1. Ki speransa ki Jeová da-nu?

 JEOVÁ da-nu speransa sábi di vive pa tudu ténpu. Alguns ten speransa di bai vive pa tudu ténpu na Séu ku korpu sima di anju i ki ka ta móre. (1 Cor. 15:50, 53) Má, maioria di algen ten speransa di ben vive pa tudu ténpu na téra ku saúdi perfeitu i filisidadi. (Apo. 21:3, 4) Ka ta nporta si nos speransa é di vive pa tudu ténpu na séu ô na téra, nos speransa ten txeu valor pa nos.

2. Kal ki é bazi pa nos speransa i pamodi ki nu pode fla kel-li?

² Palavra “speransa”, ki ta uzadu na Bíblia, pode krê fla “spéra pa un kuza sábi kontise”. Nu pode ten sertéza ma nos speransa pa futuru ta ben kontise pamodi el ben di Jeová. (Rom. 15:13) Nu sabe kuzê ki el promete i nu sabe ma sénpri el ta kunpri se promésa. (Núm. 23:19) Nu ten sertéza ma Jeová ten dizeju i puder di faze tudu kuza ki el fla ma el ta faze. Nton, nos speransa ka ta ben di kuzê ki nu ta imajina ô kuzê ki nu krê pa kontise. Nos speransa ta ben di kuzê ki nu sabe ma é verdadi.

3. Kuzê ki nu sta ben odja na kel studu li? (Salmo 71:5)

³ Nos Pai ki sta na séu ta ama-nu i el krê pa nu kunfia na el. (Lé Salmo 71:5.) Óras ki nu ta kunfia na Jeová i nos speransa é fórti, nu ta konsigi aguenta firmi óras ki nu sta pasa pa prublémas i nu ta ten koraji i alegria, ka ta nporta kuzê ki pode ben kontise ku nos na futuru. Nu ben odja modi ki nos speransa ta proteje-nu. Primeru, nu ta ben odja modi ki nos speransa é sima un ánkura i sima un kapaseti. Dipôs, nu ta ben odja modi ki nu pode bira nos speransa más fórti.

4. Modi ki speransa é sima un ánkura? (Hebreus 6:19)

⁴ Na karta ki apóstlu Polu skrebe pa ebreus, el konpara nos speransa ku un ánkura. (Lé Hebreus 6:19.) Polu viaja di barku txeu bês, nton el sabia ma es ta uzaba ánkura pa ka dexaba un barku disvia di se rumu. Un bês, el staba na un barku kantu kontise un tenporal fórti. Duránti kel tenporal el odja kes marinheru ta bota ánkura na mar pa ka dexa kel barku daba na rótxa. (Atos 27:29, 39-41) Sima un ánkura ta djuda un barku ka disvia di se rumu, nos speransa ta djuda-nu kontinua ku nos amizadi fórti ku Jeová, asi nu ka ta disvia óras ki nu sta pasa pa prublémas ki é sima un tenporal fórti. Nos speransa ta pô-nu kontinua kalmu óras ki nu sta pasa pa prublémas pamodi nu ta kridita ma kuzas ta midjora. Lenbra ma Jizus fla ma nu ta sérba pirsigidu. (João 15:20) Nton, si nu midita na kuzê ki Jeová promete-nu, kel-li ta djuda-nu kontinua ta sirbi-l.

5. Modi ki speransa djuda Jizus aguenta se mórti?

⁵ Odja modi ki speransa djuda Jizus kontinua fiel, sikrê el sabia ma el ta moreba di un manera ki el ta sufreba txeu. Na Pentikósti di anu 33, apóstlu Pedru pâpia di un profesia ki sta na livru di Salmos ki ta mostra modi ki Jizus staba kalmu i ku kunfiansa. Pedru fla: ‘N ta ben mora na speransa; pamodi bu ka ta dexa-m na Sipultura, nen bu ka ta dexa pa kel ki é lial pa bo disfaze na kóba. Bu ta ben intxi-m di alegria na bu prezénsa.’ (Atos 2:25-28; Sal. 16:8-11) Nbóra Jizus sabia ma el ta moreba, el tinha speransa fórti ma Deus ta resusitaba el i ma el ta tinha alegria di staba djuntu ku se Pai na séu otu bês. — Heb. 12:2, 3.

6. Kuzê ki un irmon fla sobri speransa?

⁶ Nos speransa dja djuda txeu irmon ku irmans aguenta firmi. Odja izénplu di Leonardu Xin, ki é un irmon fiel ki ta moraba na Inglatéra. Duránti Primeru Géra na Mundu Interu el podu prézu pamodi el nega bai trópa. Duránti dôs mês el podu na un séla ki el ta fikaba el sô. Dipôs di kel-li, es obriga-l pa el faze un trabadju duru pa un ténpu. Dipôs el skrebe: “Kes kuza ki N pasa pa el djuda-m odja ma nu meste ten un speransa fórti pa nu konsigi aguenta firmi. Nu ten izénplu di Jizus, di apóstlus, di kes proféta i nu ten kes promésa di Bíblia ki ten txeu valor. Tudu kel-li ta da-nu un speransa fórti pa futuru i ta da-nu forsa pa nu aguenta firmi.” Speransa éra sima un ánkura pa Leonardu, i el pode ser sima un ánkura pa nos tanbê.

