ALGUN algen ta konsigi manteba se lialdadi pa Deus si el provadu ti ki txiga se limiti? El ta kontinuaba ta obi ku Deus sikrê el ka ganha nada? Un ómi ki txoma Jó — tevi ki responde kes pergunta li — ki fazedu na se ténpu.

Jó, éra família di Abraon i el ta viveba na un lugar undi ki oji é Arábia. Na kel ténpu Israelitas inda staba na Ijitu. Un dia, anjus na Séu staba na un runion na prezénsa di Deus i Satanás ki é malvadu tanbê staba la. Na kel runion na Séu, Jeová fla ma el ta kunfiaba na Jó, ki éra se sérvu lial. Na verdadi, Jeová fla ma ka tinha ninhun algen na Téra, ki éra lial sima Jó. Má Satanás fla ma Jó ta sirbiba Jeová sô pamodi el ta abensuaba i protejeba el. Inda el fla, ma si Jó perdeba tudu kuza ki el tinha, el ta daba Deus kósta.

Deus dexa Satanás tra Jó primeru tudu kuza ki el tinha, se fidjus i dipôs se saúdi. Jó ka sabia ma éra Satanás ki staba ta faze-l tudu kes kuza la, pur isu el ka sta ntendeba pamodi ki Deus sta ta dexaba kes kuza kontise ku el. Má simé, Jó nunka ka fika kóntra Deus.

Três amigu falsu di Jó bai vizita-l. Un grandi párti di livru di Jó ta pâpia di kuzas ki es fla Jó. Es tenta konvense-l ma Deus staba ta kastiga-l pamodi algun pekadu ki el faze sukundidu. Es txiga ti di fla ma Deus ka ta nporta ku se sérvus i nen el ka ta kunfia na es. Jó ka seta ses manera di pensa mariadu. Ku kunfiansa el fla ma el ta kontinua lial pa Deus ti ki el móre!

Má Jó fadja pamodi el preokupa dimás ku difende se kabésa. Un jóven ki txoma Eliú, ki obi tudu ses konbérsu, koriji Jó i se amigus falsu. Eliú reprende Jó, pamodi Jó ka ntende ma difende direitu ki Jeová ten di governa é mutu más inportanti ki difende nos kabésa. Tanbê, el reprende ku firméza kes amigu falsu di Jó.

Dipôs, Jeová pâpia ku Jó i el koriji se manera di pensa. Jeová uza kuzas ki el kria pa djuda Jó ntende ma umanus é pikinoti konparadu ku Deus. Ku umildadi, Jó seta koreson ki Deus da-l. Dja ki Jeová ‘ten grandi konpaxon i el é mizerikordiozu’ el da Jó se saúdi otu bês, el da-l rikéza dôs bês más txeu di ki kel ki el tinha i el abensua-l ku 10 fidju. (Tiago 5:11) Pamodi Jó mante se lialdadi pa Jeová mésmu ku txeu prubléma, el prova ma kel akuzason ki Satanás faze ma ningen ka ta kontinua lial pa Deus si el pasa pa provason, é mintira.

— Ku bazi na livru di Jó.