PRENDE KU JIZUS

Violénsia ka ta rezolve prublémas

TOKA

Oji kada bês más algen ta kridita ma midjór manera di rezolve prublémas ô dizentendimentu é uza violénsia. Má kel manera di pensa li é diferenti di kes kuza ki Jizus inxina i di izénplu ki el da-nu. Odja alguns kuza ki el fla i ki el faze.

Kuzê ki Jizus fla?

Na kel diskursu famozu ki Jizus faze na monti, el inxina ma raiba i violénsia é ka midjór manera di rezolve prublémas. Odja alguns izénplu.

“Tudu kuza ki nhos krê pa otus algen faze nhos, nhos faze-s tanbê.” (Mateus 7:12; Lukas 6:31) Kel konsedju li, ki txeu bês ta txomadu di Régra di Oru, a ta insentiva-nu pa nu trata pesoas sima nu ta gostaba pa es trataba nos. Dja ki ninhun di nos ka ta krê sérba tratadu ku violénsia, nu ka debe sforsaba pa trata tudu algen ku ruspetu i bondadi, mésmu óras ki nu ka ta konkorda ku es?
“Kenha ki da nhos un bafatada na ladu direita, nhos dexa-l da na kel otu ladu tanbê.” (Mateus 5:38, 39; Lukas 6:29) Jizus ka staba ta inxina kes algen ma es debe setaba abuzu. Envês di kel-li, el staba ta koriji un ideia mariadu ki pesoas tinha ma es debe pagaba mal ku mal. Kel-li éra un kuza ki talvês alguns xéfi di relijion ta inxinaba. Jizus staba ta inxina ses sigidor ma es ka debe pagaba mal ku mal má es debe respondeba ku brandura óras ki otus algen provokaba es. b
“Nhos kontinua ta ama nhos inimigus”. (Mateus 5:43, 44; Lukas 6:27) Jizus inxina ma nu debe mostra bondadi pa kes algen ki ta ôdia-nu ô ki ta trata-nu mariadu. El ka krê flaba ma nu debe seta ses konportamentu mariadu. c Má, óras ki nu ta mostra bondadi pa kes algen ki ta ôdia-nu, es pode fika más kalmu i kel-li ti pode pô-s ta krê trata-nu ku bondadi tanbê.

Kuzê ki Jizus faze i kuzê ki el ta ben faze?

Jizus inxina ma violénsia ka ta rezolve prublémas i el faze sima el inxina. Na kel noti ki Jizus podu prézu, un di ses sigidor puxa spada pa difende-l má Jizus fla-l: “Torna poi spada na se lugar, pamodi tudu kenha ki ta uza spada é spada ki ta mata-l.” (Mateus 26:52) Jizus mostra amor pa ses inimigu kantu el púrdua kes algen ki trata-l mariadu i ti mésmu el ora pa es! — Lukas 23:33, 34; 1 Pedru 2:23.

Bíblia ta promete ma ka ta dura Jizus, ki é kel Prínsipi di Pas, ta ben kaba ku tudu violénsia. (Isaías 9:6, 7) Pa sabe más sobri kel futuru li, lé artigu “Modi ki géra na mundu ta ben kaba?”.

a Pa más informason, lé artigu “Kuzê ki é Régra di Oru?”

b Pa más informason, lé artigu “Kuzê ki kes palavra ‘odju pa odju’ krê fla?”

c Pa más informason, lé artigu “Kuzê ki ‘ama nhos inimigus’ krê fla?”