LISON 26
Pamodi ki ten txeu maldadi ku sufrimentu?
Óras ki ta kontise un disgrasa é normal pesoas pergunta: “Pamodi ki kes kuza li ta kontise?” Bu ta fika kontenti di sabe ma Bíblia ten respósta klaru pa kel pergunta li!
1. Modi ki maldadi kumesa na mundu?
Satanás, ki tanbê ta txomadu Diabu, rabela kóntra Deus. Satanás krê mandaba na otus algen. Pur isu, el influensia kel primeru ómi ku mudjer, Adon ku Eva, pa djunta ku el i rabela kóntra Deus. Satanás faze kel-la kantu el konta Eva mintira. (Génesis 3:1-5) Satanás poi Eva ta pensa ma Jeová staba ta sukundi algun kuza ki éra bon pa el. El krê flaba ma nu pode ser más filís si nu ka obi ku Deus. Satanás konta primeru mintira kantu el fla Eva ma el ka ta moreba. Pur isu, Bíblia ta txoma Satanás di ‘mintirozu i pai di mintira.’ — João 8:44.
2. Kuzê ki Adon ku Eva disidi faze?
Jeová da Adon ku Eva txeu kuza. El fla-s ma es podia kumeba di tudu arvi ki staba na jardin di Éden. Má, tinha un arvi ki es ka devia kumeba. (Génesis 2:15-17) Má simé, es disidi kume fruta di kel arvi. Eva ‘panha fruta di kel arvi i el kumesa ta kume-l’. Dipôs, Adon ‘kumesa ta kume-l’ tanbê. (Génesis 3:6) Es tudu dôs ka obi ku Deus. Dja ki Adon ku Eva éra perfetu, éra fásil pa es fazeba kel ki é dretu. Má, es disidi ka obi ku Deus. Es peka i es ka seta pa Deus manda na es. Kel disizon li traze-s txeu sufrimentu. — Génesis 3:16-19.
3. Modi ki kel disizon ki Adon ku Eva toma afeta-nu?
Kantu Adon ku Eva peka, es bira inperfetu. Pur isu, es pasa inperfeson pa tudu ses fidju. Bíblia ta fla sobri Adon: ‘Pekadu entra na mundu pamodi un ómi i mórti entra pamodi pekadu, di es manera mórti spadja pa mundu interu’. — Romanos 5:12.
Ten txeu kuza ki ta pô-nu sufri. Alvês nu ta sufri pamodi nu toma un disizon mariadu. Otu óra nu ta sufri pamodi otus algen toma disizon mariadu. Ô tanbê nu ta sufri pamodi nu sta na lugar mariadu i na óra mariadu. — Lé Eclesiastes 9:11.
SABE MÁS
Odja pamodi ki Deus é ka kulpadu pa maldadi ku sufrimentu ki ten na mundu oji, i modi ki el ta xinti óras ki nu ta sufri.
4. Ken ki é kulpadu pa nos sufrimentu?
Txeu algen ta atxa ma é Deus ki sta manda na mundu. Má kel-li é verdadi? Odja VÍDIU.
Lé Tiago 1:13 i 1 João 5:19, i dipôs pâpia sobri kel pergunta li:
-
Deus é kulpadu pa maldadi ku sufrimentu ki ten na mundu?
5. Kuzê ki sta kontise désdi ki Satanás kumesa ta manda na mundu?
Lé Génesis 3:1-6, i dipôs pâpia sobri kes pergunta li:
-
Ki mintira ki Satanás konta? — Odja versíklus 4 i 5.
-
Modi ki Satanás poi pesoas ta pensa ma Jeová staba ta sukundi algun kuza ki éra bon pa es?
-
Di akordu ku kel ki Satanás fla, Jeová meste manda na nos pa nu ser filís?
Lé Eclesiastes 8:9, i dipôs pâpia sobri kel pergunta li:
-
Dja ki é ka Jeová ki sta manda na mundu, kuzê ki sta kontise?
-
Adon ku Eva éra perfetu i es ta viveba na Paraízu. Má es obi ku Satanás i es rabela kóntra Jeová.
-
Dipôs ki es rabela kóntra Deus, mundu fika xeiu di pekadu, sufrimentu i mórti.
-
Jeová ta ben kaba ku pekadu, sufrimentu i mórti. Nu ta ben bira perfetu i nu ta ben vive na Paraízu.
6. Jeová ta preokupa ku nos sufrimentu
Deus ta preokupa ku nos óras ki nu ta sufri? Odja kuzê ki Rei Davidi i apóstlu Pedru skrebe. Lé Salmo 31:7 i 1 Pedro 5:7, i dipôs pâpia sobri kel pergunta li:
-
Modi ki bu ta xinti di sabe ma Jeová ta odja i el ta preokupa ku nos sufrimentu?
7. Deus ta ben kaba ku tudu nos sufrimentu
Lé Isaías 65:17 i Apocalipse 21:3, 4, i dipôs pâpia sobri kel pergunta li:
-
Pamodi ki é bon sabe ma Jeová ta ben kaba ku tudu kes kuza mariadu ki nu sta pasa pa el?
Bu sabia?
Kantu Satanás konta kel primeru mintira, el mantxa nómi di Jeová. Kel-li krê fla ma el poi pesoas ta pensa kuzas mariadu sobri Jeová, i ma Jeová ka ta governa ku justisa i amor. Ka ta dura, Jeová ta ben kaba ku tudu nos sufrimentu i el ta ben linpa se nómi. El ta ben prova ma se manera di governa é midjór. Linpa nómi di Jeová é kel kuza más inportanti na Séu ku Téra. — Mateus 6:9, 10.
ALGUNS ALGEN TA FLA: “Nu ta sufri pamodi é vontadi di Deus.”
-
Kuzê ki bu ta flaba?
REZUMU
Satanás i Adon ku Eva é kulpadu pa maldadi ki ten na mundu. Jeová ta preokupa txeu ku nos, i ka ta dura el ta ben kaba ku tudu sufrimentu.
Perguntas di rezumu
-
Ki mintira Satanás konta Eva?
-
Modi ki disizon ki Adon ku Eva toma afeta-nu?
-
Modi ki nu sabe ma Jeová ta preokupa ku nos sufrimentu?
DJOBE MÁS
Odja modi ki Bíblia ta splika kuzê ki é pekadu.
Lé más sobri kel akuzason ki Satanás faze na jardin di Éden.
“Pamodi ki Deus ta dexa sufrimentu kontise?” (Sentinéla, 1 di janeru di 2014)
Sabe respósta ki ta konsola-nu sobri un pergunta difísil.
“Pamodi ki matadu txeu judeu na Europa? Pamodi ki Deus ka inpidi kel-la?” (Artigu na jw.org)
Odja kuzê ki un ómi prende ku sufrimentu ki el pasa.
Bu pode gosta di kes-li tanbê
PERGUNTAS KI MÁS TA FAZEDU
Modi ki ta fazedu kel studu di Bíblia ki Tistimunhas di Jeová ta oferese?
Bu pode uza kalker traduson di Bíblia, pa bu studa Bíblia di grasa ku Tistimunhas di Jeová. Bu pode konvida tudu bu família ô kalker amigu ki bu krê.
