra nha vida na múzika. N gostaba di múzika di tal manera ki N prende toka vióla faxi. Na kel ténpu, N kria un grupu di rock ku alguns amigu i nu toka na txeu spetaklu. Alguns produtor di múzika, ki é txeu konxedu, da kónta di nhas múzika i es oferese pa djuda nhas múzika bira más konxedu. N sina kontratu ku kel midjór enpréza ki ta gravaba múzika. Nhas múzika bira txeu konxedu i ta tokada sénpri na rádiu na Quebec.

 N pensaba ma N tinha tudu kel ki N mesteba. N staba jóven, N tinha fama i N sta ganhaba txeu dinheru ku múzika ki N ta amaba. Di dia N ta bai trenaba na jináziu, N ta daba entrivista, N ta daba autógrafu i N ta parseba na tilivizon. Di noti, N ta daba spetaklus i N ta baba pa féstas. N kumesa ta bebe kantu mi éra más jóven i dipôs N bira ta uza dróga pa N pode lidaba ku kes monti di algen. N ka éra responsável i N ta fazeba konportamentu seksual mariadu.

 Alguns algen tinha invéja di nha vida pamodi ta parseba ma mi éra filís. Má déntu mi, N ta xintiba vaziu i kel-la ta inkomodaba mi, prinsipalmenti óras ki N ta staba mi sô. N ta xintiba tristi i txeu preokupadu. Infilismenti, kantu N tinha más susésu, dôs produtor di meu móre pamodi SIDA. N fika spantadu! N ta amaba múzika, má manera di vive pamodi múzika disgosta-m.

 Nbóra N tinha susésu, N sabia ma algun kuza staba txeu mariadu na mundu. Pamodi ki tinha txeu injustisa? N ta fikaba ta pensa pamodi ki Deus ka ta fazeba nada. N ta oraba pa Deus manenti. Un bês ki nu staba na féria di faze spetaklu, N kumesa ta lé Bíblia otu bês. Nbóra N ka ntende kuazi nada ki N lé, N odja ma fin di mundu staba kuazi ta ben.

 Kantu N staba ta lé Bíblia, N diskubri ma un bês Jizus faze jejun na dizértu duránti 40 dia. (Mateus 4:1, 2) N pensaba ma si N fazeba mésmu kuza, talvês Deus ta mostraba mi algun kuza. Nton N marka un data pa N kumesa faze jejun. Dôs simana antis di N kumesa, dôs Tistimunha di Jeová konku na nha pórta i N konvida-s pa es entra, sima si N staba ta spera-s. N djobe un di kes Tistimunha di Jeová, ki txoma Jacques, déntu di odju i N pergunta-l, “Modi ki nu pode sabe ma nu sta ta vive na ténpu di fin di kel mundu li?” Pa el responde-m, el abri Bíblia i el lé na 2 Timóteo 3:1-5. N faze-s un monti pergunta i N fika dimiradu pamodi es ta respondeba dretu i sénpri ku bazi na Bíblia. Dipôs di alguns vizita, N ntende ma N ka mesteba faze jejun.

 N kumesa ta studa Bíblia ku Tistimunhas di Jeová. Dipôs N korta nha kabélu kunpridu i N kumesa ta sisti tudu runion na un Salon di Reinu di Tistimunhas di Jeová ki ta fikaba pértu. Manera ki es resebe-m na runions da-m sertéza ma dja N atxaba verdadi.

 É klaru ki pa N fazeba sima N sta prendeba na Bíblia, N tinha ki fazeba txeu mudansa na nha vida. Un di kes kuza éra para di uza dróga i para kel vida di konportamentu seksual mariadu. Tanbê N mesteba muda nha atitudi di preokupa sô ku nha kabésa i mostra más preokupason pa otus algen. Kómu mi éra solteru, N tinha ki kuidaba di nisisidadis spritual di nhas dôs fidju i ntende kuzê ki es ta xintiba. Nton, N larga nha vida na múzika i N ranja un trabadju ki N ta ganhaba poku na un fábrika.

 Faze tudu kes mudansa li foi difísil. Sima N staba ta sforsa pa N para di uza dróga, N tevi ki luta ku alguns kuza ki N fika ta xinti pamodi N staba ta tenta larga-l. I N torna uza dróga alguns bês. (Romanos 7:19, 21-24) Larga kel vida di konportamentu seksual mariadu foi un grandi luta. Tanbê nha novu trabadju éra txeu kansadu i kel ki N ta ganhaba ta dizanimaba mi. Dinheru ki N ta ganhaba na dôs óra ku múzika N fika ta ganha-l na três mês di trabadju.

 Orason djuda-m ka dizisti di faze kes mudansa, sikrê es éra difísil. Tanbê, lé Bíblia tudu dia éra txeu inportanti pa mi. Alguns párti di Bíblia da-m txeu koraji. Un di kes párti éra 2 Coríntios 7:1, ki ta manda sérvus di Deus pa ‘linpa di tudu sujidadi di karni i di spritu’. Otu testu ki djuda-m ten sertéza ma N ta konsigiba larga ábitus mariadu é Filipenses 4:13, ki ta fla: ‘Pa tudu kuza N ten forsa pamodi kel ki ta da-m puder.’ Jeová Deus responde-m nhas orason i el djuda-m ntende i vive sima verdadis ki sta na Bíblia. Kel-la djuda-m didika nha vida pa el. (1 Pedro 4:1, 2) N batiza kómu Tistimunha di Jeová na anu 1997.

 N da kónta ma si N kontinuaba ku kel stilu di vida ki N tinha, N staba mortu pa gósi. Má envês di kel-la, gósi N ten un vida rei di sábi! Elvie, ki é nha mudjer, é spetakular i un benson di verdadi. Nu gosta di inxina Bíblia djuntu pa ténpu interu pa otus algen. Kel-li ta da-m txeu alegria i kontentamentu. N ta agradise Jeová di korason pamodi el atrai-m pa el. — João 6:44.