7. Modi ki prublémas pode bira nos speransa más fórti? (Romanos 5:3-5; Tiago 1:12)

⁷ Óras ki nu ta aguenta prublémas i nu ta odja modi ki Jeová djuda-nu, nu ta da kónta ma el sta kontenti ku nos. Kel-li ta poi nos speransa ta bira más fórti. (Lé Romanos 5:3-5; Tiago 1:12.) Pur isu, gósi nos speransa é más fórti di ki kantu nu prende verdadi. Satanás krê pa nos prublémas kaba ku nos, má ku ajuda di Jeová nu pode vense kada un di es.

8. Modi ki speransa é sima un kapaseti? (1 Tessalonicenses 5:8)

⁸ Bíblia tanbê ta konpara nos speransa ku un kapaseti. (Lé 1 Tessalonicenses 5:8.) Un trópa ta uza kapaseti pa proteje  se kabésa di kes pankada ki se inimigus ta tenta da-l. Na nos géra kóntra Satanás, nu meste proteje nos menti kóntra se atakis. El ta uza txeu armadilha i ideias pa tenta prujudika nos manera di pensa. Sima kapaseti ta proteje kabésa di un trópa, nos speransa ta proteje nos manera di pensa, asi nu pode kontinua fiel pa Jeová.

9. Kuzê ki ta kontise óras ki un algen ka ten speransa?

⁹ Nos speransa di vive pa tudu ténpu ta djuda-nu toma disizons ku sabedoria i disirnimentu. Má si nos speransa bira fraku i nu kumesa ta pensa sô na nos dizejus, nu pode skese di nos speransa di vive pa tudu ténpu. Pensa na alguns irmon ki ta moraba na sidadi di Korintu na ténpu antigu. Es perde fé na un promésa inportanti di Deus, ki é speransa di resureison. (1 Cor. 15:12) Polu skrebe ma kes algen ki ka ta kriditaba na resureison ta viveba sô pa faze ses dizeju. (1 Cor. 15:32) Gósi txeu algen ki ka ten speransa na promésas di Deus ta vive sô pa pasa sábi. Má nos é diferenti pamodi nu ta kunfia na kes promésa di Deus pa futuru. Nos speransa é sima un kapaseti ki ta proteje nos manera di pensa i ta djuda-nu ka pensa sô na nos kabésa, ki é un kuza ki pode prujudika nos amizadi ku Jeová. — 1 Cor. 15:33, 34.

10. Modi ki speransa ta proteje-nu di ideias mariadu?

¹⁰ Nos kapaseti di speransa tanbê pode proteje-nu di pensa ma nunka nu ka ta konsigi agrada Jeová. Pur izénplu, alguns algen pode pensa: ‘Ami N ka ta resebe vida pa tudu ténpu. Ami é ka bon algen. Nunka N ka ta konsigi faze kel ki Deus ta krê.’ Lenbra ma Elifás, ki éra un amigu falsu di Jó, fla un kuza kuazi sima kel-li. Elifás fla: ‘Modi ki un ómi ki ta móre pode ser puru?’ Tanbê el fla sobri Deus: ‘Odja! El ka ta kunfia na se santus, i nen séu el ka atxa ma é puru.’ (Jó 15:14, 15) Fórti mintira! Lenbra ma é Satanás ki krê pa bu pensa si. El sabe ma si bu kontinua ta pensa si, bu ta kumesa ta perde bu speransa. Nton, nega kes mintira li i konsentra na promésas di Jeová. Nunka ka bu duvida ma el krê pa bu vive pa tudu ténpu i ma el ta djuda-u alkansa kel obijetivu li. — 1 Tim. 2:3, 4.

11. Pamodi ki nu debe ten paxénxa timenti nu ta spéra pa Jeová kunpri se promésas?

¹¹ É ka tudu óra ki é fásil kontinua ku nos speransa fórti. Nu pode perde paxénxa timenti nu ta spéra pa Deus kunpri se promésas. Má pamodi Jeová sénpri izisti, kel ki ta parse txeu ténpu pa nos, pa el é poku ténpu. (2 Ped. 3:8, 9) El ta ben kunpri se promésa di midjór manera, má talvês é ka na kel ténpu ki nu sta ta spéra pa el faze-l. Kuzê ki pode djuda-nu kontinua ku nos speransa fórti timenti nu ta spéra ku paxénxa pa Deus kunpri se promésas? — Tia. 5:7, 8.

