Un algen ki é umildi ta ruspeta otus algen. El é ka orgulhozu i el ka ta spéra pa el tratadu di manera spesial. Envês di kel-li, el ta preokupa di verdadi ku otus algen i el sta prontu pa prende ku es.

Alguns algen ta atxa ma kenha ki é umildi é fraku. Má kel-li é ka verdadi. Un algen umildi é fórti pamodi el meste ten koraji pa rekonhese se fadjas i el ta ntende ma ten kuzas ki el ka ta konsigi faze.

• Ken ki é umildi ta ten más amigus. Ten un livru * ki ta fla: “É más faxi pa kes algen umildi da dretu ku tudu algen i é más fásil pesoas sta djuntu ku es i pâpia ku es.”

• Ken ki é umildi ta ten un futuru midjór. Prende ser umildi ta djuda bu fidju gósi i na futuru, sima pur izénplu óras ki el bai djobe un trabadju. Dotor Leonard Sax fla: “Un jóven ki ta pensa dimás na se kabésa i ki ka ta konsigi rekonhese se limitasons, óras ki el sta na un entrivista di trabadju el pode pasa un mau imaji di se kabésa. Má si un jóven sta obi kel algen ki sta faze-l entrivista ku txeu atenson, é más fásil el konsigi kel trabadju.” *

Djuda bu fidju ka pensa dimás na se kabésa.

PRINSÍPIU DI BÍBLIA: ‘Si algen ta atxa ma el é algun kuza, má el é ka nada, el sta ta ngana se kabésa.’ — Gálatas 6:3.

• Toma kuidadu pa bu ka iludi bu fidju. Si bu fla-l kuzas sima “Tudu bus sonhu ta realiza” i “Bu pode ser kel ki bu krê”, ta parse ma bu sta ta motiva-l, má normalmenti é ka kel-li ki ta kontise na vida. Bu fidju ten más xansi di ser filís si el poi métas ikilibradu i si el sforsa pa alkansa-s.

• Ilojia-l pa kes kuza pikinoti ki el ta faze. Sô fika ta fla bu fidju ma el é “spetakular” ka ta djuda-l ser umildi. Pur isu, ilojia-l pa un kuza ki el faze.

• Poi limiti di kantu ténpu bu fidju ta uza redi sosial. Txeu algen ta uza redi sosial pa ngaba di ses kapasidadi i pa mostra kes kuza ki es faze. Kel atitudi li ka ta mostra umildadi.

• Insentiva bu fidju pa pidi diskulpa sénpri. Óras ki bu fidju faze un kuza mariadu, djuda-l ntende kuzê ki el faze i seta se éru.

 Inxina bu fidju mostra gratidon.

PRINSÍPIU DI BÍBLIA: ‘Nhos mostra ma nhos é gratu.’ — Colossenses 3:15.

• Inxina bu fidju mostra gratidon pa kriason. Kriansas debe da valor pa naturéza i ntende modi ki nu ta dipende di el pa nu sobrivive. Nu meste di ar pa respira, agu pa bebe i di kumida pa kume. Uza kes izénplu li pa djuda bu fidju mostra gratidon pa tudu kes kuza bunitu ki Deus kria.

• Inxina bu fidju da otus algen valor. Lenbra bu fidju ma sénpri ta ten un algen ki ta faze algun kuza más midjór di ki el. Inxina-l ma envês di el xinti siumis pamodi kapasidadi ki otus algen ten, el pode prende ku es.

• Inxina bu fidju agradese. Inxina bu fidju fla “obrigadu” di korason ka pamodi obrigason. Agradese ta djuda-nu kontinua umildi.

Inxina bu fidju ma é bon faze kuzas pa otus.

PRINSÍPIU DI BÍBLIA: ‘Nhos mostra umildadi i nhos trata otus sima algen más inportanti ki nhos, i pa kel-li ka nhos djobe sô nhos própi interesi, má tanbê interesi di otus.’ — Filipenses 2:3, 4.

• Inxina bu fidju faze kes trabadju na kaza. Si bu ka ta poi bu fidju faze kes trabadju na kaza, bu pode pô-l ta atxa ma kes kuza ki el krê faze é más inportanti. El debe ntende ma antis di el bai brinka, el ten ki faze kes trabadju na kaza. Mostra-l ma óras ki el ta faze kes trabadju na kaza é un manera di el djuda se família i tudu algen ta fika kontenti i ta ruspeta-l pamodi kel-li.

• Mostra bu fidju ma faze kuzas pa otus é un priviléjiu. Faze kuzas pa otus ta djuda kriansas bira un algen maduru. Djuda bu fidju diskubri ken ki meste di ajuda i pâpia ku el sobri kuzê ki el pode faze pa djuda-s. Ilojia-l i apoia-l óras ki el ta faze kuzas pa otus.