Kavinda kanini ĩtina wa Yesũ kũmaumĩlĩĩla atũmwa, Vetelo nĩwaendie kũtea makũyũ Ũkanganĩ wa Kalilii. Thoma, Yakovo, Yoana, na amanyĩwʼa angĩ nĩmaendanisye nake. Mateie makũyũ ũtukũ mũima, ĩndĩ mayaakwatya o na yĩmwe.

Mũthenya ũla waatĩĩe kĩoko tene, nĩmoonie mũndũ aũngamĩte ũtee wa ũkanga. Mũndũ ũsu ametie amakũlya: ‘Nĩmũkwatisye kĩndũ?’ Namo mamũsũngĩa: “Aiee!” Na ĩndĩ amea atĩĩ: “Ĩkyai kĩtei kĩwʼũnĩ ngalĩ ya kwʼoko kwa aũme kwa ĩsiwa.” Mekya kĩtei, nĩmakwatisye makũyũ maingĩ mũno weethĩa nĩmekũemwa nĩ kũkĩkusya kuma kĩwʼũnĩ. Nĩvo ĩndĩ Yoana wamanyie kana mũndũ ũsu aĩ Yesũ na kwoou asya atĩĩ: “Nĩ Mwĩaĩi!” Vetelo eewʼa ũu, nĩwathaanyũkie alika kĩwʼũnĩ na athambĩa nginya ũtee wa ũkanga. Na ĩndĩ amanyĩwʼa ala angĩ mamũatĩĩa na ĩsiwa.

Yĩla mavikie ũtee wa ũkanga, nĩmoonie mĩkate na makũyũ mailĩĩlwe mwakinĩ maendeee kũvya. Nake Yesũ amea maete makũyũ amwe katĩ  wa ala makwatya mongeleele ala maĩ vo. Na ĩndĩ amea atĩĩ: ‘Ũkai mũye lĩu wa kwakya.’

Mamina kũya Yesũ amũkũlilye Vetelo atĩĩ: ‘We nũmbendete kwĩ ũndũ wendete kũtea makũyũ?’ Nake Vetelo amũsũngĩa amwĩa: ‘Ĩĩ, Mwĩaĩi, nĩwĩsĩ nĩngwendete.’ Nĩvo ĩndĩ Yesũ wamwĩie: ‘Ĩthya tũlondu twakwa.’ Na Yesũ amũkũlya ĩngĩ: ‘Vetelo, we nũmbendete?’ Nake Vetelo amũsũngĩa ĩngĩ: ‘Mwĩaĩi, nĩwĩsĩ nĩngwendete.’ Nake Yesũ amwĩa: “Ĩthya tũlondu twakwa.” Na ĩndĩ Yesũ amũkũlya oou ĩvinda ya katatũ. Yĩla wamũkũlilye ũu, Vetelo nĩweewie woo mũno. Kwoou amũsũngĩa amwĩa atĩĩ: ‘Mwĩaĩi we nĩwĩsĩ maũndũ onthe. Nĩwĩsĩ kana nĩngwendete.’ Na ĩndĩ Yesũ amwĩa: “Ĩthya tũlondu twakwa.” Na ongeleela kũmwĩa atĩĩ: “Endeea kũngatĩĩa.”