12. Sima sta na Hebreus 11:1, 6, modi ki speransa sta ligadu ku fé?

¹² Nu ta kontinua ku nos speransa fórti si nu mante un bon amizadi ku Jeová pamodi é el ki ta ben kunpri nos speransa. Pa nu ten speransa nu debe ten fé ma Jeová ta izisti i ma ‘el ta rekonpensa kes ki ta djobe-l asériu.’ (Lé Hebreus 11:1, 6.) Si nu kridita di korason ma Jeová izisti, nu ta ten más kunfiansa ma tudu kuza ki el promete ta ben kunpri. Nu ben odja alguns manera di midjora nos amizadi ku  Jeová, i asi pa nu kontinua ku nos speransa fórti.

13. Modi ki nu pode bira amigu di Deus?

¹³ Faze orason pa Jeová i lé se Palavra. Nu ka pode odja Jeová, má nu pode bira se amigu. Nu pode pâpia ku el na orason ku sertéza ma el ta obi-nu. (Jer. 29:11, 12) Nu pode obi Jeová óras ki nu ta lé se Palavra i nu ta midita na el. Óras ki nu ta lé modi ki Jeová kuida di kes algen ki éra lial pa el na pasadu, nos speransa ta bira kada bês más fórti. Tudu kuza ki sta na Palavra di Deus ‘skrebedu pa nos instruson, asi, pa nu pode ten speransa através di nos kapasidadi di aguenta firmi i di konsolu ki nu ta resebe di Skrituras.’ — Rom. 15:4.

14. Pamodi ki nu debe pensa na kuzê ki Jeová dja faze pa otus?

¹⁴ Midita na modi ki Jeová dja kunpri se promésas. Odja kuzê ki Deus faze pa Abraon i Sara. Dja es pasaba idadi di ten fidju. Má Deus dja prometeba es ma es ta tinha un fidju. (Gén. 18:10) Modi ki Abraon reaji? Bíblia ta fla: ‘El tinha fé ma el ta ben biraba pai di txeu nason’. (Rom. 4:18) Nbóra Abraon ka sabia modi ki promésa di Deus ta kunpriba, el tinha kunfiansa ma Jeová ta kunpriba kuzê ki el prometeba el. Kel ómi fiel li ka fika diziludidu. (Rom. 4:19-21) Stórias sima kel-li ta inxina-nu ma nu pode kunfia ma Jeová sénpri ta kunpri se promésas, sikrê nu ta atxa ma ka ta da pa kunpri-s.

15. Pamodi ki nu debe pensa na kuzê ki Deus dja faze pa nos?

¹⁵ Pensa na kuzê ki Jeová dja faze pa bo. Pensa na modi ki kes promésa ki sta na Palavra di Deus ki dja kunpri dja djuda-u. Pur izénplu, Jizus promete ma se Pai ta da-u kes kuza ki bu meste pa bu vive.  (Mat. 6:32, 33) Jizus tanbê da-u sertéza ma Jeová ta da-u spritu santu óras ki bu pidi-l. (Luc. 11:13) Jeová kunpri kes promésa li. Talvês bu pode pensa na otus promésa ki dja el kunpri pa djuda-u. Pur izénplu, el promete ma el ta purdua-u, ma el ta konsola-u i ma el ta da-u kumida spritual. (Mat. 6:14; 24:45; 2 Cor. 1:3) Óras ki bu ta midita na kuzê ki Deus dja faze pa bo, bu speransa na kel ki el ta ben faze pa bo na futuru ta bira más fórti.

16. Pamodi ki speransa é sima un prezenti ki ten txeu valor?

¹⁶ Nos speransa di vive pa tudu ténpu é un prezenti di Deus ki ten txeu valor. Nu tene gana pa txiga kel futuru rei di sábi ki nu ten sertéza ma ta ben kontise própi. El é sima nos ánkura ki ta djuda-nu aguenta prublémas, pirsigison i ti mórti. El é sima nos kapaseti ki ta proteje nos manera di pensa, asi nu ta konsigi nega kes kuza mariadu i faze kel ki é dretu. Nos speransa ki ten bazi na Bíblia ta djuda-nu ten un amizadi más fórti ku Deus i el ta mostra-nu ma el ta ama-nu txeu. Nu ta ten txeu benson si nu kontinua ku nos speransa fórti.

17. Pamodi ki nos speransa ta pô-nu ta fika kontenti?

¹⁷ Kantu apóstlu Polu skrebe karta pa kes kriston na Roma, el fla-s: ‘Nhos alegra ku nhos speransa.’ (Rom. 12:12) Polu pode fikaba kontenti pamodi el tinha sertéza ma si el kontinuaba fiel, el pode ganhaba vida pa tudu ténpu na séu. Nos tanbê nu pode fika kontenti ku nos speransa pamodi nu ten sertéza ma Jeová ta ben kunpri se promésas. Sima salmista skrebe: ‘Filís é kel ki ta poi se speransa na se Deus Jeová, kel ki é sénpri fiel’. — Sal. 146:5, 6.