ĨSOMO YA 6
Ve Wĩkwatyo Mwaũ kwa Ala Akw’ũ?
1. Ve ũvoo mwaũ mũseo ĩũlũ wa ala akw’ũ?
Ĩla Yesũ waendie Vethania, mũsyĩ waĩ vakuvĩ na Yelusaleme, eethĩie mũnyanyae Lasalo aminĩte mĩthenya ĩna kuma akw’a. Yesũ aendie mbũanĩ e na Matha na Meli, eĩtu-a-inyia ma Lasalo. Ĩtina wa kavinda, andũ aingĩ nĩmookie vau. Kwasũanĩa Matha na Meli maĩ na ũtanu wĩana ata ĩla Yesũ wathayũũkisye Lasalo?—Soma Yoana 11:21-24, 38-44.
Matha nĩweesĩ ũvoo mũseo ĩũlũ wa akw’ũ. Nĩweesĩ kana Yeova akathayũũkya ala akw’ũ mekale ĩngĩ ĩũlũ wa nthĩ.—Soma Yovu 14:14, 15.
2. Akw’ũ mailyĩ ata?
Ngai eeie Atamu: “Wĩ kĩtoo, na nũkasyoka kĩtoonĩ.”—MWAMBĨLĨLYO 3:19.
Andũ moombiwe kuma kĩtoonĩ. (Mwambĩlĩlyo 2:7; 3:19) Ithyĩ ti maveva me nthĩnĩ wa mĩĩ ya nyama na nthakame. Kwoou ĩla twakw’a, vaiĩ kĩndũ kĩ nthĩnĩ witũ kĩtakusaa. Ĩla twakw’a, w’ongo witũ nũkusaa, na mesilya maitũ mayaa. Kwoou, nũndũ akw’ũ mayĩsĩ ũndũ o na wĩva, vaiĩ ũndũ Lasalo waaweta wĩthĩwa oonie ĩvinda yĩla waĩ mũkw’ũ.—Soma Savuli 146:4; Mũtavan’ya 9:5, 6, 10.
We Ngai nũthĩnasya andũ mwakinĩ ĩtina wa mamina kũkw’a? Nũndũ Mbivilia yonanasya akw’ũ mayĩsĩ ũndũ o na wĩva, kũthĩnw’a mwakinĩ nĩ ĩmanyĩsyo ya ũvũngũ yĩla yĩtumaa andũ mailĩĩla Ngai ũndũ ũtekaa. O na yĩsilya ya kũthĩny’a andũ mwakinĩ nĩ ũthatyo kwake.—Soma Yelemia 7:31.
Ĩloele vitio yĩ na kyongo, Kwĩthĩawa Ata Ĩla Mũndũ Wakw’a?
3. Akw’ũ nĩmatonya kũneena naitũ?
Akw’ũ maitonya kũneena kana kwĩw’a. (Savuli 115:17) Ĩndĩ ve alaĩka amwe athũku, na nĩmatonya kũneena na andũ mayĩtw’a nĩmo andũ ala makwie. (2 Vetelo 2:4) Yeova nũtũvatĩte kũtata kũneena na akw’ũ.—Soma Kũtũngĩlĩlwa Kwa Mĩao 18:10, 11.
4. Naaũ ala methayũũkw’a?
Andũ milioni mbingĩ ala makwie makathayũũkw’a mekale kũũ nthĩ. O na amwe makwie matamwĩsĩ Ngai na meekaa maũndũ mathũku makathayũũkw’a.—Soma Luka 23:43; Meko ma Atũmwa 24:15.
Ala methayũũkw’a makeethĩwa matonya kwĩmanyĩsya ũw’o ĩũlũ wa Ngai na mayonany’a kana me na mũĩkĩĩo nthĩnĩ wa Yesũ kwa kũmwĩw’a. (Ũvuan’yo 20:11-13) Ala methayũũkw’a na mayĩka moseo makeethĩwa matonya kũtanĩa thayũ ĩũlũ wa nthĩ tene na tene.—Soma Yoana 5:28, 29.
5. Ũthayũũkyo ũtũmanyĩasya kyaũ ĩũlũ wa Yeova?
Ngai atumie vethĩwa na wĩkwatyo kwa ala akw’ũ kwa kũmũtũma Mwana wake akw’e kwondũ witũ. Kwoou ũthayũũkyo ũtũmanyĩasya ĩũlũ wa wendo wa Yeova na mumo wake. Ĩla akw’ũ methayũũkw’a, nũũ wĩenda kwona mũno vyũ?—Soma Yoana 3:16; Alomi 6:23.
